Read Da'a Kaili 2 PETRUS 1 Bible Online

2 PETRUS 1 - Da'a Kaili bible

2 PETRUS 1

¹Sura e'i nggari ja'iku i Simon Petrus, batua bo suro Yesus Kristus, ka komi to nomparasaya i Pue Yesus nasimbayu ewa kami. I'a Alatalata bo Magau to Mompakasalama to nanggeni kita nomparasaya sabana nanoa mpu'u rarana.

²Perapi Pue Alatala mombagane komi bo mombawai ka komi katuwua mabelo sabana komi nosinjani ante I'a bo Pueta Yesus.

³Nggari barakana mboto Alatala nombawai ka kita pura-pura nuapa to niparaluuta ala matuwu ante pokainggu to nantuki dotana. Etu najadi riara nggatuwuta sabana kita nosinjani ante i Pue to nompokio kita mombarata bagia riara kuasa bo kabelona.

⁴Nggari kuasa bo kabelona etu I'a nojanji nombawai ka kita rasi-rasi to neliu nggadea olina bo neliu nggabelo. Patujuna nombawai rasi-rasi etu ala komi mamala makabasaka nggari dota rara to naja'a to mombagero dunia e'i pade ala inggu-inggu Alatala mboto maria ri ja'i komi.

⁵Jadi etumo sabana komi kana mompasimbuku ala pomparasaya komi ratambai ante pokainggu to nabelo. Pade pokainggu to nabelo etu kana ratambai ante pangginjani ewa Alatala.

⁶Pade pangginjani etu kana ratambai ante pompakule mombakuasai koro komi mboto. Pade pompakule mombakuasai koro komi mboto kana ratambai ante karoo rara riara kasusa. Pade karoo rara kana ratambai ante pokainggu to nantuki dota Alatala.

⁷Pade pokainggu to nantuki dota Alatala etu kana ratambai ante pepotowe ka sampesuwumu topomparasaya. Pade pepotowe ka sampesuwumu topomparasaya kana ratambai ante pepotowe ka pura-pura tau.

⁸Ane pokainggu iwetu meliu kadeana ri ja'i komi, posinjani komi ante Pueta Yesus Kristus mpu'u-mpu'u moguna pade maria aselena.

⁹Tapi tau da'a noinggu iwetu nasimbayu ewa tau naburo. Napii pekirina sabana nikalinganamo i'a nipegasa nggari silakana bopia.

¹⁰Jadi sampesuwu-sampesuwu, pasimbukumo ante mpu'u-mpu'u ala mompopokita komi mpu'u-mpu'u nipelisi Alatala bo nipokiona majadi todeana. Sabana ane komi mowia etu natantumo komi da'a ntoto mokanggaura momparasaya.

¹¹Pade ante iwetu natantumo komi kana ratarima ante mabelo riara poparenta to naroo sampe ri kasae-saena, etumo Poparenta Pueta Yesus Kristus, Magau to Mompakasalama.

¹²Jadi sampesuwu-sampesuwu, naupa komi nangginjani pura-pura etu pade komi naroso nantuki pepatuduki to nakono to nitarima komi, aku bate-batena mompopatora etu ka komi.

¹³Nipekiriku ane aku danatuwu masipato aku mompakaroso rara komi ante popatoraku etu.

¹⁴Sabana ninjanikumo mana masaeka kamateku, ewa to niuli Pueta Yesus Kristus ka aku.

¹⁵Jadi aku kana mompasimbuku ala komi bate-batena mantora pura-pura pepatudukiku etu ane aku mana ria ri dunia e'i.

¹⁶Tempo kami nompatuduki ka komi ewa kuasa Pueta Yesus Kristus bo karatana ri dunia e'i, kami da'a nantuki kabali-kabali to nipetowali manusia. Tapi mata kami mboto nanggita kabete kuasana to nipogumaa.

¹⁷Sabana kami mboto nanggita tempo I'a nibila bo nipakareme Umata Pue Alatala. Pade niepe kami mboto suara Alatala to Neliu Nggakuasa nanguli iwe'i: “E'imo Anaku to nipotoweku, I'amo to nompakadamba raraku.”

¹⁸Suara etu niepe kami mboto nggari suruga tempo kami nosanggani-nggani ante Yesus ri bunggu bulu to nagasa.

¹⁹Jadi nggari nuapa to nikita kami etu neliu ngganoto ka kami kakono nu tesa-tesa to niboto nabi-nabi Alatala nggaolu. Nabelo mpu'u ane komi mompariara nta'i tesa nabi-nabi etu, sabana tesa ira nasimbayu ewa saongu poindo to nombawanta karumauna. Pariara nta'imo tesa etu sampe i Pue Yesus marata bali ri dunia mombawanta komi ante remena nasimbayu ewa eo bo betu'e pompaeo nebulu nombawanta dunia.

²⁰To napokona, kana ratora komi tesa e'i: tesa-tesa to niboto nabi-nabi nggaolu to naria riara Buku Nagasa da'a namala rapakanoto batuana nantuki pombarata manusia mboto.

²¹Sabana tesa nabi-nabi da'a niboto ira nantuki dota manusia. Tapi ira notesa ante pekeniaka Nosa Nagasa nu Alatala nompasimbayu tesa nggari ja'i Alatala mboto.