Read Da'a Kaili IBRANI 12 Bible Online

IBRANI 12 - Da'a Kaili bible

IBRANI 12

¹Toramo, nadea mpu'u topomparasaya nantara kita. Sabana etu kamaimo kita mantajiaka pura-pura nuapa to nompakakaduku bo silaka to nagampa mpu'u nompule kita. Kamaimo kita mongowa ntutu riara posilumba to nipakatantu Alatala ka kita.

²Kamaimo kita mowia etu ante tunggai manggita Yesus, pu'u nu pomparasayata bo to nompakaroso pomparasaya etu sampe ri kaopuna. I'a naroo nanta'amaka kasusa bo kapari nipaku ri kayu parika ante da'a nompekiri eyana, sabana nitorana kadamba to nipakasadia ka I'a. Pade we'i-we'i I'a nekatoko ri peto'o to nibila ri panggana nu Alatala.

³Pekirimo I'a to naroo nanta'amaka rau rara nggari ja'i tau-tau nasilaka to nangewa I'a ala ne'e komi majadi malente bo maopu rara.

⁴Sampesuwu-sampesuwu, riara posibali komi mangewa silaka da'apa ria komi nandasa sampe nesuwu lei.

⁵Bara nikalinga komimo tesa nu Alatala nggari Buku Nagasa to niulina ala mompakaroso rara komi ewa ana-anana mboto iwe'i: “Anaku, ne'e manjapuaka pepatuduki i Pue. Ne'e maopu rara ane I'a mangontiaka komi.

⁶Sabana i Pue nompatuduki butu mba'a tau to nipotowena. I'a nombaporo butu mba'a tau to nipangakuna anana.” [61]

⁷Jadi komi kana maroo manta'amaka kasusa bo kapari to nirasai komi. Tarimamo etu ewa pepatuduki nggari ja'i Umamu Alatala, sabana I'a nanggita komi ewa anana mboto. Nariamo ngana da'a nipatuduki nu umana? Natantumo da'a!

⁸Tapi ane komi da'a nipatuduki nasimbayu ewa pura-pura ngana ntanina, batuana komi da'a ana ote, komi aga ana wone.

⁹Ntanina nggari etu, umata ri dunia nompatuduki kita pade kita nekou ri ja'i ira. Ane iwetu natantumo kita kana neliupa mekou ri ja'i Umata Alatala to nompajadi wayota ala kita matuwu mabelo.

¹⁰Umata ri dunia e'i nompatuduki kita sampalai nantuki nuapa to nireke ira nabelo. Tapi Alatala nompatuduki kita ala manggeni belo ka kita. Patujuna ala kita majadi magasa nasimbayu ewa I'a.

¹¹Tantu tempo kita nipatuduki kita da'a nadamba, tapi aga nasusa. Tapi ane kita mantarima pepatuduki etu, kaopuna kana maria aselena riara nggatuwuta, etumo kita matuwu mosinggabelo ante manoa rara.

¹²Sabana etu, sampesuwu-sampesuwu, pakaroo rara komi to nalente bo pakaroso pomparasaya komi to nogoya-goya.

¹³Tukimo jala to nakonona ala roa-roa komi to nalente pomparasaya ira da'a masalanjala, tapi majadi tau to maroso pomparasayana.

¹⁴Komi kana tunggai mompasimbuku matuwu mosinggabelo ante pura-pura tau. Pade pasimbuku wo'u matuwu magasa, sabana tau da'a nagasa katuwuna da'a ntoto mamala manggita i Pue.

¹⁵Jagaimo koro komi samba'a bo samba'a ala ne'e sampe maria tau to da'a madota mantarima towe belo nu Alatala. Ne'e sampe maria tau nomboli silaka riara nta'ina. Sabana ante iwetu ira majadi ewa kale to napa'ina ri tatongo komi. Ira aga mompopeumba posinggarau pade mompakatantoru todea.

¹⁶Ne'e sampe maria to mogau sala ante tau da'a rongona mboto, bo ne'e sampe maria to aga mompekiri kasana korona ri dunia bo da'a mompekiri dota nu Alatala nasimbayu ewa to nipowia Esau. I'a nompobalu rasi bo kabelona to majadi bagiana ewa ana ulumbua ante sanjuraya lau panggoni. [62]

¹⁷Ninjani komi mbotomo tempo i'a nerapi rasi etu nggari ja'i umana nggapuri i'a nipoara naupa i'a nerapi-rapi ante nageo. Sabana da'a niratana jala mombabali nuapa to nipowiana bopia.

¹⁸Sampesuwu-sampesuwu, nuapa to nirasaita to nantarima pojanji Alatala to nabou da'a nasimbayu ante nuapa to nirasai totu'ata nggaolu tempo Alatala nombawai Pojanjina Nggasae. Ira to Israel narata nantingayo sangele to namala raere, etumo Bulu Sinai ante apu to najela-jela. Ira nanggita karumauna to neliu-liu bo bara to neliu nggagai.

¹⁹Ira nangepe wamba kololio to nagai mpu'u bo suara notesa. Tempo ira nangepe suara etu naeka mpu'umo ira sampe ira nerapi ante mpu'u-mpu'u ala suara etu mana motesa ka ira. [63]

²⁰Sabana da'a namala ira nanta'amaka mangepe parenta to nitesa suara etu, iwe'i: “Ane maria komi bara binata komi marata mangere bulu e'i, i'a kana rarempe ante watu sampe mamate.” [64]

²¹Pura-pura nuapa to nikita ira ri setu mpu'u-mpu'u nompakawiora rara ira sampe i Musa nanguli, “Aku mpu'u-mpu'u naeka bo nolalete.” [65]

²²Tapi neliu nggabelopa to nirasaita to nantarima pojanji Alatala to nabou. Ewa kita narata ri Bulu Sion, ngata nu Alatala to Natuwuna, etumo ngata Yerusalem ri suruga. Kita nanggita njobu-njobu malaeka to nasiromu madamba-damba.

²³Pade kita nanggita todea topomparasaya i Pue Yesus to naria sanga-sanga ira nitulisi riara buku Alatala ri suruga. Kita nanggita Alatala, Topotangara pura-pura manusia. Pade kita nanggita wayo-wayo ntau nanoa to najadi nagasa.

²⁴Pade kita wo'u nanggita Yesus, Tau Ntongo to nombaurusi pojanji nabou etu. Pade kita nanggita leina to nipatiti to neliu nggabelo nggari lei i Habel. [66]

²⁵Jadi sampesuwu-sampesuwu, pakabelo-belo ala ne'e sampe komi da'a madota mangepe tesa to niuli Alatala ka komi. Sabana ane ira to da'a nadota mangepe pepatora Alatala nggari buluna ri dunia da'a nakabasaka nggari pesuku Alatala, neliu-liupa kita to nangepe I'a notesa nggari suruga. Ane kita da'a madota mangepe I'a, natantumo kita wo'u da'a makabasaka nggari pesukuna to marata.

²⁶Tempo nggaolu ri Bulu Sinai suara Alatala to nagai nombagagoya dunia. Tapi we'i-we'i I'a nojanji iwe'i: “Sangganipa banepia kana kugagoya dunia, pade da'a aga dunia tapi langi wo'u.” [67]

²⁷Tesana “sangganipa” etu nompakanoto pura-pura nuapa to nipajadina kana ragagoyana bo rapakalipona ala aga to da'a namala ragagoya to naboli.

²⁸Jadi etu sampe kita masipato manguli tarima kasi ka Alatala, sabana kita niwai loga majadi todea riara Poparentana to da'a ntoto namala ragagoya. Pade kamaimo kita mepue ka Alatala ante inggu to nompakadamba I'a, etumo ante maeka bo mekou ri ja'ina.

²⁹Sabana Alatalata kana mombasuku tau-tau to mompoara kabelona nasimbayu ewa apu to napane nju'u mompalabu mpakaopu tinalu.