Read Da'a Kaili 1 YOHANES 3 Bible Online

1 YOHANES 3 - Da'a Kaili bible

1 YOHANES 3

¹Kita we'i! Nabete mpu'u towe Alatala ka kita sampe kita nipangakuna anana. Pade mpu'u-mpu'u kita anana mami! Etu sampe bali-bali Alatala ri dunia e'i da'a nosinjani ante kita, sabana ira da'a nosinjani ante Alatala.

²Sampesuwu-sampesuwu to nipotoweku, we'i-we'i kita ana nu Alatala. Da'apa ninjanita iwenumo katuwuta ri ja'i Alatala banepiana. Tapi ninjanitamo tempo I Pue Yesus marata bali ri dunia kita kana majadi nasimbayu ewa I'a mboto, sabana kita kana manggita lenjena mpu'u.

³Isema-sema to naria panjarumaka etu ri ja'i Pue mombajagai korona nggari silaka ala i'a mpu'u-mpu'u magasa nasimbayu ewa i Pue Yesus.

⁴Tau-tau nompowia silaka nombaliunaka Atura-atura Alatala, sabana pura-pura powia to nombaliunaka Atura-atura Alatala, etumo to niuli silaka.

⁵Ninjani komimo patuju karata i Pue Yesus ri dunia, etumo ala mompakalipo pura-pura silaka. Pade I'a mboto da'a ntoto nasilaka.

⁶Jadi isema-sema to natuwu nosaongu rara ante I'a, mana nompowia silaka. Tapi tau to nompowia silaka, da'apa ninjanina i Pue Yesus ante nanoto, pade da'a ntoto nosinjani ante I'a.

⁷Ana-anaku, ne'e komi mompaloga tau manggeni komi mantuki pepatuduki to nasalana. Toramo! Isema-sema nompowia to nanoana, tau etumo to nireke Alatala nanoa nasimbayu ewa i Pue Yesus wo'u nanoa.

⁸Tapi tau to nompowia silaka, i'a etumo ana nu Magau nu Seta, sabana Magau nu Seta nompowia silaka mamimo nggari lamba pamulana. Patuju Ana nu Alatala narata ri dunia etumo ala mompakaropu powia Magau nu Seta etu.

⁹Tau to najadi ana nu Alatala da'a nompowia silaka, sabana inggu Alatala mboto naria riara nta'ina. I'a mana mamala mompowia silaka sabana i'a mboto najadi ana nu Alatala.

¹⁰Tapi isema-sema da'a nompowia to nanoana da'a ana nu Alatala. Wa'a wo'u tau to da'a nompotowe roana. Etumo posisalana ana nu Alatala bo ana nu Magau nu Seta.

¹¹Iwe'imo kareba to niepe komi nggari pamulana komi nomparasaya i Pue Yesus: kita kana mosipotowe samba'a bo samba'a.

¹²Ne'e kita mompasiala inggu i Kain. I'a ana nu Magau nu Seta pade i'a nompatesi tua'ina mboto. Nuapa sabana i Kain nompatesi tua'ina mboto? Sabana powia i Kain nadenggo tapi powia tua'ina nanoa. [1]

¹³Jadi sampesuwu-sampesuwuku, ne'e komi matekaja ane tau-tau to da'a nomparasaya Alatala nomporau rara komi.

¹⁴Tapi kita e'i da'a nomporau rara roa-roata. Kita e'i nompotowe roa-roata. Etumo tandaina kita nikabasakamo nggari pesuku Alatala pade niratatamo katuwua nabelo sampe ri kasae-saena. Aga tau da'a nepotowe damasipato rasuku Alatala sampe ri kasae-saena.

¹⁵Isema-sema nomporau rara sampesuwuna, i'a etu topepatesi. Pade ninjani komi mbotomo da'a ria samba'a topepatesi mombarata katuwua mabelo sampe ri kasae-saena.

¹⁶Nggari jonjo i Pue Yesus kita nangginjani batuana towe. I'a namate ala mompakasalama kita. Jadi kita wo'u masipato mantulungi roa-roata nau sampe kita mamate.

¹⁷Ane rapana maria samba'a tau to nagana katuwuna manggita roana nakabu tapi i'a da'a madota mantulungi roana etu, natantumo da'a ntoto ria towe Alatala riara nta'ina!

¹⁸Ana-anaku, ne'e kita mompotowe roata aga ri sumba bara aga ante tesata. Kita kana mompotowe ante mpu'u-mpu'u rarata pade mompopokita towe etu ante powiata to nabelona.

¹⁹Ane kita mompotowe roata ante rarata mpu'u-mpu'u etumo tandaina kita mpu'u-mpu'u ana nu Alatala, pade masana rarata ri ngayo Umata Pue Alatala.

²⁰Naupa kita rapakasala pekiri rara nta'ita mboto, danamalapa masana rarata sabana Alatala da'a nompakasala kita. Ninjanina pura-pura katuwuta pade I'a neliu nggakuasa nggari rara nta'ita to nompakasala kita.

²¹Jadi sampesuwu-sampesuwu to nipotoweku, ane kita da'a nipakasala pekiri rara nta'ita mboto, mabia kita mantingayo Alatala.

²²Pade nuapa to raperapita nggari ja'ina natantumo kana rawaina ka kita, sabana kita natundu riara parenta-parentana pade kita nompowia to nompakadamba rarana.

²³Iwe'imo to niparentana ka kita: kita kana momparasaya Anana Yesus Kristus. Pade kita kana mosipotowe samba'a bo samba'a ewa to niparenta i Pue Yesus mboto ka kita.

²⁴Isema-sema to natundu riara parenta-parenta nu Alatala, ira natuwu nosaongu rara ante I'a, pade Alatala wo'u natuwu nosaongu rara ante ira. Pade tandaina Alatala natuwu nosaongu rara ante kita etumo naria Nosa Nagasana riara nta'ita to niwaina ka kita.