Read Da'a Kaili YAKOBUS 4 Bible Online

YAKOBUS 4 - Da'a Kaili bible

YAKOBUS 4

¹Nggari umba pura posibaga bo posinggarau to naria ri tatongo komi? Natantumo etu nggari dota rara komi to naja'a to nosibaga riara nta'imu.

²Komi naino tapi da'a nombarata, jadi komi nepatesi. Komi nasiriati tapi da'a ria nirata komi. Jadi komi nosinggarau bo nosibaga. Sampesuwu-sampesuwu, komi da'a nombarata nuapa to nipodota komi sabana komi da'a nerapi ka Alatala.

³Pade naupa komi nerapi komi da'a nombarata sabana patuju komi merapi nasala. Nuapa niperapi komi etu aga rapompakasana koro komi mboto.

⁴Komi nasimbayu ewa besi to niporongo aga nongei-ngei ka langgai ntanina to najadi bali nu rongona! Natantumo ninjani komi ane komi mowega ante dunia to naja'a e'i komi majadi bali nu Alatala. Isema-sema madota mowega ka dunia to naja'a e'i i'a mompajadi korona mboto bali nu Alatala.

⁵Ne'e rapekiri komi da'a nakono tesa nu Buku Nagasa to nanguli iwe'i: “Dota to naria riara nta'ita naroso mpu'u!” Etu mpu'u-mpu'u nakono!

⁶Tapi petulungi Alatala ka kita neliu nggaroso nggari dota etu. Etu sampe naria tesa to nitulisi riara Buku Nagasa iwe'i: “Alatala nangewa tau to nalanga rarana, tapi I'a nompotowe tau to naede rarana.” [5]

⁷Sabana etu, sampesuwu-sampesuwu, pekoumo ri ja'i Alatala, pade ewamo Magau nu Seta, pade i'a kana mangowa malai nggari ja'i komi.

⁸Pakamosumo ri ja'i Alatala pade Alatala wo'u mompakamosu komi. Komi to nasilaka, kabasakamo pokainggumu to naja'a! Pakagasamo rara komi to norongu rarana!

⁹Komi masipato masusa rara bo motumangi ante manjoso rara mompekiri silaka komi. Pongirimu kana majadi tangimu, bo kadamba raramu kana majadi kasusa raramu.

¹⁰Pakaedemo rara komi ri ngayo i Pue pade I'a kana mompakalanga komi.

¹¹Sampesuwu-sampesuwu, ne'e mosisalai, sabana tau nombasalai bo nompakasala roana topomparasaya, i'a nombasalai bo nompakasala Atura-atura nu Alatala. Pade ane komi mompakasala Atura-atura nu Alatala, batuana komi da'apa topantuki atura, tapi komi aga topompakasala atura etu.

¹²Kakonona aga samba'a lau to nakuasa mombawai atura ka manusia bo mompakasala manusia, etumo Alatala mboto. Aga I'amo to nakuasa mompakasalama kita atau mombasuku kita ri naraka. Tapi komi da'a masipato mompakasala sanggamanusiamu!

¹³Sampesuwu-sampesuwu, naria ri tatongo komi to nanguli iwe'i: “Eo e'i bara naile kami kana malau mpaka ri ngata ri anu bo meto'o ri setu sampae kasaena lau modaga bo mompaelo doi.” Epe komimo tesaku e'i!

¹⁴Da'a ninjani komi nuapa majadi ante katuwumu naile. Katuwu komi ri dunia e'i nasimbayu ewa sumoa, aga sampalai nikita pade kaopuna nalipomo.

¹⁵Kakonona komi kana manguli iwe'i: “Ane rapodota i Pue kami kana matuwu mompowia e'i bara etu.”

¹⁶Tapi komi da'a nanguli iwetu. Komi aga nangoa bo nalanga rara. Kakonona pura-pura pangoa ewa etu naja'a!

¹⁷Jadi toramo, isema-sema nangginjani nuapa to nabelo rapowiana tapi da'a nipowiana, tau etu nasilaka.