Read Da'a Kaili IBRANI 5 Bible Online

IBRANI 5 - Da'a Kaili bible

IBRANI 5

¹Butu mba'a Balengga Topanggeni Agama nipelisi nggari tatongo todea pade nionggotaka majadi wakele ira ri ngayo Alatala. Bagona etumo manggeni ka Alatala pewai-pewai bo pesomba-pesomba to majadi posompo silaka.

²I'a namala nantulungi ante nalusu rara tau-tau to nabodo bo nasalanjalamo, sabana i'a mboto wo'u manusia to nadea kalentena.

³Etu sampe i'a kana manggeni pesomba ka Alatala mombasompo silaka, nabeloka silakana mboto, nabeloka silaka todea.

⁴Da'a ria samba'a to nangonggotaka korona mboto majadi Balengga Topanggeni Agama, tapi i'a kana nipokio bo nionggotaka Alatala, nasimbayu ewa i Harun nggaolu nipokio bo nionggotaka Alatala najadi Balengga Topanggeni Agama to Yahudi.

⁵Iwetu wo'u Kristus. I'a da'a nangonggotaka korona mboto majadi Balengga Topanggeni Agama to nibila. Tapi I'a nipokio bo nionggotaka Alatala mboto. Etu nanoto nggari tesa Alatala to nanguli iwe'i: “Ikomo Anaku, eo e'i Aku najadi Umamu.” [17]

⁶Pade niulina wo'u ri ayat ntanina iwe'i: “Iko Topanggeni Agama sampe ri kasae-saena, nasimbayu ewa i Melkisedek.” [18]

⁷Tempo Yesus natuwu ri dunia I'a nosambaya ante ue mata bo nekakai merapi tulungi ka Alatala to namala manggabasaka I'a nggari kamatena. Pade posambayana niepe Alatala sabana I'a tunggai nekou ri ja'ina.

⁸Naupa Yesus Ana nu Alatala, I'a neguru natundu ri ja'i Alatala nggari kasusa bo kapari to nirasaina.

⁹Sangga naganapa pura-pura etu nirasaina, I'a najadi pu'u katuwua nabelo sampe ri kasae-saena ka pura-pura tau to natundu ri ja'ina.

¹⁰Pade I'a nionggotaka Alatala najadi Balengga Topanggeni Agama nasimbayu ewa i Melkisedek, topanggeni agama nggaolu. [19]

¹¹Danadea to miki kutesa ka komi ewa kasimbayu Kristus ante i Melkisedek, tapi etu nakaja ratarangga sabana nakumba mpu'u pompaha komi.

¹²Kakonona temponamo komi majadi guru mompatuduki tau ntanina, sabana nasaemo komi nomparasaya i Pue Yesus. Tapi komi danomparaluu guru mompatuduki ka komi pepatuduki pamulana nggari Tesa nu Alatala. Komi da ewa ngana nggedi, da'apa namala nanggoni panggoni to nako'o-ko'o. Komi danantomi!

¹³Isema-sema danantomi batuana danangana. Da'apa ninjanina mompoposisala nuapa to nakonona bo to nasalana.

¹⁴Tapi panggoni to nako'o-ko'o aga nikoni ntau to nabetemo, etumo tau to nabiasamo nombalati korona mompoposisala nuapa to nabelona bo to naja'ana.