Read Da'a Kaili 1 YOHANES 2 Bible Online

1 YOHANES 2 - Da'a Kaili bible

1 YOHANES 2

¹Ana-anaku, patujuku mantulisi tesa e'i ka komi ala komi ne'e mowia silaka. Tapi ane maria to mowia silaka, naria samba'a topanjaliku kita, etumo Yesus Kristus to nanoa rarana. I'amo to manjaliku kita ri ngayo Umana Alatala.

²Yesus etumo to namate nisuku Alatala mombasompo silaka-silakata. Pade da'a aga silakata to nisompona, tapi silaka pura-pura manusia wo'u.

³Ane kita mantuki parenta-parenta Alatala, etumo tandaina kita nosinjani belo ante I'a.

⁴Tau to nanguli, “Aku nosinjani belo ante Alatala,” tapi da'a nantuki parenta-parentana, tau etu topodawa. Da'a ntoto naria pepatuduki to nakonona naboli riara nta'ina.

⁵Tapi isema-sema nantuki parenta Alatala, tau etumo to nompotowe Alatala ante mpu'u-mpu'u rarana. Ante jala iwe'imo nanotomo kita mpu'u-mpu'u natuwu nosaongu rara ante Alatala:

⁶Isema-sema manguli i'a natuwu nosaongu rara ante Alatala kana mompasiala katuwu Kristus.

⁷Sampesuwu-sampesuwu to nipotoweku, aku da'a mantulisi ka komi sangele parenta to nabouna. Tapi etu parenta to nasaemo ninjani komi, nompamula nggari pamulana komi nomparasaya i Pue Yesus. Etumo parenta to niepe komi nokolu to nanguli, “Posipotowemo komi samba'a bo samba'a.”

⁸Tapi naupa iwetu, parenta to nitulisiku ka komi etu nireke parenta nabou wo'u, sabana batuana to nakonona parenta etu natikita riara nggatuwu i Pue Yesus pade riara nggatuwu komi topomparasaya I'a wo'u. Etu nanoto ka kita sabana rumau nompamula nalipo nggari dunia e'i pade reme to nakonona nompamula newanta.

⁹Isema-sema to nanguli i'a natuwu riara reme tapi i'a nomporau rara sampesuwuna, tau etu bate-batena naria riara rumau sampe we'i-we'i.

¹⁰Tau to nompotowe sampesuwuna, tau etumo to natuwu riara reme sampe da'a ria sangele ri ja'ina to mamala mompakanawu i'a riara silaka.

¹¹Tapi tau nomporau rara sampesuwuna, tau etumo batena naria riara rumau. I'a nolumako riara rumau, pade da'a ninjanina ri umbamo jalana sabana rumau etu nompakarumau matana sampe i'a da'a mamala manggita.

¹²Ana-anaku, aku mantulisi tesa e'i ka komi sabana silaka komi niampungimo nggari kamate i Pue Yesus.

¹³Aku mantulisi tesa e'i ka komi, totu'a-totu'a, sabana nosinjanimo komi ante i Pue Yesus to naria mamimo nggari lamba pamulana. Aku mantulisi tesa e'i ka komi, kabilasa bo randoo, sabana komi naopumo nombadagi Magau nu Seta.

¹⁴Aku nantulisi tesa e'i ka komi, ana-anaku, sabana komi nosinjanimo komi ante Umata Pue Alatala. Aku nantulisi tesa e'i ka komi, totu'a-totu'a, sabana nosinjanimo komi ante i Pue Yesus to naria nggari lamba pamulana. Aku nantulisi tesa e'i ka komi, kabilasa bo randoo sabana narosomo pomparasaya komi. Tesa nu Alatala naria riara nta'i komi, pade nidagi komimo Magau nu Seta.

¹⁵Ne'e komi mompotowe dunia bara kaja'ana nuapa-nuapa to naria riarana. Ane komi mompotowe dunia komi da'a mompotowe Umata Pue Alatala.

¹⁶Pura-pura kaja'ana to naria riara dunia e'i da'a nopu'u nggari ja'i Alatala. Dota rara to naja'ana, kario mata, pade kalanga rara nantoiya koro mboto, etu pura-pura aga nopu'u nggari dunia to naja'a e'i.

¹⁷Dunia bo pura-pura to naria riarana to nipoino manusia mana masaeka malipo, tapi tau to nantuki dota nu Alatala kana matuwu mabelo sampe ri kasae-saena.

¹⁸Ana-anaku, namosumo kaopu nu dunia. Niepe komimo Bali Kristus kana marata. Pade we'i-we'i nadeamo bali Kristus neumba. Etu tandaina namosumo kaopu nu dunia.

¹⁹Bali-bali Kristus iramo tau-tau to nariamo ri tatongota bopia, tapi ira kakonona da'a saongu pomparasaya ante kita. Ane ira mpu'u-mpu'u saongu pomparasaya ante kita, natantumo ira bate-batena nosanggani-nggani ante kita. Tapi ira nompalasi kita. Etu najadi ala manoto ira pura-pura da'a mpu'u saongu pomparasaya ante kita.

²⁰Tapi sampesuwu-sampesuwu, komi nipesua Nosa Nagasa nu Alatala to nipopana'u Yesus Kristus. Etu sampe komi pura-pura nangginjani pepatuduki to nakonona.

²¹Aku nantulisi tesa e'i ka komi da'a sabana nipekiriku komi da'a nangginjani pepatuduki to nakonona. Tapi nitulisiku ka komi sabana pepatuduki etu mpu'u-mpu'u ninjani komimo. Pade ninjani komi wo'umo da'a naria tesa dawa riara pepatuduki to nakonona.

²²Isema tau topodawa? I'amo tau to nanguli Yesus da'a Magau to Mompakasalama to nijanji Alatala. Tau etumo bali Kristus. I'a da'a nompangaku Umata Pue Alatala pade Anana Yesus.

²³Tau to da'a nompangaku Ana nu Alatala, i'a da'a ana Umata Pue Alatala. Tapi tau to nompangaku Ana nu Alatala, i'a wo'u najadi ana Umata Pue Alatala.

²⁴Jadi sampesuwu-sampesuwuku, kana rapariara nta'i komi mpakabelo-belo pepatuduki to niepe komi nggari pamulana komi nomparasaya i Pue Yesus. Ane etu mpu'u-mpu'u rapariara nta'i, komi bate-batena matuwu mosaongu rara ante i Pue Yesus bo Umana Pue Alatala.

²⁵Iwe'imo to nijanji i Pue Yesus mboto ka kita: Kita kana matuwu mabelo ante I'a sampe ri kasae-saena.

²⁶Nitulisiku ka komi tesa e'i to nantesa tau-tau to nompasimbuku mompatuduki pepatuduki to nasalana ka komi.

²⁷Tapi kakonona mana paraluu tau ntanina mompatuduki komi, sabana komi nipesua Nosa Nagasa nu Alatalamo to nipopana'u i Pue Yesus. Pade Nosa Nagasa etumo naria ri ja'i komi mompatuduki ka komi mpengele-ngele to nabelona. Pepatudukina etu nakono pura, da'a ria to nasalana. Sabana etu komi kana maroo matuwu mosaongu rara ante i Pue Yesus ewa to nipatuduki Nosa Nagasa ka komi.

²⁸Jadi ana-anaku, komi kana maroo matuwu mosaongu rara ante i Pue Yesus ala da'a maeya matata mantingayo I'a bo da'a ria ekata tempo I'a marata bali ri dunia.

²⁹Ninjani komimo i Pue Yesus nanoa rarana. Sabana etu kana ranjani komi wo'u, isema-sema to nompowia to nanoana, iramo ana-ana nu Alatala.