Read Da'a Kaili IBRANI 3 Bible Online

IBRANI 3 - Da'a Kaili bible

IBRANI 3

¹Sampesuwu-sampesuwuku, nagasamo katuwumu bo komi to nipokio Alatala matuwu mabelo ri suruga. Sabana etu pekirimo mpakabelo-belo Yesus e'i. I'a nisuro Alatala najadi Balengga Topanggeni Agama ri agama to nipangakuta.

²I'a natutu nompowia nuapa to nipakatantu Alatala ka I'a nasimbayu ewa nabi i Musa natutu nantulungi todea to Yahudi to najadi ananjapo nu Alatala.

³Tapi neliu nibilapa Yesus nggari i Musa nasimbayu ewa topowia sapo neliu nibilapa nggari sapo to nipowiana.

⁴Butu-butu sapo, naria topowiana. Tapi topowia mpengele-ngele I'amo Pue Alatala mboto.

⁵Ane i Musa, i'a natutu nantulungi ananjapo nu Alatala ewa samba'a batua. I'a nantesa ka ira nuapa to rapatolele banepia.

⁶Tapi Kristus Ana nu Alatala to natutu nombaurusi pura-pura ananjapo nu Alatala. Pade kita majadi ananjapona ane kita maroo momparasaya bo maroo manjarumaka I'a ante madamba rara sampe ri kaopuna.

⁷Jadi epemo tesa nggari ja'i Nosa Nagasa nu Alatala to nanguli iwe'i: “Ane komi mangepe suara Alatala eo e'i,

⁸ne'e komi mompakako'o rara nasimbayu ewa totu'amu nggaolu tempo ira nangewa Aku ri karawa baina. Naupa ira batena nanggita kabaraka-kabaraka to nipowiaku patampulu mpae kasaena, ira batena nompesoba bo nombauji Aku.

¹⁰Etu sampe narau mpu'u raraku ri ja'i ira pade Aku nanguli, ‘Ira bate-batena nasalanjalamo, da'a nadota mantuki jalaku.’

¹¹Nabilisi mpu'u raraku sampe Aku nojanji iwe'i: ‘Ira da'a ntoto mamala mangosaraka mpasanggani-nggani ante Aku.’ ” [12]

¹²Jadi sampesuwu-sampesuwuku, komi kana mainga ala ne'e sampe maria ri tatongo komi tau to naja'a pekirina bo da'a nomparasaya sampe i'a mombasapu Alatala to Natuwuna.

¹³Tapi eo-eo komi kana mosipakaroso rara samba'a bo samba'a tempo danaria loga to niuli “eo e'i” riara tesa Buku Nagasa. Ne'e sampe komi majadi mako'o rara sabana nibagiu nu silaka.

¹⁴Ane kita batena momparasaya Alatala ante maroo rara sampe ri kaopuna nasimbayu ewa kita naroo nomparasaya ri pamulana, kita kana mombarata bagia nggari pura-pura nuapa to naria ri ja'i Kristus.

¹⁵Etumo to nipatuju tesa to niuli ri ba'ana iwe'i: “Ane komi mangepe suara Alatala eo e'i, ne'e komi mompakako'o raramu nasimbayu ewa totu'amu nggaolu tempo ira nangewa Aku.” [13]

¹⁶Jadi isema to nangepe suara Alatala? Isema to nompakarau rarana ante nangewa I'a? Etumo pura-pura to Yahudi to nikeni i Musa nesuwu nggari tana Masir.

¹⁷Pade isema to nipokarau rara Alatala patampulu mpae kasaena? Natantumo ira etu wo'u to nowia silaka ri karawa baina sampe namate ri setu.

¹⁸Isema to nipatuju Alatala tempo I'a nojanji ira da'a ntoto mamala mangosaraka mpasanggani-nggani ante I'a? Natantumo ira to da'a natundu ri ja'ina.

¹⁹Jadi nanotomo ka kita ira da'a namala nangosaraka mpasanggani-nggani ante Alatala sabana ira da'a nomparasaya.