Read Da'a Kaili IBRANI 13 Bible Online

IBRANI 13 - Da'a Kaili bible

IBRANI 13

¹Ne'e komi menonto mosipotowe samba'a bo samba'a ewa topomparasaya i Pue Yesus to nosampesuwu.

²Ne'e malinga rara mantarima torata anu da'a ninjani komi riara njapo komi, sabana ante nowia iwetu nariamo bara sakuya mba'a tau nantarima malaeka-malaeka i Pue riara njapo ira ante da'a ninjani-njani.

³Toramo tau-tau to nitarunggu nasimbayu ewa komi mboto wo'u nitarunggu mpasanggani-nggani ante ira. Pade toramo tau-tau to nipakasusa ntau, sabana ninjani komi mboto kasusa to nirasai ira.

⁴Porongo kana rabila ri tatongo komi pura-pura. Ne'e mompakatantoru porongomu ante mogau sala ante tau da'a rongomu mboto, sabana Alatala kana mombasuku tau to nogau sala ante tau da'a rongona mboto bo topebualo.

⁵Ne'e komi rapobatua nu doi, tapi komi kana madamba-damba ante nuapa-nuapa to naria ri ja'imu. Sabana Alatala nanguli iwe'i: “Aku da'a ntoto mompalamba komi atau mompalasi komi.” [68]

⁶Etu sampe kita mabia manguli iwe'i: “Pue topantulungi aku, jadi aku da'a maeka. Nuapa to mamala rapowia ntau ka aku?” [69]

⁷Pekirimo katuwu topanggeniaka-topanggeniaka agama komi to nanggeni Tesa nu Alatala ka komi bopia. Pariara nta'imo jonjo katuwu ira bo kamate ira, pade pasialamo pomparasaya ira.

⁸Toramo! Yesus Kristus batena nasimbayu, nabeloka tempo bopia, nabeloka we'i-we'i pade sampe ri kasae-saena.

⁹Ne'e komi rapakasalanjala ntau ante mantuki mpengele-ngele pepatuduki to nontani nggari pepatuduki to nakonona. Agina pomparasayata rapakaroso nggari towe belo nu Alatala, da'a nggari atura-atura ewa panggoni to masipato rakonita. Atura-atura etu da'a ntoto namala mantulungi kita.

¹⁰Naria meja mpesombata. [70] Tapi topanggeni agama to nanggeni pesomba ri Tenda Mpepue nantuki Atura-atura agama da'a namala ratulungi ri meja mpesomba etu.

¹¹Nantuki Atura-atura agama lei nggari binata to nisambale ewa pesomba kana nikeni Balengga Topanggeni Agama rapesomba riara Peto'o to Neliu Nggagasa riara Sapo Mpepue ala mombasompo silaka ntodea. Tapi watabaku nu binata etu kana nipalabu ri sawaliku ngata. [71]

¹²Etu nombagambara ka kita nuapa to najadi ante Yesus. I'a wo'u nikeni nipatesi ri sawaliku bobaa ngata Yerusalem ala I'a mamala mompakagasa topomparasaya I'a ante leina mboto.

¹³Sabana etu kamaimo kita maroo ri ja'i Yesus. Kamaimo kita wo'u rasalai nasimbayu ewa I'a nisalai.

¹⁴Sabana ri dunia e'i da'a ria peto'ota to naroo, tapi kita manjarumaka peto'o ntanina to neliu nggabelo ri suruga.

¹⁵Jadi sabana etu pura-pura, ante petulungi Yesus kamaimo kita tunggai manggeni pesombata ka Alatala, etumo tesata mombatoiya bo mombabila sangana.

¹⁶Tapi ne'e rakalingata mompowia to nabelona bo mositulungi, sabana etumo pesomba to nompakadamba rara nu Alatala.

¹⁷Tukimo parenta-parenta ntopanggeniaka-topanggeniaka komi pade pekoumo ri ja'i ira. Sabana iramo to nanggeniaka katuwu komi. Kana marata tempo banepia ira motarangga mpakanoto ri ja'i Alatala iwenu ira nanggeniaka komi. Jadi pekoumo komi ri ja'i ira ala ira mamala mantui bago etu ante madamba rara. Ane komi da'a mekou ri ja'i ira, ira aga masusa rara pade etu da'a manggeni kabelona ka komi.

¹⁸Sampesuwu-sampesuwu, posambayamo ka kami. Niparasaya kami rara nta'i kami nagasa. Riara mpengele-ngele kami batena madota mompowia nuapa to nanoana

¹⁹Kuperapi ka komi, posambayamo ala aku mamala masasinta rakeni Alatala manjili ri ja'i komi.

²⁰Alatala nompakatuwu bali Pueta Yesus nggari kamatena. I'amo Topoewu to nakuasa to nompoewu kita bimba-bimbana. Leina nipatiti nompakaasa pojanji Alatala ante kita to nalaku sampe ri kasae-saena. Perapi Alatala, pu'u katuwua nabelo mompakagana ka komi nuapa pura to nabelona ala komi mompakule mowia dotana. Perapi I'a manggeni komi mompowia to nikonoana ante petulungi nggari ja'i Yesus Kristus. I'amo to masipato ratoiyata bo rabilata sampe ri kasae-saena. Amin!

²²Sampesuwu-sampesuwu, aku merapi ka komi epemo ante mosabara tesa to nitulisiku e'i, sabana suraku e'i da'a wo'u nandateka.

²³Kana ranjani komi sampesuwuta i Timotius nikabasakamo nggari tarunggu. Ane i'a masasinta marata ri ja'iku, aku manggeni i'a mpasanggani-nggani momai manggita komi.

²⁴Pakasampe tabe kami ka pura-pura topanggeniaka komi pade ka pura-pura topomparasaya ri setu. Pade tarimamo tabe nggari ja'i topomparasaya-topomparasaya ri Propinsi Italia.

²⁵Perapi Pue mombagane komi pura-pura.