Read Da'a Kaili FILEMON 1 Bible Online

FILEMON 1 - Da'a Kaili bible

FILEMON 1

¹Sura e'i nggari ja'iku i Paulus to nitarunggu sabana nomparasaya Yesus Kristus, bo nggari ja'i sampesuwuta i Timotius, ka i Filemon roa kami sampokarajaa to nipotowe kami,

²pade ka topomparasaya-topomparasaya i Pue Yesus to nodade ri sapomu, pade ka Apfia sampesuwuta besi, bo Arkhipus, roata sampokarajaa.

³Perapi Umata Pue Alatala bo Pue Yesus Kristus mombagane bo mombawai katuwua mabelo ka komi.

⁴Butu nggani aku nanggeni komi riara posambaya aku nosukuru ri ja'i Pue Alatalaku,

⁵sabana niepeku komi nomparasaya i Pue Yesus pade nompotowe pura-pura topomparasaya.

⁶Aku nosambaya ala kasintuwu komi topomparasaya manggeni komi mantambai mangginjani mpengele-ngele rasi to naria ri ja'ita sabana nosaongu rara ante Kristus.

⁷Sampesuwuku, towemu ri ja'i ntopomparasaya i Pue Yesus mpu'u-mpu'u nompakadamba pade nompakaroso raraku, sabana komi mpu'u-mpu'u nompakasana rara todea topomparasaya.

⁸Etu sampe naria pomperapiku ri ja'imu. Kakonona aku namala momparenta komi mowia to masipatona sabana aku suro Kristus.

⁹Tapi nantora towemu etu agina aku merapi ala etu rapowia komi. Aku e'i, i Paulus samba'a totu'a to nitarunggu we'i-we'i sabana nomparasaya Yesus Kristus.

¹⁰Jadi naria pomperapiku ka komi to nosinggawela ante Onesimus. I'a najadi ewa anaku mboto sabana aku nanggeni i'a nomparasaya i Pue Yesus tempo aku riara tarunggu ri se'i.

¹¹Tempo bopia i'a da'a noguna ka komi, tapi we'i-we'i i'a mpu'u-mpu'u nogunamo ka komi bo ka aku wo'u. [1]

¹²We'i-we'i Onesimus to nipotoweku etu kupakau manjili bali mpaka ri ja'imu.

¹³Kakonona aku madota manta'amaka i'a ri ja'iku ri se'i ala i'a mamala manjaliku komi mantulungi aku to nitarunggu sabana nompatolele Kareba Belo.

¹⁴Tapi aku da'a madota mowia iwetu ane da'apa nikasituju komi. To nipodotaku ala to nabelona etu ne'e mupowia sabana nipasu'u tapi nggari dota raramu mboto.

¹⁵Nipekiriku bara Onesimus nipopoga'a nggari ja'imu sampalai ala komi mamala mantarima i'a bali sampe ri kasae-saena.

¹⁶We'i-we'i i'a da'a mana aga samba'a batua, tapi neliu nggari etu i'a samba'a topomparasaya to nipotowe. I'a nipotoweku, pade natantumo i'a wo'u nipotowemu, nabeloka ewa samba'a batuamu, nabeloka ewa sampesuwumu riara i Pue.

¹⁷Jadi ane aku nireke roamu topomparasaya kuperapi tarimamo Onesimus bali nasimbayu ewa komi nantarima aku.

¹⁸Pade ane i'a nompakarugi komi atau noinda ri ja'imu damo aku mombatangguna.

¹⁹Aku, Paulus, nantulisi tesa e'i ante paleku mboto. Aku kana mombabayari etu pura-pura ka komi. Kakonona da'a paraluu aku mompopatora ka komi iwenu komi mboto noinda ri ja'iku sabana nggari aku sampe komi nombarata katuwua nabelo ewa topomparasaya i Pue Yesus.

²⁰Jadi sampesuwuku, kuperapi ala komi mowia to noguna ka aku, sampesuwumu riara i Pue. Pakasanamo raraku ewa sampesuwumu riara Kristus ante mantarima Onesimus bali.

²¹Aku nantulisi sura e'i ka komi ante nomparasaya komi kana mowia nuapa to niperapiku etu. Pade da'a aga etu, ninjaniku komi kana mowia meliu nggari pomperapiku etu.

²²Pade nariapa sangele pomperapiku iwe'i: Tulungi pakasadia ka aku peto'o kupoturu ri sapomu, sabana nisarumakaku nggari posambaya komi pura-pura aku kana rakabasaka nggariara tarunggu e'i sampe mamala manjili ri ja'i komi.

²³Tabe nggari ja'i Epafras to nosanggani-nggani ante aku riara tarunggu sabana i'a nomparasaya Yesus Kristus.

²⁴Tarima wo'u tabe nggari ja'i roa-roaku sampokarajaa, etumo i Markus, Aristarkhus, i Demas bo i Lukas.

²⁵Perapi towe belo nggari ja'i Pue Yesus Kristus mosanggani-nggani ante komi pura-pura. Tabe nggari ja'iku, Paulus