Read Da'a Kaili YAKOBUS 1 Bible Online

YAKOBUS 1 - Da'a Kaili bible

YAKOBUS 1

¹Sura e'i nggari ja'iku Yakobus, batua Alatala bo Pue Yesus Kristus, ka pura-pura topomparasaya Alatala to nosimpotatare ri njumaongu dunia. Tabe nggari ja'iku.

²Sampesuwu-sampesuwu, ane komi mombarata mpengaya-ngaya pesoba, komi kana mosukuru,

³sabana ninjani komi ane komi matutu momparasaya i Pue tempo mombarata pesoba kaopuna komi majadi maroo rara.

⁴Jadi komi kana tunggai maroo ala komi majadi manoto, pade da'a maria inggu nuapa-nuapa to masipato raontiaka, pade pomparasaya komi ri ja'i Alatala da'a makura nuapa-nuapa.

⁵Ane maria nggari tatongo komi to nakura notona, i'a kana merapi noto nggari ja'i Alatala. Pade Alatala kana mombawai noto etu ka i'a, sabana Alatala nombawai ka pura-pura tau ante najoi rarana. Da'a niwaina nggarau.

⁶Tapi tau to merapi kana momparasaya mpu'u-mpu'u. Da'a mamala i'a morongu rara, sabana tau morongu rara nasimbayu ewa balumba ri tasi nitawui poiri gusa'a guse'i.

⁷Tau norongu rara ewa etu da'a naliongu pekirina. Ne'e i'a manjarumaka mombarata nuapa-nuapa nggari ja'i Pue!

⁹Topomparasaya to napakasi kana madamba-damba ane i'a rapakalanga Alatala katuwuna.

¹⁰Pade topomparasaya to nakalumana wo'u kana madamba-damba ane i'a rapakaede Alatala katuwuna, sabana ninjaninamo i'a kana mamate nasimbayu ewa sese kawoko to nalipomo karambana.

¹¹Tempo mata eo nebulu ante kapanena mpu'u, kawoko etu kaliu-liu nalele sampe naronto sesena, pade nalipo puramo karambana. Iwetu wo'u ante tau nakalumana. Sanggani tempo i'a kana mamate riara popaelona.

¹²Nasana mpu'umo tau to naroo rarana riara pesoba, sabana ane i'a manta'amaka sampe ri kaopuna, Alatala kana mombawai ka i'a katuwua mabelo sampe ri kasae-saena. Etu to nijanji Alatala ka tau-tau nompotowe I'a.

¹³Ane samba'a tau rapesoba mowia kaja'ana ne'e i'a manguli, “Pesoba e'i narata nggari ja'i Alatala.” Etu da'a nakono, sabana Alatala mboto da'a mamala rapesoba mowia kaja'ana pade I'a da'a wo'u mompesoba tau mowia kaja'ana.

¹⁴Tapi tau nipesoba mowia kaja'ana ane i'a rataja bo rakeni dota rarana mboto to naja'a.

¹⁵Ane dota rarana to naja'a etu ratukina, i'a kana masilaka. Pade ane i'a tunggai mowia silaka etu, kaopuna i'a kana mamate pade rapopoga'a nggari ja'i Alatala sampe ri kasae-saena.

¹⁶Sampesuwu-sampesuwu to nipotoweku, ne'e komi masala paha! Alatala da'a mompesoba kita mowia kaja'ana.

¹⁷Pura-pura to niwaina ka kita nabelo ntoto, da'a ria to naja'ana. Pura-pura nuapa to nabelona narata nggari ja'i Alatala ri suruga to nompajadi pura-pura reme ri langi. I'a da'a nasimbayu ewa wayo to nagampa nabali. I'a bate-batena nabelo.

¹⁸Nggari dotana mboto I'a nompajadi kita ana-anana ante nompatolele ka kita tesana to nakono. Etu nipowiana ala kita majadi to neliu nibila nggari pura-pura nuapa to nipajadina.

¹⁹Sampesuwu-sampesuwu to nipotoweku, pariara nta'imo mpakabelo-belo tesaku e'i. Kita kana masadia mangepe, tapi ne'e kaliu-liu motesa, bo ne'e masalisa marau,

²⁰sabana isema-sema to narau da'a mamala mompowia to nabelona to nompakadamba rara Alatala.

²¹Sabana etu kabasaka puramo kabiasa inggu to natantoru bo naja'a. Pariaramo ante kaede rara tesa to niboli Alatala riara nta'imu, sabana tesa etu nakuasa mompakasalama komi.

²²Jadi tukimo Tesa nu Alatala, ne'e aga mangepe bayangi, sabana ane aga mangepe bayangi komi mombabagiu koro komi mboto.

²³Tau to nangepe Tesa nu Alatala tapi da'a nitukina, i'amo nasimbayu ewa tau to nanggita lenjena ri pompewayo,

²⁴nalaipa i'a nikalinganamo lenjena etu.

²⁵Tapi tau to nompariara nta'i Tesa nu Alatala pade naroo nantuki tesa etu, da'a aga mangepe bayangi bo manggalinga, tau etumo kana rawai Alatala ka rasi riara bara nuapa-nuapa rapowiana. Tesa nu Alatala etu nabelo ntoto bo naria kuasana nombakabasaka manusia.

²⁶Ane maria samba'a tau to nompekiri i'a tau naroso poagamana tapi i'a da'a nombajagai jilana, i'a nombabagiu korona mboto. Agamana etu da'a ria gunana.

²⁷Tau to nakono poagamana to da'a ria salana riara mpanggita Umata Alatala, etumo tau to nantulungi ngana-ngana pailu bo tobalu-tobalu to nasusa, bo to nombajagai korona mboto ala ne'e rapakatantoru powia to naja'ana ri dunia e'i.