Read Da'a Kaili 1 PETRUS 2 Bible Online

1 PETRUS 2 - Da'a Kaili bible

1 PETRUS 2

¹Jadi sampesuwu-sampesuwu, nirata komimo katuwu to nabou. Sabana etu kabasakamo pura-pura pokainggu to naja'a bo nebagiu. Ne'e mana aga mabelo ri lenje, ne'e mana maju'a rara bo ne'e mana mompakaja'a tau ntanina.

²Nasimbayu ewa ngana nggedi to dako nesuwu tunggai naino rarana nantomi ue njusu indona, iwetu wo'u komi kana maino rara mangepe Tesa nu Alatala to najadi ewa panggoni wayomu to nagasa. Ane iwetu pomparasaya komi kana mantambai maroso sampe komi mantarima pura-pura nuapa to nipakasadia Alatala ka tau to nipakasalamana.

³Kawiamo etu sabana nirasai komi mamimo kabelo nu rara i Pue.

⁴Pue Yesus nirapaka ewa saongu watu to natuwuna. Watu etu nipoara manusia tapi nipelisi Alatala ewa watu to neliu nggasuli olina. Jadi kamaimo mompakamosu i Pue

⁵ala komi wo'u rapajadina ewa watu-watu to natuwuna to nipake mowia saongu sapo Alatala. Pade riara sapo etu komi majadi ewa topanggeni agama to nipakatantu mantulungi Alatala. Sabana komi mombatoiya Alatala bo mombajuju koro komi mboto ewa pesomba ka I'a. Pade pesombamu etu kana rakonoa rara Alatala sabana Yesus Kristus mantulungi komi.

⁶Nanotomo etu sabana naria tesa to nitulisi riara Buku Nagasa iwe'i: “Epemo! Aku nompelisi saongu watu to nasulina pade watu etu nitu'uku ri Bulu Sion majadi palo mpondasi to neliu nggaroso. Isema-sema momparasaya watu etu da'a ntoto rapakaeya.” [3]

⁷Yesus, to nirapaka ewa watu etu, mpu'u-mpu'u nanggeni belo ka komi topomparasaya. Tapi ane tau da'a nomparasaya, kana majadi ri ja'i ira ewa to nitulisi riara Buku Nagasa iwe'i: “Watu to nitajiaka ntopowia sapo, watu etumo to najadi palo mpondasi to neliu nggaroso.” [4]

⁸Pade, “Watu etu nompakatepasunu tau. Watu etu nompakadungga ira.” [5] Ira natepasunu sabana da'a madota momparasaya Tesa nu Alatala, pade etumo to nipakatantu Alatala ka ira.

⁹Tapi sampesuwu-sampesuwu, komi da'a ewa ira etu. Komimo tau-tau to nipelisi Alatala. Komimo to nipelisi najadi ewa topanggeni agama to mantulungi magau. Komimo todeana to nipakatantu mantulungi Alatala, komimo to najadi bagiana. Komi nipelisi ala mompatolele kareba ewa powia Alatala to nipogumaa. I'amo to nompokio komi mesuwu nggariara karumauna ala mesua matuwu riara karemena to nipogumaa.

¹⁰Tempo bopia komi da'a todeana, tapi we'i-we'i komi najadi todeana. Bopia komi da'a nipoasi matana, tapi we'i-we'i komi nipoasi matanamo.

¹¹Sampesuwu-sampesuwu to nipotoweku, katuwuta ri dunia e'i ewa tau topesowo bo torata to neto'o sampalai lau. Etu sampe aku merapi ante mpu'u-mpu'u ka komi, ne'e mantuki dota rara to naja'a to nangewa pomparasaya komi ka i Pue.

¹²Komi kana matuwu ante pokainggu to nanoa mpu'u ri tatongo tau-tau da'a nomparasaya i Pue. Ane iwetu naupa ira manjalaraka komi ante manguli komi tau naja'a, kaopuna ira kana manggita pokainggu komi to nabelona pade mantoiya Alatala tempo I'a marata ri dunia banepia.

¹³Pekoumo ri ja'i pura-pura topoparenta to nipakatantu manusia, sabana etumo to nipodota i Pue. Pekoumo ri ja'i magau sabana i'amo to neliu nggabete kuasana.

¹⁴Pade pekoumo ri ja'i gubernur-gubernur sabana iramo to nipakakuasa magau ala mombasuku tau-tau to naja'a bo mombatoiya tau-tau to nabelo pokaingguna.

¹⁵Sabana to nipodota Alatala ala nggari pokainggumu to nabelo komi mompakalino tau-tau nadoyo to notesa-tesa nantuki pekiri ira to nabodo.

¹⁶Komi kana matuwu ewa tau da'a nipobatua manusia. Tapi ne'e sampe etu majadi tanje ka komi mowia kaja'ana. Nabelopa komi matuwu ewa batua to natundu ri ja'i Alatala.

¹⁷Bilamo pura-pura tau, potowemo sampesuwumu topomparasaya, pekoumo ri ja'i Alatala bo bilamo magau.

¹⁸Komi to najadi batua kana mpu'u-mpu'u mekou ri ja'i madikamu bo mombabila ira, nabeloka ira to nanondo bo nalusu rara, nabeloka ira to nasoana.

¹⁹Ane komi rapandasa madikamu naupa komi da'a nowia kasalana pade komi maroo riara kasusa etu sabana nantora dota Alatala, komi kana ragane Alatala.

²⁰Natantumo da'a masipato komi ratoiya ane komi maroo tempo niboba madikamu sabana nowia kaja'ana! Tapi ane komi rapandasa sabana pokainggumu nabelo pade komi maroo riara kasusa etu, komi mpu'u-mpu'u ragane Alatala,

²¹sabana etumo patuju Alatala nompokio komi. Toramo! Kristus wo'u nipandasa ala manggeni belo ka komi. I'a nombawai jonjo ka komi ala komi mompasiala pokaingguna etu.

²²I'a da'a sanggani nowia silaka. Da'a ria sanggani I'a nodawa.

²³Tempo I'a niuli sinja'i ntau I'a da'a nebalasi. Tempo I'a nipandasa I'a da'a nesawa. Tapi I'a aga nombajuju korona ka Alatala, Topotangara to nanoana.

²⁴Kristus mbotomo nanggolo silaka-silakata ri korona mboto tempo I'a nipaku ri kayu parika, ala kita rakabasaka nggari kuasa silaka bo matuwu mantuki dota Alatala. Pade nggari bela-belana tempo niporo ju'a-ju'a komi nipakabelomo.

²⁵Tempo bopia komi ewa bimba-bimba to nasalanjalamo. Tapi we'i-we'i komi nanjilimo ri ja'i Ntopoewu to nanggeniaka katuwumu.