Read Da'a Kaili IBRANI 1 Bible Online

IBRANI 1 - Da'a Kaili bible

IBRANI 1

¹Tempo nggaolu nadea ngganimo Alatala nompasimbayu tesana ka nabi-nabi to nompapola etu ka totu'ata nggaolu ante mpengele-ngele akala.

²Tapi ri tempo namosu kaopu nu dunia e'i Anana mbotomo to nompasimbayu tesana ka kita. Nosanggani-nggani ante Anana etu Alatala nompajadi langi bo dunia, pade nipakatantuna ala pura-pura nuapa to nariana majadi bagia nu Anana.

³Anana etu nompopokita kuasa bo kagaya nu Alatala, pade I'a nasimbayu ntoto ewa Alatala. I'amo to nombatande mpengele-ngele ri langi bo dunia ante tesana to nakuasa. Naopu I'a nompegasa manusia nggari silaka, I'a neore mpaka ri suruga pade nekatoko ri peto'o to nibila ri panggana nu Alatala to Neliu Nggakuasa.

⁴Ana nu Alatala neliu nggalanga nggari malaeka-malaeka Alatala, pade sanga to niwai Alatala ka I'a neliu nibila nggari sanga malaeka-malaeka.

⁵Nanotomo kalangana etu sabana da'a ria sanggani Alatala notesa ka malaekana iwe'i: “Ikomo Anaku, eo e'i Aku najadi Umamu.” [1] Tapi etu to niulina ka Anana mboto. Pade da'a ria sanggani Alatala notesa ewa malaekana iwe'i: “Aku Umana, pade I'a Anaku.” [2]

⁶Pade tempo Alatala nompakau Anana ulumbua marata ri dunia e'i, I'a wo'u nanguli iwe'i: “Pura-pura malaeka kana mombasomba Anaku etu.” [3]

⁷Tapi to niuli Alatala ewa malaeka-malaekana iwe'i: “Alatala nompajadi malaeka-malaekana ewa poiri. Ira nasimbayu ewa apu to najela.” [4]

⁸Tapi to niulina ka Anana iwe'i: “O Alatala, poparentamu maroo sampe ri kasae-saena, Komi noparenta todeamu ante nanoa rara.

⁹Komi nompotowe pokainggu to nanoa bo nomporau rara pokainggu to nadenggona. Sabana etu Aku, Alatalamu, nangonggotaka Komi majadi Magau to neliu nggalanga panggana nggari roamu bo nombawai ka Komi kadamba nu rara to neliu-liuna.” [5]

¹⁰Pade niuli Alatala wo'u ka Anana iwe'i: “Pue, ri lamba pamulana Komi nompajadi dunia, Pade langi wo'u powia mpalemu.

¹¹Etu pura-pura kana maropu banepia, tapi Komi bate-batena maria. Etu pura-pura kana maranta ewa pakea,

¹²pade ratika Komi nasimbayu ewa buya. Etu kana rasambei nasimbayu ewa baju to narantana. Tapi Komi da'a ntoto mabali, Katuwumu da'a ria kaopu-opuna.” [6]

¹³Pade da'a ntoto ria sanggani Alatala nanguli ka malaekana ewa to niulina ka Anana iwe'i: “Kamai pekatokomo ri sabingga ngganaku sampe Aku mompowia pura-pura balimu mekou ri ja'imu.” [7]

¹⁴Jadi ane iwetu, nuapa kakonona malaeka-malaeka i Pue? Ira pura-pura topantulungi Alatala to nisurona mantulungi tau-tau to rapakasalamana.