Read Da'a Kaili IBRANI 2 Bible Online

IBRANI 2 - Da'a Kaili bible

IBRANI 2

¹Jadi Yesus neliu nggalanga nggari malaeka-malaeka i Pue. Etu sampe kita kana manjoko mpakabelo-belo pepatuduki to niepeta ala ne'e kita masalanjala nggari jala to nakonona etu.

²Tesa to nipapola malaeka-malaeka i Pue ka totu'ata nggaolu nanoto mpu'u kakonona, pade isema-sema da'a nantuki tesa etu atau da'a natundu riara tesa etu nombarata pesuku to nasipatona.

³Ne'epa rauli Kareba Belo to nipatolele i Pue Yesus! Kareba etu neliu nggabelo nggari tesa to nipapola malaeka-malaeka nggaolu. Jadi ane kita da'a mompariara kareba etu iwenumo kita makabasaka nggari pesuku? Kareba etu pamulana nipatolele i Pue Yesus mboto, pade tau-tau to nangepe I'a nompakanoto ka kita kareba etu mpu'u-mpu'u nakono.

⁴Pade Alatala mboto nantakono tesa to nipatolele ira ante nompowia mpengele-ngele kabaraka bo tandai to nipogumaa, pade nompalele pompakule ka ira nggari Nosa Nagasana nantuki dotana mboto.

⁵Da'a malaeka-malaeka to nipakakuasa Alatala ala moparenta dunia nabou banepia to nitesata ri se'i.

⁶Tapi manusia to nipakakuasana. Naria tesa riara Buku Nagasa to nompakanoto etu iwe'i: “O Pue Alatala, nuapa ntoto kami manusia sampe Pue nantora kami? Naupa kami aga manusia, Pue nompiara kami.

⁷Sampalai lau kami nipowia Pue naede sakedi nggari malaeka. Kami niwai Pue ka pekatoko to nakuasa bo nibila.

⁸Pade kami niwai Pue ka kuasa ala momparenta pura-pura nuapa to naria.” [8] Jadi ane niuli, “Kami niwai Alatala ka kuasa ala momparenta pura-pura nuapa to naria,” etu batuana da'a ria sangele anu da'a niwaina rakuasai manusia. Tapi we'i-we'i da'apa nikitata manusia nomparenta pura-pura nuapa to naria.

⁹Tapi to nikitata iwe'i: Yesus sampalai nipakaede sakedi nggari malaeka ala nggari towe belo nu Alatala I'a mamate manjaliku manusia. Pade we'i-we'i nikitata I'a niwai ka pekatoko to nakuasa bo nibila sabana I'a nasadia nasusa bo napari sampe namate.

¹⁰Etu najadi sabana etumo to masipato ante dota nu Alatala. I'amo to nompajadi mpengele-ngele, pade etu pura-pura bagiana. I'a nompakamba Yesus mombarasai kasusa bo kapari sampe majadi Topanggeniaka to da'a ria kakurana to mompakule mompakasalama manusia. Ante iwetu I'a mamala manggeni nadea tau mombarata bagia riara kuasa bo kagayana to nipogumaa.

¹¹Yesus nompegasa kita nggari silakata. Pade kita to nipegasa bo I'a to nompegasa kita aga samba'a lau Umata. Etu sampe Yesus da'a naeya matana nompangaku kita sampesuwuna.

¹²I'a nanguli ka Alatala iwe'i: “Aku kana mompatolele karebamu ka sampesuwu-sampesuwuku. Aku mombatoiya sangamu ri tatongo kasiromu todeamu.” [9]

¹³Pade niuli Yesus wo'u iwe'i: “Aku manjarumaka Pue Alatala.” [10] Pade sangganipa niulina iwe'i: “E'imo Aku nosanggani-nggani ante ngana-ngana to niparasaya Alatala ka Aku.” [11]

¹⁴Kita to niuli Yesus anana, manusia biasa ante koro to mamate. Jadi etu sampe Yesus wo'u najadi manusia pade nombarasai pura-pura nuapa to nirasaita. Etu nipowiana ala nggari kamatena I'a mamala mompakaropu kuasa Magau nu Seta to nombakuasai kamatea.

¹⁵Ante jala iwetu I'a nombakabasaka tau-tau to nipobatua eka rara ira mamate sanggasae-saena ira natuwu ri dunia e'i.

¹⁶Nanotomo da'a malaeka to nitulungina, aga muli Abraham.

¹⁷Etu sampe I'a kana najadi nasimbayu pura ante sampesuwu-sampesuwuna. Ante iwetu I'a namala majadi Balengga Topanggeni Agama to naasi matana manggita todeana, pade to natutu nompowia bago to niwai Alatala ka I'a sampe silaka manusia mamala raampungi.

¹⁸I'a mboto nombarasai kasusa bo kapari tempo I'a nipesoba. Etu sampe I'a nompakule mantulungi tau-tau to nipesoba.