Read Da'a Kaili 2 PETRUS 2 Bible Online

2 PETRUS 2 - Da'a Kaili bible

2 PETRUS 2

¹Tempo nggaolu naria nabi-nabi topodawa neumba ri tatongo todea nu Alatala. Pade iwetu wo'u we'i-we'i kana meumba guru-guru topodawa ri tatongo komi. Ira manggeni pepatuduki to nasala to mompakanawu tau, pade ira kana mombasapu i Pue to nantolo silaka ira. Nggari powia ira etumo ira masalisa rasuku.

²Kana madea tau mompasiala pokainggu ira to nopu'u nggari dota rara to naja'a. Pade nggari ira etu sampe pepatuduki to nakonona kana rasalai ntau.

³Guru-guru topodawa etu nadoko nu doi. Etu sampe ira aga mangelo untu nggari ja'i komi ante tesa-tesa to nipetowali ira mboto. Tapi pesuku ira nasaemo nipakatantu. Mana masaeka majadi.

⁴Toramo! Alatala da'a nanggabasaka malaeka-malaekana mboto nggari pesuku tempo ira nowia silaka, tapi I'a nantajiaka ira riara naraka. Ira nisuaraka riara peto'o narumau pade nitarunggu ri setu sampe marata Eo Mpotangara banepia.

⁵Iwetu wo'u tempo nggaolu Alatala da'a nanggabasaka dunia nggari pesukuna. I'a nompakaropu tau-tau to da'a nantuki dotana ante ue nanggabuntu nompakalodo dunia. Aga i Nuh ante pitumba'a tau ntanina to nipakasalama sabana i Nuh nompatolele ka tau pokainggu to nikonoa rara Alatala. [1]

⁶Iwetu wo'u ante ngata Sodom bo Gomora. Alatala nombasuku pue ngata to naja'a etu ante nompalabu ira ante apu ala majadi popatora ka tau-tau to da'a nantuki dota Alatala. [2]

⁷Tapi i Lot nipakasalamana nggari pesuku etu sabana i'a samba'a tau to nanoa pokaingguna. Nasusa mpu'u rarana nanggita pokainggu to natantoru to nipowia tau-tau da'a ria adana etu. [3]

⁸Sabana i Lot, tau to nanoa etu neto'o ri tatongo ira, pade eo-eo i'a nanggita pade nangepe powia ira to naja'a sampe nandasa mpu'umo pekiri rara nta'ina to nanoa.

⁹Jadi toramo! Alatala mamala mompakasalama tau-tau to nantuki dotana ane ira mombarata pesoba-pesoba. Pade I'a mamala wo'u mombatarunggu tau-tau to naja'ana sampe ira rasuku ri Eo Mpotangara.

¹⁰To mpu'u-mpu'u rasukuna iwetu etumo tau-tau to nantuki dota rara ira to naja'a bo natantoru pade to nanjapuaka kuasa nu Alatala. Nabia bo nasombo mpu'u guru-guru topodawa etu sampe da'a naeka ira nanguli sinja'i malaeka-malaeka to nipogumaa.

¹¹Malaeka-malaeka Alatala etu neliu nggaroso bo neliu nggakuasa nggari guru-guru topodawa etu. Tapi naupa iwetu malaeka-malaeka etu da'a nompakasala roa-roa ira to nowia sala ante tesa-tesa njilaka ri ngayo i Pue.

¹²Tapi guru-guru topodawa etu nombasalaraka anu da'a ninjani ira. Ira nasimbayu ewa binata to da'a ntoto nompekiri, aga natuwu nantuki inggu-inggu to naria ri ja'ina. Binata etu aga niote ala rasoko bo rasambale. Jadi nggari pokainggu to naja'a guru-guru topodawa etu kana rapatesi nasimbayu ewa binata-binata nasoa, pade rasuku sampe ri kasae-saena.

¹³Ira kana rapandasa sabana nowia pokainggu to naja'a. Nau tempo eona to nipodamba ira aga nompebasa nogau sala nantuki dota rara ira to naja'a. Ira nompakatantoru komi topomparasaya nasimbayu ewa gege nompakarangu baju. Pade nggari pokainggu ira to nepakaeya komi nisalai ntau, sabana guru-guru topodawa etu aga nompebasa nogau sala tempo ira nasiromu nanggoni mpasanggani-nggani ante komi.

¹⁴Ira bate-batena naino mogau sala ante butu mba'a besi to nikita ira. Da'a nabasa-basa ira nowia silaka. Ira nombaopa tau-tau to da'a naroso pomparasayana ala mowia silaka. Pade to najadi kabiasa ira aga nadoko nu doi. Ira mpu'u-mpu'u tau nasurukawu!

¹⁵Nipalasi iramo jala to nakonona pade nasalanjalamo ira. Ira nompasiala pokainggu i Bileam ana i Beor nggaolu. I'a aga naino ka doi to niratana nggari powiana to naja'ana.

¹⁶Tapi i'a nibunggaa sabana kaja'ana etu. Keledai[4] pateke to nipesawina saongu binata to da'a namala notesa. Tapi keledai etu notesa ewa manusia nombatagi Bileam mompapola niana to nadoyo-doyo etu. [5]

¹⁷Guru-guru topodawa etu nasimbayu ewa ulu nu ue to naotimo. Ira ewa kulimunggapu aga niburu mpoiri tapi da'a najadi uja. Nipakasadia ka ira peto'o to neliu nggarumau.

¹⁸Sabana ante nalanga rara ira nantesa powia ira mboto, tapi tesa-tesa ira nawara. Ira nombaopa tau to lako nakabasaka nggari ja'i roa-roa ira to naja'a pokaingguna. Tau-tau etu niopa ira ante nompakapane dota rara to naja'a, ala ira manjili bali mantuki pokainggu to naja'a to lako nikabasaka ira.

¹⁹Guru-guru etu nojanji ka tau-tau etu, “Ane komi mantuki pepatuduki kami komi kana makabasaka nggari atura-atura. Komi mamala mowia nuapa-nuapa nipodota komi.” Tapi kakonona ira mboto nipobatua pokainggu-pokainggu to nompakaropu. Sabana ane samba'a tau nidagi dota rarana to naja'a i'a nipobatua dota rarana etu.

²⁰Nandasa mpu'umo guru-guru topodawa etu. Sabana bopia ira mpu'u-mpu'u nosinjani ante Pue Yesus Kristus, Magau to Mompakasalama kita sampe natekabasakamo ira nggari pokainggu to naja'a ri dunia e'i. Tapi naopu etu ira nipemala bo nipobatua bali pokainggu-pokainggu to naja'a etu. Kaopuna neliu nggandasa katuwu ira nggari pamulana.

²¹Nabelopa tau ewa etu da'a sanggani nangginjani jala to nakonona pade nangginjanina tapi kaopuna nompalasi parenta-parenta Alatala to nagasa to nipatuduki ka ira.

²²To najadi ri ja'i ira nasimbayu ewa popata to nanguli iwe'i: “Asu nanjili bali nanggoni luana,” pade “Wawu lako nidiu nanjili bali notompu ri gege.” [6]