Read Da'a Kaili IBRANI 10 Bible Online

IBRANI 10 - Da'a Kaili bible

IBRANI 10

¹Atura-atura agama to nipapola i Musa aga gambara kabelona to rakeni Kristus ka kita, da'a lenjena mpu'u. Pesomba-pesomba to nipakatantu riara Atura-atura etu da'a ntoto namala manggeni tau majadi manoa riara mpanggita Alatala, naupa ira butu-butu mpae marata manggeni pesomba to nasimbayu rapesomba ka Alatala.

²Ane rapana pesomba ira etu namala mantapasi silaka, natantumo ira mana manggeni pesomba ka Alatala, sabana mana matomo rara ira mantora silaka ira.

³Tapi kakonona pesomba to nikeni ntau butu-butu mpae aga nompopatora ka tau ira nasilaka.

⁴Sabana lei nggari japi pomawa bo towau tuamana da'a ntoto namala mompakaropu silaka.

⁵Etu sampe tempo Kristus narata ri dunia e'i, I'a nanguli iwe'i: “O Alatala, pesomba bo pewai da'a nipodotamu, tapi naria koro to nipakasadiamu ka Aku.

⁶Pesomba to nipalabu bo pewai-pewai to niwai ala mombasompo silaka da'a nipokonomu.

⁷Pade Aku nanguli, ‘Kita we'i, O, Pue Alatala, naratamo Aku mompowia dotamu nasimbayu ewa to nitulisi riara Buku Nagasa ewa Aku.’ ” [38]

⁸Ri ba'ana, I'a nanguli, “Pesomba bo pewai da'a nipodotamu.” Pade niulina, “Pesomba to nipalabu bo pewai-pewai to niwai mombasompo silaka da'a nipokonomu.” Etu to niulina naupa etu pura-pura nikeni ka Alatala nantuki Atura-atura agama.

⁹Naopu I'a nanguli iwetu, nitambaina iwe'i: “Kita we'i, O, Pue Alatala. Naratamo Aku mompowia dotamu.” Jadi sampesuwu-sampesuwu, pesomba-pesomba to nantuki Atura-atura agama nipakalipo Alatalamo ala I'a mamala manjambei pesomba etu ante pesomba Kristus.

¹⁰Pade nggari dota Alatala etumo, kita nipakagasa tempo Yesus Kristus nombawai korona mboto ewa pesomba sanggani lau sampe ri kasae-saena.

¹¹Eo-eo topanggeni-topanggeni agama Yahudi nekanggore nantui bago ira. Nompenggani-nggani ira nanggeni pesomba-pesomba to nasimbayu ka Alatala. Tapi pesomba etu da'a namala mompakaropu silaka. [39]

¹²Tapi Kristus nanggeni sangele lau pesomba pade pesombana etu namala mompakaropu silaka sampe ri kasae-saena. Naopu etu I'a neore mpaka ri suruga pade nekatoko ri peto'o to nibila ri panggana nu Alatala.

¹³Pade we'i-we'i I'a nompopea sampe Alatala mompowia pura-pura balina mekou ri ja'ina.

¹⁴Jadi ante sangele lau pesombana Kristus nompegasa kita nggari silakata pade nompajadi kita tau da'a ria sala riara mpanggita Alatala sampe ri kasae-saena.

¹⁵Nosa Nagasa nu Alatala wo'u nompakanoto etu ka kita. Niulina iwe'i:

¹⁶“Iwe'imo pojanji to kupowia ante ira ri tempo to marata etu: Aku kana mombaboli Atura-aturaku riara pekiri ira, bo mantulisi etu riara nta'i ira.” Iwetu panguli i Pue. [40] Pade niulina wo'u,

¹⁷“Silaka-silaka bo kaja'a-kaja'a ira mana kutora.” [41]

¹⁸Jadi ane silaka-silaka bo kaja'a-kaja'a naopu niampungimo, mana paraluu pesomba mombasompo silaka.

¹⁹Jadi sampesuwu-sampesuwu, we'i-we'i kita nabia mompakamosu Alatala sabana nggari lei i Pue Yesus. Ante kamatena I'a nombabuka ka kita jala to nabou to nanggeni katuwua nabelo. Ri Tenda Mpepue jala mesua riara Peto'o to Neliu Nggagasa nilawa kae powombo. Tapi ante nombawai korona rapatesi Kristus nombabuka jala ala kita mamala mompakamosu Alatala nasimbayu ewa Balengga Topanggeni Agama Yahudi nombaliunaka kae powombo mpaka ri ja'i Alatala ri Peto'o to Neliu Nggagasa.

²¹Pade Kristus najadi Balengga Topanggeni Agama to nanggeniaka ananjapo Alatala.

²²Jadi kamaimo kita mompakamosu Alatala ante rara to nalusu bo pomparasaya to naroo sabana rara nta'ita to nompakasala kita bopia naopu nipakagasa ante lei Kristus, pade korota naopu nidiu ante ue to nagasa.

²³Kamaimo kita maroo manjarumaka nuapa to nipangakuta ante da'a molenga-lenga, sabana ninjanita Alatala namala raparasaya mompakadupa pojanjina.

²⁴Pade kamaimo kita mompekiri roata samba'a bo samba'a ala kita mamala mosipakaroso rara sampe kita pura-pura mosipotowe bo manggawia powia to nabelona.

²⁵Ne'e kita metiko'o rara masiromu modade ewa kabiasa bara sakuya mba'a tau, tapi kamaimo kita mosipopatora samba'a bo samba'a, neliu-liupa we'i-we'i sabana ninjanita namosumo karata i Pue Yesus bali ri dunia.

²⁶Ane ratunggaita mowia silaka naopu kita nantarima pepatuduki to nakono, mana ria pesomba to namala mompakaropu silaka etu.

²⁷Tapi to naria aga pesuku to mompakawiora rara to rapopeata, bo apu to napane mpu'u to mompalabu mpakaopu tau-tau to nangewa Alatala.

²⁸Tau to nanjapuaka Atura-atura agama to nipapola i Musa nipatesi ante da'a ria ampu ane naria tolumba'a sabi nompakanoto kasalana. [42]

²⁹Tapi neliu nggatomo mpu'u pesuku to masipato rapawela ka tau to nombalonggo-longgo Ana nu Alatala. Tau etu nompekiri lei i Pue Yesus da'a ria gunana, tanu lei etu mboto nantapasi silakana nantuki pojanji Alatala. Pade tau etu nanjalai Nosa Nagasa to nanggeni towe belo nu Alatala ka todeana.

³⁰Ninjanitamo isema to nanguli iwe'i: “Akumo to mombabalasi. Aku mombasuku ira.” Pade niulina wo'u, “Pue kana mombatangara todeana.” [43]

³¹Natantumo nawiora mpu'u rara ntau to nawela pesuku nggari ja'i Alatala to Natuwuna!

³²Tapi sampesuwu-sampesuwu, toramo katuwumu tempo bopia. Tempo komi lako nantarima reme nggari ja'i Pue nadea kasusa bo kapari to nirasai komi, tapi komi batena naroo nomparasaya.

³³Sanggani-sanggani komi nisalai bo nipakaja'a ntau ri ngayo ntodea. Pade sanggani-sanggani komi nosimporoa ante tau-tau to nipowia ntau iwetu.

³⁴Komi wo'u naasi mata nomporoa bo nantulungi tau-tau to nitarunggu, pade tempo mbara-mbara komi nikaliaka ntau komi batena nadamba-damba, sabana ninjani komi naria kakalumana komi to neliu nggabelo ri suruga to naroo sampe ri kasae-saena.

³⁵Jadi sampesuwu-sampesuwu, ne'e komi maeka momparasaya, sabana ane komi maroo momparasaya mabete mpu'u tambo komi banepia.

³⁶Komi kana maroo rara ala komi mamala mompowia dota Alatala pade naopu etu mantarima nuapa to nijanjina.

³⁷Sabana riara Buku Nagasa naria nitulisi iwe'i: “Damo sampalai I'a to marata etu kana masalisa marata. I'a da'a mombasoro-soro karatana.

³⁸Pade todeaku to najadi nanoa riara mpanggitaku ante nomparasaya, iramo to matuwu mabelo sampe ri kasae-saena. Tapi ane ira mokanggaura ira mana rakonoa raraku.” [44]

³⁹Tapi sampesuwu-sampesuwuku, kita e'i da'a tau-tau to nokanggaura pade rasuku sampe ri kasae-saena. Tapi kita tau-tau to nomparasaya Alatala pade mombarata katuwua mabelo sampe ri kasae-saena.