Read Da'a Kaili TITUS 2 Bible Online

TITUS 2 - Da'a Kaili bible

TITUS 2

¹Tapi Titus, komi kana mompatuduki ka tau nuapa to masipato ante pepatuduki to nakonona.

²Patudukimo ka totu'a-totu'a langgai ira kana manta'amaka dota rara ira mboto. Ira kana matuwu ante inggu to masipato rabila bo ira kana manoto. Ira kana mantuki pepatuduki to nakonona, ira kana mpu'u-mpu'u mompotowe tau ntanina, pade ira kana maroo momparasaya naupa nipandasa.

³Wa'a wo'u ante totu'a-totu'a besi. Uli ka ira, ira kana matuwu ante inggu to nagasa to masipato riara mpanggita Alatala. Ne'e ira mompakaja'a tau ntanina, ne'e ira manggapilaya manginu anu mepakalangu. Tapi ira kana mata'u mompaguru to nabelona,

⁴ala ante iwetu ira mamala mompatuduki besi-besi to namudana mompotowe rongo bo ana ira mboto.

⁵Ira kana majadi tau nanoto rarana to natuwu ante da'a mogau sala nuapa-nuapa. Ira kana maraji mompakasiayu awuna. Ira kana majadi tau to nabelo rarana to natundu ri ja'i rongona mboto. Ane ira moinggu iwetu, da'a ria tau mamala manjalaraka Tesa nu Alatala.

⁶Iwetu wo'u to rapatuduki komi ka langgai-langgai to namudana. Uli ka ira, ira kana manta'amaka mpengele-ngele dota rara ira to naja'ana.

⁷Pade komi mboto kana tunggai mompowia to nabelona ala pokainggumu etu majadi jonjo to mamala rapasiala ntau. Ane komi mompatuduki tau, patudukimo ante manoa bo mpu'u-mpu'u raramu.

⁸Pakemo tesa to nakonona to da'a mamala rasalaraka ntau, ala balimu maeya mboto mata ira sabana pura-pura nuapa to niulimu etu nabelo. Da'a ria sangele to naja'ana to namala rasalaraka ira ka kita.

⁹Patudukimo batua-batua ala ira bate-batena matundu ri ja'i madika ira. Ira kana mokarajaa mompakadamba rara madika ira etu. Ne'e ira mesapuaka,

¹⁰bo ne'e ira mompelea mbara-mbara nu madika ira. Kana manoa rara ira ala mompakanoto ira mpu'u-mpu'u namala raparasaya. Ira kana moinggu iwetu ala mpengele-ngele powia ira mompopokita ka tau kabelo nu pepatuduki ewa Pue Alatala, Magau to Mompakasalama kita.

¹¹Kita masipato matuwu ante pokainggu to nabelona iwetu, sabana nggari towe belona mboto Alatala narata ri dunia e'i ala mompakasalama pura-pura manusia.

¹²Nggari towe belona I'a nompatuduki kita ala mompalasi pokainggu to da'a nipokonona bo dota rara to naja'ana. Pade nipatudukina ala kita matuwu ri dunia e'i ante inggu to manoto, pade mompowia to nanoana bo to nantuki dota Alatala.

¹³Kita kana matuwu iwetu ri dunia e'i ante manjarumaka saongu kajadia to mpu'u-mpu'u mompakasana rarata, etumo karata Yesus Kristus ante kuasa bo karemena to nipogumaa. I'amo Alatalata bo Magau to Mompakasalama kita.

¹⁴I'a nombawai korona rapatesi ala manggabasaka kita nggari pura-pura kaja'ana pade mompegasa katuwuta sampe kita majadi todeana mboto to maraji mompowia to nabelona.

¹⁵Jadi Titus, patudukimo pura-pura etu ka topomparasaya i Pue Yesus. Popatora etu ka ira bo ontiakamo ira to da'a nantuki pepatuduki etu. Kawiamo etu ante kuasa to niwai Alatala ka komi. Ne'e rapalamba tau mombasapuaka komi.