Read Da'a Kaili 2 TIMOTIUS 3 Bible Online

2 TIMOTIUS 3 - Da'a Kaili bible

2 TIMOTIUS 3

¹Timotius, kana munjani ane mamosumo kaopu nu dunia kana marata tempo to makajana.

²Manusia aga mompotowe korona mboto. Ira madoko nu doi, ira masombo bo mangoa pade manguli sinja'i tau ntanina. Ira da'a matundu ri ja'i ntotu'a ira mboto bo da'a ranjani ira motarima kasi. Ira kana mpu'u-mpu'u maja'a,

³bo ira mpu'u-mpu'u da'a maria towe. Ira da'a madota mosinggabelo bo ira bate-batena mompakawau sanga tau ntanina. Ira da'a mamala manta'amaka dota koro ira mboto bo ira aga masoa mpu'u. Ira momporau rara pura-pura nuapa to nabelona.

⁴Ira mompakanawu roa ira mboto bo ira da'a ria rekena, pade ira mompekiri iramo to neliu pangginjanina. Ira melabipa mompotowe kasana koro ira mboto pade mompotowe Alatala.

⁵Riara mpanggita eo-eo ira momparasaya Alatala, tapi riara nta'ina ira mombasapuaka kuasana. Pakakawaomo koromu nggari ja'i ntau noinggu iwetu,

⁶sabana ri tatongo ira naria to nata'u akala ira mesua raranjapo ntau ala mombabagiu besi-besi to nadoyo to nadea silakana bo to nikuasai nadea ngele dota rara to naja'ana.

⁷Besi-besi etu batena meguru tapi ira da'a sanggani mamala mangginjani pepatuduki to nakonona.

⁸Topebagiu etu mpu'u-mpu'u mangewa pepatuduki to nakonona nasimbayu ewa Yanes bo Yambres nangewa nabi i Musa ri ngayo Magau Firaun nggaolu. [1] Pekiri ira maja'a bo pomparasaya ira da'a ntoto makono.

⁹Tapi ira da'a mamala mompapola powia ira etu, sabana bagiu ira etu kana manoto ka pura-pura tau nasimbayu ewa bagiu Yanes bo Yambres nggaolu najadi nanoto.

¹⁰Tapi ninjanimu mboto aku da'a nasimbayu ewa topebagiu etu. Ninjanimu pepatudukiku, pokaingguku bo patujuku matuwu. Ninjanimu mboto pomparasayaku ka Alatala, posabaraku ri ja'i ntau pura-pura bo pepotoweku ka sanggamanusiaku.

¹¹Ninjanimu iwenu aku naroo tempo nipandasa bo nipakasusa ewa to najadi ri ngata Antiokhia, ngata Ikonium bo ngata Listra bopia. Aku mpu'u-mpu'u nipandasa, tapi i Pue bate-batena nompakasalama aku nggari kasusa etu pura-pura.

¹²Kakonona, pura-pura tau to madota matuwu mantuki dota Alatala bo mosaongu rara ante Yesus Kristus kana rapandasa ntau.

¹³Aga tau naja'a bo topebagiu kana mantambai kaja'ana. Ira mombabagiu tau bo ira wo'u rabagiu.

¹⁴Tapi naupa iwetu, komi kana maroo manjoko pepatuduki to nipegurumu bo to mpu'u-mpu'u niparasayamu, sabana ninjanimu pokainggu tau-tau to nompaguru etu ka komi.

¹⁵Pade ninjanimu wo'u nggari kakedimu komi nangginjani isi Buku Nagasa to namala mompakanoto ka komi ante momparasaya Yesus Kristus komi namala rapakasalama.

¹⁶Pura-pura tesa to naria riara Buku Nagasa nitulisi ante kuasa nggari ja'i Alatala mboto bo noguna mompatuduki to nakonona, mompakanoto sala, mompakabelo pokainggu bo mompatuduki tau mompowia to nanoana.

¹⁷Ante mangginjani isi Buku Nagasa butu mba'a topomparasaya Alatala rapakagana ala i'a mompakule mompowia pura-pura powia to nabelona.