Read Da'a Kaili YAKOBUS 5 Bible Online

YAKOBUS 5 - Da'a Kaili bible

YAKOBUS 5

¹Umba komi tau-tau nakalumana, epemo tesaku e'i. Komi kana motumangi bo mageo mpajea sabana komi kana mandasa mpu'u!

²Kakalumanamu narompomo. Pakeamu nikoni saipamo.

³Bulawa bo salakamu nikoni ntagaramo sabana aga niboli-boli wa'amo! Komi aga nompasiromu mpakadea mbara-mbara ri dunia, tapi dunia e'i ntora maopumo. Tagara bulawa bo salakamu etu kana majadi sabi mantujuraka salamu, pade kaopuna komi kana rasuku riara apu.

⁴Komi da'a nombabayari tambo ka tau-tau to nokarajaa ri tinalumu. Tambo etu wo'u majadi sabi mantujuraka salamu ri ngayo Alatala, sabana pokangangua ira to nokato ri tinalumu niepe Pue Alatala to Neliu Nggakuasa.

⁵Katuwu komi ri dunia neliu nggagana pade doimu aga nipake komi nompebasa bo nompesana ri dunia e'i. Nasimbayu ewa japi to nipakaboya nompopea eo mposambale iwetu wo'u komi. Ante da'a ninjani-njani, komi kana rasuku ri Eo Mpotangara.

⁶Komi wo'u nombasuku bo nompatesi tau to nanoa, naupa ira da'a nangewa komi.

⁷Jadi sampesuwu-sampesuwuku, komi kana mosabara sampe i Pue Yesus marata. Kitamo iwenu posabara samba'a topotinalu nompopea sampe nowua nuapa to nitujana. Ante nosabara i'a nompopea uja tempo motuja bo uja nompakajadi wuana.

⁸Komi wo'u kana mosabara pade maroo rara sabana namosumo karata i Pue Yesus.

⁹Ne'e mosipongua bo mosipakasala, ala ne'e komi rasuku Alatala. Toramo! Namosumo Topotangara, mana masaeka marata.

¹⁰Sampesuwu-sampesuwu, tukimo jonjo nabi-nabi to nompasimbayu tesa nggari ja'i Pue. Ira batena nosabara bo naroo rara tempo nipandasa.

¹¹Iramo to niuli tau nasana mpu'u, sabana ira naroo bo nosabara tempo nipandasa. Tantu niepe komi tesa Ayub nggaolu, iwenu sampe i'a naroo mpu'u tempo nipandasa, pade ninjani komi iwenu sampe katuwuna nipakabelo bali, sabana i Pue neliu mpu'u towena bo asi matana. [6]

¹²Sampesuwu-sampesuwu, to napoko mpu'u ratora komi iwe'i: Ne'e metunda ante manguli langi bara tana bara nuapa-nuapa ntanina. Ane iyo, ulimo, “Iyo,” ane da'a, ulimo, “Da'a.” Ne'e komi metunda ala ne'e komi mawela pesuku nu Alatala.

¹³Ane maria nggari tatongo komi to nasusana, i'a kana mosambaya. Ane maria tau nadamba, i'a kana modade mantoiya Alatala.

¹⁴Pade ane maria tau naju'a, i'a kana mompokio topanggeniaka-topanggeniaka topomparasaya. Ira kana mosambaya ka tau to naju'a etu bo mombagese lana ri korona riara sanga i Pue.

¹⁵Ane ira mosambaya ante pomparasaya mpu'u, i Pue kana mompakabelo tau naju'a etu. Pade ane ju'ana etu nopu'u nggari silaka, i Pue kana mombaampungi i'a.

¹⁶Etumo sabana komi kana mosipangaku sala, pade mosiposambaya ala ju'a komi rapakabelo. Posambaya samba'a tau to nanoa rarana nabete mpu'u kuasana.

¹⁷Pekirimo jonjo nabi Elia nggaolu. I'a samba'a manusia biasa nasimbayu ewa kita. I'a nosambaya ante mpu'u-mpu'u rarana ala ne'e mauja. Pade mpu'u-mpu'u da'a nauja tolumpae santongo kasaena. [7]

¹⁸Kaopuna i'a nosambaya sangganipa pade naratamo uja nggari langi sampe tuja-tuja ntau najadi bali. [8]

¹⁹Sampesuwu-sampesuwuku, ane maria ri tatongo komi samba'a tau da'a mana mantuki Tesa nu Alatala pade naria wo'u roana ntanina malau manggeni i'a manjili bali ri ja'i Alatala, etu powia to nabelo.

²⁰Toramo! Tau to nanggeni roana to nasilaka etu manjili nggari jalana to nasala mompakasalama roana etu nggari pesuku Alatala, pade silaka roana to nadea kana raampungi. Tabe nggari ja'iku, Yakobus