Read Da'a Kaili IBRANI 11 Bible Online

IBRANI 11 - Da'a Kaili bible

IBRANI 11

¹Nomparasaya batuana ninjanitamo nuapa to nisarumakata kana raratata, nariamo katantuna riara nta'ita ewa nuapa anu da'apa nikitata.

²Nggari pomparasaya ira totu'ata nggaolu nikonoa Alatala.

³Nggari pomparasayata ninjanita langi bo dunia nipajadi Alatala ante Tesana sampe nuapa to natekita najadi nggari anu da'a natekita.

⁴Nggari pomparasayana i Habel nanggeni ka Alatala pesomba to neliu nggabelo nggari pesomba tuakana i Kain. Nggari pomparasayana etu i Habel nitarima Alatala ewa tau nanoa sabana nanotomo pesombana nikonoa Alatala. [45] Pade naupa i'a namatemo, kita batena nipatuduki nggari jonjo pomparasayana.

⁵Nggari pomparasayana i Henokh da'a namate tapi niore Alatala nggari dunia e'i. I'a nielo-elo tapi da'a ria nirata ntau, sabana i'a niore Alatala nggari dunia e'i. Naria tesa ri Buku Nagasa to nompakanoto da'apa i Henokh niore, katuwuna nikonoa Alatala. [46]

⁶Toramo! Da'a ria kamba samba'a to namala nikonoa Alatala ane da'a ria pomparasayana, sabana isema-sema to madota mompakamosu Alatala kana momparasaya naria Alatala, pade momparasaya wo'u I'a mombawai rasi ka tau-tau to nangelo I'a ante mpu'u-mpu'u rarana.

⁷Nggari pomparasayana tempo i Nuh nipopanjani Alatala ewa kajadia to majadi anu da'apa sanggani nikita ntau, i'a natundu ri ja'ina bo nompowia sakaya bete ala mompakasalama ira saongu njapo. Ante iwetu pura-pura manusia ri dunia nipakasala tapi i Nuh mboto nireke Alatala nanoa sabana pomparasayana. [47]

⁸Nggari pomparasayana Abraham nantuki parenta Alatala tempo i'a nipokio Alatala malau mpaka ri tana to nijanji Alatala majadi bagiana. Nanggaliwomo i'a nggari ngatana mboto naupa da'apa ninjanina ri umba tana to rakalauna etu. [48]

⁹Nggari pomparasayana i'a neto'o ri tana to nijanji Alatala etu ewa topesowo sabana tana etu da'apa najadi bagiana. Ri setu i'a daneto'o ri tenda, pade wa'a wo'u Ishak bo Yakub, mulina to niwai Alatala ka janji to nasimbayu.

¹⁰Abraham nosabara neto'o iwetu sabana nisarumakana i'a kana meto'o ri ngata to naroo ri suruga banepia to niponia bo nipowia Alatala ante pondasi to da'a magero-gero.

¹¹Nggari pomparasayana Abraham bo rongona i Sara wo'u nombarata karoso ala momuli, naupa Abraham natu'amo bo i Sara nagampa. Etu najadi sabana ninjanina Alatala namala raparasaya mompakadupa pojanjina.

¹²Naupa Abraham neliu nggatu'amo i'a nomuli ka muli to nadea anu da'a namala rabila kadeana, nasimbayu ewa betu'e ri langi bo bone ri wiwi ntasi.

¹³Pura-pura tau to nitesaku ri ba'ana batena nomparasaya sampe namate. Da'apa nitarima ira nuapa to nijanji Alatala, tapi niparasaya ira etu kana ratarima muli ira banepia. Ira nompangaku dunia e'i da'a peto'o ira to nakonona, ira aga topesowo bo topenjayo ri dunia e'i.

¹⁴Tau to nanguli iwetu nompakanoto ira danangelo peto'o to majadi bagia ira mboto.

¹⁵Da'a tana to nipalasi ira bopia to nipolentora ira, sabana ane iwetu, nariamo loga ka ira manjili gu sa'a.

¹⁶Tapi kakonona ira nalentora ka ngata to neliu nggabelo, etumo ngata to naria ri suruga. Etu sampe Alatala da'a naeya matana ane niuli Alatala ira, sabana naria mami ngata to nipakasadiana ka ira.

¹⁷Nggari pomparasayana tempo Abraham niuji Alatala, i'a nasadia nombawai anana Ishak rasambale ewa pesomba ka Alatala. Bopia Alatala nojanji ka Abraham iwe'i: “Nggari Ishakmo pade komi mombarata muli to nijanjiku ka komi.” [49] Tapi naupa iwetu Abraham nasadia nombawai Ishak, anana samba'a lau, rasambale ewa pesomba ka Alatala.

¹⁹Nipekirina Alatala nompakule mompakatuwu bali Ishak nggari kamatena. Jadi namala rauli ewa Abraham nantarima bali anana to nipakatuwu Alatala bali nggari kamatena.

²⁰Nggari pomparasayana Ishak etu nombajanji ka anana Yakub bo Esau rasi to rawai ka ira tempo marata. [50]

²¹Pade nggari pomparasayana tempo Yakub mana masaeka mamate, i'a nombajanji rasi etu ka romba'a ana Yusuf. Pade i'a nompatuko ri lembauna nombatoiya bo nombabila Alatala. [51]

²²Nggari pomparasayana tempo Yusuf mana masaeka mamate, i'a nombaboto iwenu todea Israel kana mesuwu nggari tana Masir banepia. Pade i'a nombaboli tewai ewa nuapa rapowia ka watabakuna tempo ira mesuwu malai. [52]

²³Nggari pomparasaya indo uma i Musa tempo ana ira etu niote, i'a nitabuniaka ira tolumbula kasaena sabana nikita ira i'a samba'a ngana to nagayana. Da'a naeka ira nangewa parenta Magau Masir to nanguli butu mba'a ngana langgai to Israel kana rapatesi. [53]

²⁴Nggari pomparasayana tempo i Musa nabetemo, i'a da'a nadota rauli ana nu ana besi Magau Masir. [54]

²⁵Nipokononapa mombarasai kasusa bo kapari mpasanggani-nggani ante todea nu Alatala pade mombarasai kasana aga sampalai nggari katuwu nasilaka.

²⁶Nipekirina nabelopa i'a rasalai nasimbayu ewa Kristus to marata banepia pade mombarata pura-pura kakalumana ri tana Masir, sabana i'a bate nanjarumaka rasi to rawai Alatala ka i'a banepia.

²⁷Nggari pomparasayana i Musa da'a naeka nalai nggari tana Masir naupa narau mpu'u rara Magau Masir. Musa naroo nantuki dota i Pue nasimbayu ewa i'a nanggita Alatala to da'a natekita. [55]

²⁸Nggari pomparasayana i'a nompowia ada Paska pade niparentana ala lei nggari ana bimba to nisambale ragese ka pewobo sapo nto Yahudi, ala ne'e sampe ana ira mawela rapatesi tempo malaeka Alatala marata mompatesi ngana-ngana ulumbua ri tana Masir. [56]

²⁹Nggari pomparasaya ira, tau-tau to Israel namala nombawote Tasi Lei nasimbayu ewa nolumako ri kabatana. Tapi tempo to Masir nompasimbuku mewote, ira aga niome ntasi. [57]

³⁰Nggari pomparasaya tau-tau to Israel tembo ngata Yerikho nadungga naopu nitalili ira pitueo kasaena. [58]

³¹Pade nggari pomparasayana i Rahab, besi bajinga, da'a namate mpasanggani-nggani ante to Yerikho to da'a natundu ri ja'i Alatala, sabana i'a nantarima mata-mata to Israel ante nabelo. [59]

³²Sampesuwu-sampesuwuku, danadeapa jonjo ntanina to mamala kutesa tapi da'a nagana logaku mantesa mpakanoto ewa pomparasaya ira i Gidion, i Barak, i Simson, Yefta, i Daud, nabi i Samuel ante nabi-nabi ntanina. [60]

³³Nggari pomparasaya ira, naria ira nombadagi magau-magau. Naria ira nomparenta todeana ante nanoa, pade naria ira nantarima nuapa to nijanji Alatala ka ira. Naria ira nombalamu nganga nu singa.

³⁴Naria ira nompopaya apu to narega nju'u, pade naria ira nakabasaka nggari topetimbe. Tempo nalente naria ira nipakaroso bali. Naria ira najadi naroso riara posibali sampe ira nompakule nombadagi tantara-tantara to sangatana.

³⁵Pade naria besi-besi nanggita bali ana-ana ira to namate nipakatuwu bali. Tapi naria tau-tau ntanina to nompakamba koro ira niboba sampe namate. Ira da'a nadota rakabasaka nggari kasusa etu ala ira mamala rapakatuwu bali ante katuwua to neliu nggabelo.

³⁶Naria wo'u to nipongei-ngei bo niporo mpakandasa, pade naria to nibalanggu bo nisuaraka riara tarunggu.

³⁷Naria wo'u to nirempe watu sampe namate bo naria to nigaragaji mpakaputu, pade naria to nipatesi ante guma. Ira nalai-lai nangelo katuwua pade pakea ira aga kulimba nu bimba bo towau. Ira mpu'u-mpu'u nakabu, ira nipakasusa bo nipakasesa.

³⁸Ira nalai-lai ri karawa baina bo ri buluna. Ira aga neto'o ri bololia bo ri bolo-bolo ntana. Kakonona ewa dunia to naja'a e'i da'a masipato rapeto'o ira.

³⁹Ira pura-pura nikonoa Alatala sabana pomparasaya, naupa ira da'apa nantarima pura-pura nuapa to nijanji Alatala,

⁴⁰Sabana naria to neliu nggabelo to nipakasadia Alatala ka kita. Pade patujuna ala ira mompopea sampe kita pura-pura rapakagasa mpasanggani-nggani ante da'a ria pokainggu to nasalana.