Read Da'a Kaili IBRANI 4 Bible Online

IBRANI 4 - Da'a Kaili bible

IBRANI 4

¹Sampesuwu-sampesuwu, pojanji Alatala etu danalaku pade kita danamala mangosaraka mpasanggani-nggani ante I'a. Etu sampe kita kana mainga ala ne'e maria nggari tatongo komi to nireke naboli.

²Sabana kita wo'u nangepe Kareba Belo nu Alatala nasimbayu ewa ira totu'ata nggaolu. Tapi kareba to niepe ira da'a ria gunana ka ira, sabana ira aga nangepe bayangi, da'a niparasaya ira kareba etu.

³Tapi kita to nomparasayamo to namala mangosaraka mpasanggani-nggani ante Alatala, da'a ira. Sabana naria to niulina iwe'i: “Nabilisi mpu'u raraku sampe Aku nojanji iwe'i: ‘Ira da'a ntoto mamala mangosaraka mpasanggani-nggani ante Aku.’ ” [14] Ira da'a nombarasai kabelo nu pangosaraka Alatala naupa etu nasadiamo nggari lamba pamulana naopu Alatala nompajadi langi bo dunia.

⁴Nanotomo pangosaraka etu nasadia, sabana naria tesa ri Buku Nagasa to nanguli ewa eo kapapituna iwe'i: “Ri eo kapapituna Alatala nangosaraka nggari pura-pura bagona.” [15]

⁵Ri tesa to naria ri ba'ana Alatala nanguli, “Ira da'a ntoto mamala mesua mangosaraka mpasanggani-nggani ante Aku.”

⁶Jadi nggari tesa etu nanotomo danaria loga ka tau ntanina mangosaraka mpasanggani-nggani ante Alatala. Sabana tau-tau pamulana to nangepe Kareba Belo etu da'a nombarasai kabelo nu pangosaraka Alatala etu, sabana ira da'a nomparasaya.

⁷Jadi etu sampe Alatala nompakatantu loga ntanina to niulina “eo e'i” ala manusia mamala mangosaraka mpasanggani-nggani ante I'a. Sangga naliu bara sakuya atu mpae Alatala notesa ewa etu nggari sumba i Daud riara tesa to nitulisiku ri ba'ana iwe'i: “Ane komi mangepe suara Alatala eo e'i, ne'e komi mompakako'o rara.” [16]

⁸Tempo nokolu Yosua nanggeni totu'ata nesua ri tana Kanaan to nijanji Alatala. Ane rapana etu nireke nesua mangosaraka mpasanggani-nggani ante Alatala, natantumo Alatala da'a notesa nggapurina ewa loga ntanina mangosaraka mpasanggani-nggani ante I'a.

⁹Jadi danaria loga ka kita todea nu Alatala mangosaraka mpasanggani-nggani ante I'a nasimbayu ewa I'a nangosaraka ri eo kapapituna.

¹⁰Nanotomo etu sabana isema-sema to nangosaraka mpasanggani-nggani ante Alatala nenontomo nggari bagona nasimbayu ewa Alatala wo'u nenonto nggari pura-pura bagona.

¹¹Sabana etu kamaimo kita mompasimbuku ante mpu'u-mpu'u rarata mangosaraka mpasanggani-nggani ante Alatala. Ne'e sampe maria nau aga samba'a to da'a mamala mombarasai kabelona etu sabana da'a nomparasaya nasimbayu ewa totu'ata nggaolu.

¹²Tesa nu Alatala tesa to natuwu bo nakuasa. Tesa etu neliu nggataja nggari guma to nomata ntimali. Nasimbayu ewa guma to nataja namala mantosu sampe riara mpu'u, Tesa nu Alatala mesua riara nta'ita sampe ri panta'a nosa bo wayo pade posidumpa nu wuku bo unto nu wuku. Tesa etu namala mombabuka bo momparesa pekiri bo patuju rara nta'ita.

¹³Da'a ria kamba sangele to nipajadi Alatala to natetabuniaka nggari panggitana, tapi etu pura-pura natebuka bo nanoto ka I'a. Pade ri ngayona banepia kita kana mompangaku pura-pura pokaingguta.

¹⁴Jadi kita kana maroo manjoko pomparasaya to nipangakuta, sabana naria Balengga Topanggeni Agama to nalanga katuwuna to nesua sampe ri ngayo Alatala ri suruga ala mantulungi kita, etumo Yesus, Ana nu Alatala.

¹⁵I'a Balengga Topanggeni Agama to nangginjani kalenteta, sabana I'a wo'u nombarasai pesoba-pesoba nasimbayu ewa kita. Aga I'a da'a sanggani nidagi pesoba sampe nasilaka.

¹⁶Sabana etu, kamaimo kita ante mabia mompakamosu Alatala to noparenta ante towe belona ala kita mamala rapoasi matana bo mombarata towe belona mantulungi kita tempona raparaluuta.