Read Da'a Kaili IBRANI 7 Bible Online

IBRANI 7 - Da'a Kaili bible

IBRANI 7

¹Melkisedek e'i Magau ngata Salem bo topanggeni agama nu Alatala to Neliu Nggalanga. Tempo Abraham nanjili nggari posibali nombadagi magau-magau, i Melkisedek nalau nosirata ka Abraham pade nombagane i'a.

²Naopu etu Abraham nombabagi ka i Melkisedek sabagia nggari sampulu bagia mbara-mbara to niagona nggari ja'i magau-magau. [21] Sanga Melkisedek etu, batuana “Magau to Nanoana,” pade i'a wo'u Magau ngata Salem to naria batuana “Magau to Nanggeni Posinggabelo.”

³Melkisedek da'a ria uma indona atau totu'ana nggaolu. Katuwuna da'a ria pamulana atau kaopuna. I'a nasimbayu ewa Ana nu Alatala, pade i'a batena topanggeni agama sampe ri kasae-saena.

⁴Jadi pekirimo kabete i Melkisedek e'i. Abraham, uma ntotu'ata nggaolu nombawai ka i'a sabagia nggari sampulu bagia nggari mbara-mbara to niagona nggari ja'i magau-magau to nidagina.

⁵Nantuki Atura-atura agama to nipapola i Musa muli i Lewi to najadi topanggeni agamamo to masipato mombarata sabagia nggari sampulu bagia nggari pombarata nu todea to Yahudi. Naupa ira pura-pura muli Abraham, nantuki Atura-atura agama aga topanggeni agamamo to masipato mangala etu nggari ja'i sampesuwu-sampesuwu ira to Yahudi. [22]

⁶Tapi naupa i Melkisedek da'a muli i Lewi i'a nombarata sabagia nggari sampulu bagia nggari mbara-mbara to niago Abraham nggari ja'i magau-magau etu, pade i'a nombagane Abraham, tau to niwai ka pojanji nu Alatala.

⁷Ninjanita pura-pura tau to nigane neliu nggaede nggari tau to nombagane i'a.

⁸Ane topanggeni-topanggeni agama Yahudi to nantarima sabagia nggari sampulu bagia, ira manusia biasa to namate. Tapi nantuki Buku Nagasa i Melkisedek, to niwai Abraham ka sabagia nggari sampulu bagia, da'a namate tapi batena natuwu.

⁹Lewi totu'a nu pura-pura topanggeni agama to masipato mantarima sabagia nggari sampulu bagia nggari todea to Yahudi. Tapi naupa i'a da'apa nesuwu tempo Abraham nombawai sabagia nggari sampulu bagia ka i Melkisedek, namala rauli ewa i Lewi mboto wo'u nombawai sabagia nggari sampulu bagia tempo etu.

¹⁰Sabana i'a nariamo riara koro totu'ana Abraham tempo i Melkisedek nosirata ka Abraham.

¹¹Ante pekeniaka topanggeni-topanggeni agama muli i Lewi Atura-atura agama niwai ka todea to Yahudi. Tapi ira da'a namala nanggeni manusia majadi tau da'a ria salana riara mpanggita Alatala. Jadi etu sampe paraluu raonggotaka Balengga Topanggeni Agama ntanina to nasimbayu ewa i Melkisedek, da'a ewa i Harun muli i Lewi etu to najadi Balengga Topanggeni Agama Yahudi pamulana.

¹²Jadi ane topanggeni-topanggeni agama nisambei, natantumo batuana atura-atura to nipajala ira wo'u kana rasambei.

¹³Balengga Topanggeni Agama to nipatuju ri tesa pane'a I'amo Pueta. Ninjanita pura-pura I'a da'a muli i Lewi tapi I'a muli Yehuda. Pade da'a ria muli Yehuda to najadi topanggeni agama. Da'a ria sanggani i Musa nanguli muli-muli Yehuda majadi topanggeni agama.

¹⁵Nuapa to niuli kami ri ba'ana neliu ngganoto sabana we'i-we'i nariamo Balengga Topanggeni Agama ntanina to nasimbayu ewa i Melkisedek.

¹⁶I'a nionggotaka najadi topanggeni agama da'a nantuki atura-atura nggasae to nompakatantu muli isema to masipato majadi topanggeni agama. Tapi I'a nionggotaka nantuki katuwuna to nakuasa to da'a ria kaopu-opuna.

¹⁷Sabana riara Buku Nagasa naria tesa to nanguli iwe'i: “Iko topanggeni agama sampe ri kasae-saena nasimbayu ewa i Melkisedek.” [23]

¹⁸Jadi we'i-we'i Atura-atura agama nggasae nisambei Alatala sabana da'a ria kuasana bo da'a ria gunana.

¹⁹Sabana Atura-atura agama da'a ntoto namala manggeni kita majadi tau da'a ria salana riara mpanggita Alatala. Tapi we'i-we'i nariamo sangele jala to neliu nggabelo to nisarumakata. Ante manjarumaka jala etu kita mamala mompakamosu Alatala.

²⁰Da'a aga etu, tapi tempo Yesus nionggotaka najadi Balengga Topanggeni Agama etu nipowia Alatala ante nojanji. Tempo ira muli i Lewi nionggotaka najadi topanggeni agama, Alatala da'a nojanji.

²¹Tapi tempo Yesus nionggotakana I'a nojanji. Niulina ka Yesus iwe'i: “Aku nojanji pade da'a ntoto mabali pekiriku, Iko topanggeni agama sampe ri kasae-saena.” [24]

²²Ante iwetu nanotomo Yesus najadi panjokota to nompakatantu pojanji Alatala nabou to neliu nggabelo kana madupa.

²³Pade naria sangelepa. Muli i Lewi to najadi topanggeni agama kana madea, sabana ira kana mamate samba'a bo samba'a sampe da'a namala mompapola bago ira.

²⁴Tapi Yesus batena natuwu. Etu sampe I'a batena nobago ewa topanggeni agama. Bagona da'a nolinja ka tau ntanina.

²⁵Jadi etu sampe I'a namala mompakasalama sampe ri kasae-saena tau to nompakamosu Alatala ante momparasaya I'a, sabana Yesus batena naroo nanjaliku ira ri ngayo Alatala.

²⁶Jadi Yesus Balengga Topanggeni Agama to masipato ka kita. I'a nagasa, da'a ntoto ria salana atau silakana. I'a natepatani nggari ja'i tau-tau nasilaka pade neore sampe ri peto'o to neliu nggalanga ri suruga.

²⁷I'a da'a nasimbayu ewa Balengga Topanggeni Agama ntanina. Ira eo-eo kana manggeni pesomba mombasompo silaka ira mboto ruru, pade ira mamala manggeni pesomba mombasompo silaka ntodea. Tapi Yesus nanggeni pesomba sanggani lau sampe ri kasae-saena tempo I'a nombawai korona mboto rapatesi manjaliku manusia. [25]

²⁸Jadi nikitata, nantuki Atura-atura agama to nipapola i Musa tau to nalente bo nasilaka nionggotaka najadi Balengga Topanggeni Agama. Tapi nggapurina nantuki tesa nu Alatala to niulina ante nojanji, Anana mboto nionggotakana najadi Balengga Topanggeni Agama to da'a ntoto ria kakurana nuapa-nuapa sampe ri kasae-saena.