Read Da'a Kaili TITUS 1 Bible Online

TITUS 1 - Da'a Kaili bible

TITUS 1

¹Sura e'i nggari ja'iku i Paulus, batua Alatala bo suro Yesus Kristus ka anaku i Titus. Aku nipelisi bo nisuro Alatala mantulungi tau-tau to nipelisina ala ira maroo momparasaya I'a. Pade aku wo'u nisurona manggeni ira momparasaya pepatuduki to nakonona to nanggeni ira matuwu ante inggu to masipato ka topomparasaya Alatala.

²Isi pepatuduki etu to napokona, ira mamala manjarumaka matuwu mabelo sampe ri kasae-saena. Etu to nijanji Alatala ri lamba pamulana tempo dunia e'i da'apa nipajadina. Pade ninjanitamo Alatala da'a nodawa. Pojanjina namala raparasayata.

³We'i-we'i ri tempo to nipakatantuna mboto I'a nompopanjani pojanjina etu ka manusia riara tesa to niuli Kareba Belo. Pade kareba etu niparasaya ka aku ala rakeni ka pura-pura tau nantuki parenta Alatala, Magau to Mompakasalama kita.

⁴Titus, komi mpu'u-mpu'u ewa anaku mboto sabana komi wo'u nomparasaya i Pue Yesus nasimbayu ewa aku. Perapi Pue Alatala bo Pue Yesus Kristus, Magau to Mompakasalama kita, mombagane bo mombawai katuwua mabelo ka komi.

⁵Patujuku nompalasi komi ri Lewuto Kreta ala komi mompakasiayu anu da'apa nasiayu ri setu, pade ala komi mangonggotaka topanggeniaka-topanggeniaka topomparasaya ri pura-pura ngata. Toramo atura-atura to nipakatantuku ka komi iwe'i:

⁶Tau to masipato raonggotaka majadi topanggeniaka topomparasaya aga tau da'a naria inggu to nasalana, to natutu rarana nompiara rongona samba'a lau. Ana-anana kana momparasaya i Pue Yesus bo ne'e aga mompebasa matuwu masana ri dunia, bo ne'e mawatu.

⁷Topanggeniaka topomparasaya etu kana matuwu ante da'a ria ingguna to nasalana, sabana i'a wakele Alatala mboto. I'a da'a mamala masombo atau masalisa marau, pade da'a topanginu anu mepakalangu, pade da'a toposibaga bo da'a tau nadoko nu doi.

⁸I'a samba'a tau to najoi rarana mantarima torata riara njapona, bo tau nompokono to nabelona. I'a kana samba'a tau to nanoto, to nanoa bo nagasa rarana, bo tau to namala manta'amaka dota rarana.

⁹I'a kana maroo mantuki pepatuduki to nakonona to nipatuduki ka i'a ala i'a mamala mompatuduki topomparasaya mantuki pepatuduki etu, pade ala i'a wo'u mamala mompakanoto sala ntau to nombasapuaka pepatuduki etu.

¹⁰Sampe niuliku iwetu sabana nadeamo tau to nangewa pepatuduki to nakonona, ira nombabagiu tau ante nompatuduki anu da'a ria gunana. To nadeana ira tau to Yahudi to nesua agama Karistee.

¹¹Ira kana ratagi, sabana nadea ongu njou nipakagado ante pepatuduki ira to da'a nasipatona. Patuju ira aga mangala doi ntau ante akala to nadenggo-denggona.

¹²Naria samba'a nabi nggari ira to Kreta mboto to nanguli iwe'i: “To Kreta bate-batena topodawa. Ira nasimbayu kaja'ana ewa binata to nasoana; ira tau nadoko to nabuto rarana.”

¹³Tesa nabi etu nakono. Sabana etu komi kana mako'o mangontiaka ira to nompatuduki to nasala etu ala ira majea bo mantuki pepatuduki to nakonona.

¹⁴Ne'e mana ira momparasaya kabali-kabali nto Yahudi bo atura-atura to nipakatantu manusia to nombasapuaka pepatuduki to nakonona.

¹⁵Ka tau to nagasamo pura-pura nuapa nagasa. Tapi ka tau to natantorumo bo da'a nomparasaya Alatala, da'a ria sangele to nagasa, sabana pekiri bo rara nta'i ira natantoru mami.

¹⁶Ira nanguli ira nosinjani ante Alatala, tapi powia ira nanjapuaka I'a. Ira nompowia to nompakarunggu rara Alatala, bo ira da'a madota matundu ri ja'ina. Da'a namala ira nompowia to nabelona.