Read Da'a Kaili IBRANI 6 Bible Online

IBRANI 6 - Da'a Kaili bible

IBRANI 6

¹Jadi sampesuwu-sampesuwu, ne'e mana kita aga mompekiri pepatuduki pamulana ewa Kristus. Tapi kamaimo kita meguru kapola nu pepatuduki Kristus sampe kita mantambai manoto riara pomparasayata. Ne'e mana kita mombasili pepatuduki pamulana ewa majea nggari pokainggu to naja'a to da'a ria gunana pade momparasaya Alatala.

²Ne'e mana kita mombasili pepatuduki ewa ada mpediu, atau pepatuduki ewa mombadika pale ri balengga ntau ala ira rapesua Nosa Nagasa nu Alatala. Ne'e mana kita mombasili pepatuduki ewa tau namate matuwu bali atau pepatuduki ewa pesuku sampe ri kasae-saena.

³Tapi kamaimo kita meguru kapola nu pepatuduki Kristus. Pade ane i Pue mompaloga, etumo to rapowiata!

⁴Toramo, sampesuwu-sampesuwu, da'a ria jala manggeni tau majea bali ane ratunggai ira mokanggaura momparasaya. Sabana bopia ira natuwu riara reme nu Alatala. Nitarima iramo rasi nggari suruga, pade ira wo'u nipesua Nosa Nagasa nu Alatala.

⁵Nirasai iramo kabelo Tesa nu Alatala pade nikita ira baraka to nabete to nasimbayu ewa baraka to mana'u ri dunia banepia.

⁶Ane ira mokanggaura momparasaya naupa etu pura-pura nirasai ira, da'a ria jala manggeni ira majea bali nggari silaka ira. Sabana ante powia ira etu ewa ira mombapaku bali Ana nu Alatala ri kayu parika, pade ira manjalai I'a ri ngayo ntau dea.

⁷Tau ewa etu nasimbayu ka porapa e'i. Tana to nadea nggani nawela uja pade nombawai asele to noguna ka topokarajaa riarana, tana etu kana ragane Alatala.

⁸Tapi ane tana etu aga nikatuwu nu jono bo karui, da'a ntoto ria gunana. Tana etu mana masaeka rajanjiaka Alatala. Pade kaopuna tana etu kana rapalabu mpakaopu.

⁹Tapi, sampesuwu-sampesuwu to nipotoweku, naupa kami notesa iwetu, niparasaya kami komi da'a noinggu iwetu. Niparasaya kami naria pokainggu to neliu nggabelo ri ja'i komi, etumo pokainggu to masipato ka tau to nipakasalama.

¹⁰Alatala da'a nadenggo rarana, I'a da'a manggalinga powia bo pepotowe komi to nipopokita komi ka I'a ante mantulungi topomparasaya i Pue Yesus, nompamula nggari tempo bopia sampe we'i-we'i.

¹¹To nipodota kami ala komi samba'a bo samba'a batena mabati mowia etu sampe ri kaopuna ala komi mamala mantarima pura-pura nuapa to nisarumaka komi.

¹²Ne'e sampe komi masondo rara, tapi pasialamo jonjo ntau to nomparasaya ante nosabara sampe ira nombarata nuapa to nijanji Alatala.

¹³Tempo Alatala nombawai pojanji ka Abraham, I'a nojanji ante nanguli sangana mboto, sabana da'a ria to neliu nggalanga nggari I'a.

¹⁴Niulina, “Natantumo Aku kana mombagane iko, bo mompakadea mulimu.” [20]

¹⁵Jadi sangga Abraham nompopea ante nosabara, nitarimanamo nuapa to nijanji Alatala ka i'a.

¹⁶Ane manusia nojanji ira nanguli sanga to neliu nggalanga nggari koro ira mboto, pade etu nompakaroso tesa ira bo nompopenonto pura-pura tesa ntau to nombasapuaka tesa etu.

¹⁷Iwetu wo'u ante Alatala. I'a madota mompopokita ka tau to masipato mantarima nuapa to nijanjina pojanjina etu natantumo, da'a ntoto mabali. Jadi nipakarosona pojanjina ante nojanji.

¹⁸Rongele etu da'a namala mabali. Alatala da'a ntoto nodawa ewa pojanjina etu to nipowiana ante nojanji. Patujuna nojanji iwetu ala kita to nekalendu ri ja'ina mamala rapakaroso rara sampe kita maroo manjarumaka nuapa to nijanjina etu.

¹⁹Panjarumakata to natantuna etu nasimbayu ewa balango sakaya to naroso bo naroo. Pade nggari panjarumakata etu kita mamala mompakamosu Alatala nasimbayu ewa Balengga Topanggeni Agama namala mombaliunaka kae powombo mesua riara Peto'o to Neliu Nggagasa riara Sapo Mpepue. Da'a nabali panjarumakata sabana to nisarumakata Alatala mboto. I'a naria ri peto'o to neliu nggagasa ri suruga, pade

²⁰Yesus nokolu nesua ri setu ala mompakasadia jala ka kita. I'a nionggotaka najadi Balengga Topanggeni Agama nasimbayu ewa i Melkisedek sampe ri kasae-saena.