Read Da'a Kaili 2 TIMOTIUS 4 Bible Online

2 TIMOTIUS 4 - Da'a Kaili bible

2 TIMOTIUS 4

¹Toramo! Yesus Kristus kana marata bali ri dunia e'i mombatangara pura-pura manusia, nabeloka to danatuwu nabeloka to namatemo, pade I'a kana moparenta ri dunia e'i ewa magau. Sabana etu, riara sanga Alatala bo Yesus Kristus aku mantewai komi iwe'i:

²Patolelemo Tesa nu Alatala. Komi kana masadia ri butu-butu loga, nabeloka loga nabelo atau da'a. Pakanoto ka tau pokainggu ira to nasalana, ontiakamo to nompowia sala, pade waimo tesa to nabelo ka ira pura-pura. Patudukimo ira mpakabelo-belo ante maponu posabara.

³Sabana kana marata tempona banepia tau mana madota mangepe pepatuduki to nakonona. Tapi ira aga mompasiromu guru-guru to mompaguru pepatuduki to rapokono talinga ira, ala ira mamala mangepe pepatuduki to nasituju ante dota rara ira mboto to naja'ana.

⁴Ira mombalamu talinga ira ala ne'e mangepe pepatuduki Alatala to nakonona, pade ira aga manta'a talinga ira mangepe tesa-tesa kabali to nipetowali manusia.

⁵Tapi, Timotius, jagaimo koromu mpakabelo-belo nau nuapa majadi. Pakaroo raramu tempo rapandasa. Tuimo bagomu ewa topanggeni Kareba Belo, pade pajala puramo bago to niparasaya Alatala ka komi.

⁶Aku nanguli iwetu sabana mana masaeka aku mamate majadi pesomba ka Alatala. Sampalaipa aku mompalasi dunia e'i.

⁷Nitukikumo posilumba nangowa to nabelona. Nangowamo aku sampe ri panta'ana. Aku batena natutu nomparasaya sampe ri kaopuna.

⁸Jadi we'i-we'i nasadiamo hadia padagi ka aku to rawai i Pue ka tau to nanoana. Ri kaopu nu dunia i Pue Yesus mboto, Topotangara to nanoana, kana mombawai hadia etu ka aku, pade da'a aga ka aku tapi ka isema-sema to nalentora mpu'u mompopea karatana.

⁹Pasimbukumo masalisa marata ri ja'iku ri se'i,

¹⁰sabana i Demas nompalasi aku, apa i'a aga nompotowe katuwuna ri dunia we'i-we'i. Nalaimo i'a mpaka ri ngata Tesalonika. Pade i Kreskes nalau mpaka ri Propinsi Galatia, bo i Titus mpaka ri Bagia Dalmatia.

¹¹Aga i Lukas to naria ri ja'iku ri se'i. Ane komi momai tulusaka wo'u i Markus mpaka wemai, sabana i'a mamala mantulungi bagoku ri se'i.

¹²Pade i Tikhikus nipakaukumo mpaka ri ngata Efesus.

¹³Ane komi momai ri se'i, keni wo'u baju leniku to niboliku ri ngata Troas ri sapo i Karpus. Pade keni wo'u buku-bukuku, neliupa buku-buku to nikawia nggari kulimba.

¹⁴Aleksander, pande nu tambaga etu, nadea ja'ana nipowiana ri ja'iku. Pue kana mombabalasi i'a nantuki pokaingguna etu.

¹⁵Komi mboto kana mainga ka i'a sabana i'a mpu'u-mpu'u nangewa pepatudukita.

¹⁶Tempo aku pamulana nitangara, da'a ria kamba samba'a nomporoa aku; pura-pura roaku nompalasi aku. Perapi Pue da'a mompakasala ira sabana powia ira etu.

¹⁷Tapi i Pue nomporoa aku, bo I'a nompakaroso aku ala aku nompakule nompatolele pura-pura Kareba Belo sampe niepe pura-pura tau da'a to Yahudi. Kaopuna aku da'a najadi nipatesi.

¹⁸Pade niparasayaku i Pue kana manggabasaka aku nggari pura-pura powia ntau to naja'a pade manggeni aku ante masalama mesua ri Poparentana ri suruga. I'a masipato rabila bo ratoiya sampe ri kasae-saena. Amin!

¹⁹Pakasampe tabeku ka i Priskila bo Akwila, pade ka ira Onesiforus sanjapo.

²⁰Erastus naboli ri ngata Korintus bo i Trofimus nipalasiku ri ngata Miletus sabana i'a naju'a.

²¹Pasimbukumo momai ri se'i da'apa tempo leni. Nadea tabe nggari ja'i Ebulus, i Pudes, i Linus bo i Klaudia, pade nggari ja'i pura-pura topomparasaya i Pue Yesus ntanina ri se'i.

²²Perapi Pue mosanggani-nggani ante komi. Perapi I'a mombagane komi pura-pura. Tabe nggari ja'iku, Paulus