Read Da'a Kaili IBRANI 9 Bible Online

IBRANI 9 - Da'a Kaili bible

IBRANI 9

¹Riara pojanji Alatala nggasae naria atura-atura to nompakatantu akala mepue ka Alatala, pade naria wo'u peto'o mpepue to nipowia manusia.

²Saongu tenda nipataka, riarana naria rontombi. Ri tombi sawalikuna naria peto'o mpoindo bo meja ante roti to nipesomba ka Alatala. Tombi etu niuli Peto'o to Nagasa. [28]

³Pade riara kae powombo karobalana naria tombi to niuli Peto'o to Neliu Nggagasa. [29]

⁴Ri tombi etu naria meja mpotunju wongi to nipowia nggari bulawa bo naria wo'u Peti Pojanji to nilapi pura ante bulawa. Riara Peti etu naria kura nikawia nggari bulawa pomboli panggoni “manna,” bo lembau i Harun to nosulu, bo rongu watu to nabemba nitulisi parenta-parenta Alatala. [30]

⁵Pade ri bunggu nu Peti Pojanji etu naria to nipowia mpolenje romba'a malaeka to niuli Kerub to nombagambara karia nu Alatala ri setu. Kapi ira nompakaulu tutu nu Peti etu to niuli peto'o pantolo silaka. Tapi etu pura-pura da'a namala ratesa mpakanoto we'i-we'i. [31]

⁶Iwetumo akala nompakasadia tombi riara Tenda Mpepue. Eo-eo topanggeni-topanggeni agama nesua ri tombi sawalikuna ala mantui bago ira. [32]

⁷Tapi aga Balengga Topanggeni Agama njamba'ana to namala mesua ri tombi karontombina to niuli Peto'o to Neliu Nggagasa, pade etu aga sanggani sampae. Tempo mesua i'a kana manggeni lei to rapesombana mombasompo silakana mboto bo silaka to nipowia todea ante da'a nitunggai. [33]

⁸Nggari atura etu Nosa Nagasa nu Alatala nompakanoto ka kita iwe'i: ane danaria Tenda Mpepue pamulana etu, batuana da'apa nibuka jala mesua sampe ri ngayo Alatala ri Peto'o to Neliu Nggagasa.

⁹Etu nombagambara tempo we'i-we'i. Pewai-pewai bo pesomba-pesomba to nipesomba ntau nantuki atura-atura pojanji nggasae da'a namala mompakagasa rara nta'i topesomba etu sampe ira masipato mesua mantingayo Alatala.

¹⁰Pura-pura etu aga nosinggawela ante panggoni, panginu bo mpengele-ngele ada mompegasa koro. Etu atura-atura to nosinggawela ante korota, da'a rara nta'ita, pade aga nalaku sampe marata tempona Alatala mompowia pojanji nabou.

¹¹Tapi Kristus narata ewa Balengga Topanggeni Agama to nanggeni kabelona to nirasaita mamimo. I'a noliu riara Tenda Mpepue to neliu nggabete bo neliu nggabelo nggari tenda mpepue ri dunia e'i, pade nesua ri Peto'o to Neliu Nggagasa ri suruga. Tenda Mpepue etu da'a nipowia mpale manusia, etu da'a nopu'u nggari dunia e'i. Tempo Kristus nesua ri setu sanggani lau sampe ri kasae-saena I'a da'a nanggeni lei ntowau tuamana atau lei ana japi ewa pesombana, tapi I'a nanggeni leina mboto. Ante iwetu I'a nanggabasaka kita nggari silakata sampe ri kasae-saena.

¹³Nantuki pojanji nggasae lei nggari towau bo japi pomawa pade sowu nggari ana japi to nipalabu ewa pesomba ka Alatala nikamburoi ka tau to najadi natantoru ala ira majadi magasa. [34] Jadi ane lei bo sowu etu namala mompakagasa koro ntau to natantoru iwetu,

¹⁴natantumo neliu nggamonjo lei Kristus! Sabana ante petulungi Nosa Nagasa, to naria sampe ri kasae-saena, Kristus nombawai korona mboto ka Alatala ewa pesomba to da'a ria kakurana. Leina nompakagasa rara nta'ita nggari powia to da'a ria gunana ala kita mamala mepue ka Alatala to Natuwuna.

¹⁵Etu sampe Kristus najadi tau ntongo to nombaurusi pojanji Alatala to nabou ala tau-tau to nipokio Alatala mamala mantarima rasi-rasi to nijanjina sampe ri kasae-saena. Etu pura-pura majadi sabana Kristus namate ala manggabasaka ira nggari sala-sala to nipowia ira tempo pojanji nggasae danalaku.

¹⁶Ane maria sura pojanji mombabagi kakalumana, kana manoto topowia sura etu namatemo da'apa kakalumana rabagi.

¹⁷Sabana sura etu da'apa namala ratuki ane danatuwu topowia sura. Etu aga nalaku ane namatemo topowiana.

¹⁸Iwetu wo'u pojanji Alatala pamulana da'apa nalaku ane da'apa nipatiti nu lei binata to nisambale.

¹⁹Pamulana, i Musa nompatolele ka todea to Yahudi pura-pura parenta to naria riara Atura-atura agama. Naopu etu nialana lei ana japi bo towau tuamana to nisambale pade nigalona ante ue. Naopu etu nikamburoina ri Buku Parenta-Parenta bo todea ante ra'a-ra'a kawoko hisop to nipo'u ante lui wulu bimba to nalei.

²⁰Niulina ka ira, “E'imo lei to nompakaasa pojanji to nipakatantu Alatala ka komi.” [35]

²¹Pade iwetu wo'u i Musa nanggamburoi ante lei Tenda Mpepue bo pura-pura parewa to rapake mepue ka Alatala. [36]

²²Kakonona, nantuki Atura-atura agama to nipapola i Musa ntora pura-pura to naria nipakagasa ante lei. Pade ane da'a ria katiti nu lei silaka da'a namala raampungi. [37]

²³Jadi Tenda Mpepue bo pura-pura parewana etu to nombagambara nuapa to naria ri suruga kana nipakagasa iwetu. Tapi to naria ri suruga etu paraluu nipakagasa ante pesomba to neliu nggabelo.

²⁴Sabana Kristus da'a nesua ri Peto'o Nagasa to nipowia mpale manusia to nombagambara Peto'o Nagasa to nakonona ri suruga. Tapi I'a nesua ri suruga pade ri setu I'a batena mantingayo Alatala ala mantulungi kita.

²⁵Butu-butu mpae Balengga Topanggeni Agama Yahudi nesua ri Peto'o to Neliu Nggagasa ante nanggeni lei nggari saongu binata. Tapi Kristus da'a nesua mpanggani-nggani iwetu manggeni korona mboto ewa pesomba.

²⁶Sabana ane iwetu batuana I'a kana nombarasai kasusa bo kapari mpanggani-nggani nompamula nggari lamba pamulana. Tapi kakonona, ri tempo e'i to namosu kaopu nu dunia I'a narata sanggani lau ala mompakaropu silakata ante nombawai korona mboto rapatesi.

²⁷Alatala nompakatantu manusia mamate aga sanggani lau, pade naopu etu ira ratangara.

²⁸Jadi iwetu wo'u Kristus namate aga sanggani lau ewa pesomba mompakaropu silaka ntodea. Naopu etu I'a kana marata sangganipa, da'a ala mompakaropu silaka, tapi ala mompakasalama tau-tau to nalentora mompopea karatana.