Read Da'a Kaili YAKOBUS 3 Bible Online

YAKOBUS 3 - Da'a Kaili bible

YAKOBUS 3

¹Sampesuwu-sampesuwuku, ne'e madea nggari tatongo komi madota majadi guru mompatuduki Tesa nu Alatala, sabana ninjani komi mboto kita to najadi guru kana ratangara Alatala banepia ante potangara to neliu nggatomo nggari tau ntanina.

²Toramo! Kita pura-pura naoso nowia sala. Tapi tau to da'a sanggani nowia sala ante tesana pomparasayana da'a nakura nuapa-nuapa. I'a namala nombakuasai pura-pura korona.

³Kita mombadika sama to nanggedi ri nganga jara ala i'a mantuki dotata. Ante akala iwetu mamala kita mombagoliaka pura-pura koro jara to nabete etu.

⁴Pekirimo jonjo ntanina ewa sakaya bete. Naupa sakaya etu nabete mpu'u pade nikeni poiri naramboso, tapi namala nigoliaka guli to nanggedi nantuki dota topompajala sakaya etu.

⁵Iwetu wo'u ante jilata. Naupa nanggedi mpu'u, jilata nipake mompakalanga tesa. Pekirimo jonjo ewa pangale. Naupa nabete mpu'u, pangale namala rapakajela ante apu to nanggedina.

⁶Jila manusia nasimbayu kaja'ana ante apu. Ri korota jila etumo pu'u kaja'ana to nompakaja'a njumaongu korota. Jila etu nikuasai kaja'ana to nopu'u nggari naraka sampe jila etu wo'u nompandasa njumaongu katuwuta.

⁷Pura-pura binata namala rapoponondo, nabeloka tonji, nabeloka binata nenjoyo, nabeloka bau riara ue. Pade naria mamimo tau to nompoponondo ira.

⁸Tapi da'a ria samba'a tau to namala mompoponondo jila manusia. Jilata etu naja'a mpu'u, da'a namala nita'amaka. Jilata nasimbayu ewa bisa nu ule to mepakamate.

⁹Ante jila kita nanguli tarima kasi ka Pue Alatala, Umata ri suruga. Tapi ante jilata wo'u kita nombajanjiaka sanggamanusiata to nipajadi Alatala nantuki lenjena mboto.

¹⁰Nggari saongu sumba nesuwu tesa tarima kasi bo tesa-tesa nombajanjiaka wo'u. Sampesuwu-sampesuwuku, kakonona da'a masipato iwetu!

¹¹Pekirimo mata ue. Natantumo da'a naria mata ue nompopesuwu ue nameli bo ue napa'i nggari uluna saulu lau!

¹²Wa'a wo'u ante kayu. Natantumo da'a ria kayu ara nowua zaitun, pade da'a wo'u naria anggur nowua ara. Mata ue to napaga da'a wo'u mamala mompopesuwu ue nameli.

¹³Ane maria nggari tatongo komi to nata'u bo nanoto, etu kana rapopokita komi ante pokainggu to nabelona. Noto komi etu kana rapopokita ante mowia to nabelona ante kaede rara.

¹⁴Tapi ane komi aga nasiriati bo naju'a rara pade aga mompekiri kabelo koro komi mboto, ne'e mantoiya noto ewa etu, sabana inggu komi to naja'a etu nanjapuaka Tesa nu Alatala to nakonona.

¹⁵Noto ewa etu da'a nopu'u nggari ja'i Alatala. Etu aga nopu'u nggari dunia to naja'a e'i, nggari dota rara manusia to naja'a, bo nggari seta-seta.

¹⁶Ri umba naria tau aga nasiriati bo nompekiri kabelo korona mboto, natantumo ri setu wo'u naria posinggarau bo mpengaya-ngaya powia to naja'ana.

¹⁷Tapi tau to naria noto to nopu'u nggari ja'i Alatala, nagasa rarana, da'a ria pokaingguna nuapa-nuapa to naja'ana. Pade i'a wo'u natuwu nosinggabelo ante tau ntanina, nalusu rarana, i'a nasadia mantarima pombarata tau ntanina. Naasi mpu'u matana nanggita roana to nandasa, pade nadea powiana to nabelona. I'a da'a nompakasabingga, pade natebuka bo nanoa rarana.

¹⁸Pokainggu to nanoa nasimbayu ewa wua to nituja. Tau-tau to natuwu nompoposinggabelo tau ntanina nombatuja wua etu, pade asele to najadina etumo powia to nanoana ri tatongo ira pura-pura.