Read Da'a Kaili IBRANI 8 Bible Online

IBRANI 8 - Da'a Kaili bible

IBRANI 8

¹Patuju to napokona riara tesaku etu iwe'i: Naria mamimo Balengga Topanggeni Agama ewa etu ri ja'ita. I'a nekatoko ri peto'o to nibila ri panggana nu Alatala to Neliu Nggakuasa ri suruga.

²I'a nantui bago ewa Balengga Topanggeni Agama ri Peto'o to Neliu Nggagasa, etumo ri Tenda Mpepue to nakonona ri suruga to nipowia Alatala da'a manusia.

³Butu mba'a Balengga Topanggeni Agama nionggotaka ala manggeni pewai bo pesomba ka Alatala. Jadi Yesus wo'u kana manggeni pesomba ka Alatala.

⁴Ane rapana I'a ri dunia e'i, I'a da'a ntoto majadi topanggeni agama, sabana nariamo topanggeni agama to nanggeni pesomba ka Alatala nantuki Atura-atura agama to nipapola i Musa.

⁵Bago to nipowia ira kakonona aga gambara bo wayo nggari akala mepue ka Alatala ri suruga. Etu sampe tempo nabi i Musa nggaolu nasadia nompowia Tenda Mpepue ri karawa baina, Alatala nompopatora ka i'a iwe'i: “Toramo! Iko kana mompowia pura-pura etu nantuki jonjo to nipopokita ka iko ri bunggu nu buluna.” [26]

⁶Tapi Yesus nombarata bago ewa topanggeni agama to neliu nggabelo nggari bago topanggeni agama ri dunia e'i to nantuki pojanji nggasae. Pade iwetu wo'u pojanji nabou to niurusina ri olo Alatala bo manusia neliu nggabelo nggari pojanji nggasae, sabana pojanji to nabou nikawia nantuki janji-janji to neliu nggabelo.

⁷Ane rapana pojanji pamulana etu da'a ria kakurana, tantu etu da'a paraluu rasambei ante pojanji karongelena.

⁸Tapi Alatala mboto nanggita todea to Yahudi da'a nompakule nantuki pojanji nggasae. Etu sampe niulina iwe'i: “Toramo! Kana marata tempo banepia Aku mompowia pojanji nabou ante todea Israel bo Yehuda.

⁹Pojanji etu da'a masimbayu ewa pojanji nggasae to nipowiaku ante totu'a ira nggaolu tempo Aku nombanini ira nesuwu nggari tana Masir. Ira da'a naroo nantuki pojanji etu. Jadi etu sampe Aku mana nompeili ira.

¹⁰Tapi iwe'imo pojanji to kupowia ante todea Israel ri tempo marata etu: Aku kana mombaboli Atura-aturaku riara pekiri ira, bo mantulisi etu riara nta'i ira. Aku majadi Alatala ira pade ira majadi todeaku.

¹¹Pade ira mana paraluu mompatuduki roa-roa bo sampesuwu-sampesuwu ira mosinjani ante Alatala, sabana ira pura-pura, nabeloka totu'a, nabeloka ngana, kana mosinjani ante Aku.

¹²Aku kana mombaampungi sala ira, pade silaka-silaka ira mana kutora.” Iwetumo panguli i Pue. [27]

¹³Ante notesa ewa pojanji to nabou, Alatala nompakanoto pojanji nggasae mana nalaku. Pade nuapa to natu'a bo mana nalaku natantumo mana masaeka malipo.