Read Da'a Kaili 2 PETRUS 3 Bible Online

2 PETRUS 3 - Da'a Kaili bible

2 PETRUS 3

¹Sampesuwu-sampesuwu to nipotoweku, e'imo suraku karongganina ka komi. Riara suraku karongelena aku nompasimbuku mompopatora ka komi pepatuduki to nakonona ala pekiri komi batena magasa.

²Patujuku ala komi mantora tesa-tesa to niboto nabi-nabi nagasa nggaolu, pade ala komi mantora wo'u parenta-parenta nggari ja'i Pueta, Magau to Mompakasalama to nipatolele suro-surona to narata ri ja'imu.

³Tesa to neliu nggapokona ratora komi iwe'i: Ri tempo namosu kaopu nu dunia kana meumba tau to nikuasai dota rara ira mboto to naja'a. Ira kana mompongei-ngei komi

⁴ante manguli, “Yesus nojanji marata bali ri dunia. Tapi ri umbamo I'a? Etu da'a ntoto majadi, sabana nggari tempo kamate totu'ata nggaolu sampe we'i-we'i mpengele-ngele ri dunia da'a ria kabalina. Etu bate-batena nasimbayu ewa ri lamba pamulana tempo dunia nipajadi.”

⁵Tau-tau to notesa iwetu nitunggai ira nanggalinga iwenu Alatala nompajadi langi nggaolu ante tesana, bo iwenu dunia nipajadina nggari ue, pade iwenu sampe kabatana neumba nggari tatongo ue.

⁶Pade ante ue wo'u Alatala nompakaropu dunia nggaolu, etumo ante ue bete nanggabuntu nompakalodo dunia.

⁷Tapi nggari Tesa nu Alatala etu wo'u langi bo dunia to naria we'i-we'i nipiara sampe kaopuna rapakaropu ante apu. We'i-we'i langi bo dunia danipiara sampe Eo Mpotangara banepia tempo pura-pura tau to da'a nantuki dota Alatala kana rasuku.

⁸Tapi, sampesuwu-sampesuwu to nipotoweku, ne'e rakalinga komi tesa e'i: Riara mpanggita i Pue sanjobu mpae nasimbayu ewa sambengi, pade sambengi nasimbayu ewa sanjobu mpae.

⁹Pue da'a nompakasae kadupa nu pojanjina marata bali ri dunia naupa naria bara sakuya mba'a tau nanguli iwetu. Tapi I'a nosabara ri ja'i komi sabana I'a da'a madota ala maria to rasuku sampe ri kasae-saena. To nipodotana ala pura-pura tau mombarata loga majea nggari silaka-silaka ira.

¹⁰Tapi i Pue Yesus kana marata bali ri dunia ante da'a ninjani-njani ntau nasimbayu ewa karata ntopangangga. Ri eo etu langi kana malipo sanggani ante guru nu apu to nagai. Pade pura-pura to naria kana maropu rakoni nu apu, bo dunia ante pura-pura isina kana malipo sanggani.

¹¹Jadi sampesuwu-sampesuwu, ane pura-pura to naria kana maropu iwetu, natantumo kita masipato matuwu ante pokainggu to magasa pade to mantuki dota nu Alatala.

¹²Kita e'i nompopea eo to nipakatantu Alatala etu. Kita kana mompasimbuku mompasara eo etu ala masasinta marata. Ri eo etu langi kana maropu rakoni nu apu, pade pura-pura to naria kana magonu ante kapanena.

¹³Tapi kita mompopea nuapa to nijanji Alatala, etumo langi to nabou bo dunia nabou, peto'o tau-tau to nanoa pokaingguna.

¹⁴Jadi sampesuwu-sampesuwu to nipotoweku, tempo komi mompopea kajadia-kajadia etu, komi kana mompasimbuku matuwu ante pokainggu to nagasa to da'a mamala rasalai bo da'a mepakaeya. Pasimbukumo ala ane i Pue Yesus marata bali komi mosinggabelo ante I'a.

¹⁵Toramo, nandate posabara i Pue ala mombawai loga ka tau rapakasalama. Iwetu wo'u to nitulisi sampesuwuta i Paulus to nipotoweta riara sura-surana to nitulisina nantuki noto to niwai Alatala ka i'a.

¹⁶Riara surana pura-pura i'a nompatuduki pepatuduki nasimbayu ewa to nitulisiku ri ba'ana. Naria wo'u tesa i Paulus to nakaja sakedi ranjani. Tesa etu nabiasa nipakadenggo ntau to da'a nanoto pekiri ira bo to da'a naroso pomparasaya ira. Iwetu wo'u ira nompakadenggo isi Buku Nagasa ntanina. Tapi nggari pokainggu ira etu ira kana rasuku Alatala.

¹⁷Jadi sampesuwu-sampesuwu to nipotoweku, ninjani komi mamimo kana maria tau moinggu iwetu. Etu sampe komi kana mainga ala ne'e komi rakeni guru-guru topodawa mantuki pepatuduki to nasalana sampe mana ria panjarumaka komi to naroso.

¹⁸Tapi komi kana mantambai mosinjani belo ante Pueta Yesus Kristus, Magau to Mompakasalama, bo mantambai mombarasai towe belona riara nggatuwu komi. I'amo to masipato ratoiyata bo rabilata we'i-we'i pade sampe ri kasae-saena. Amin! Tabe nggari ja'iku, Petrus