Read Da'a Kaili 1 YOHANES 4 Bible Online

1 YOHANES 4 - Da'a Kaili bible

1 YOHANES 4

¹Sampesuwu-sampesuwu to nipotoweku, ne'e komi momparasaya pura-pura tau to nanguli naria Nosa Nagasa nu Alatala ri ja'ina. Tapi uji ntanimo ruru ala ranjani ane nosa to naria ri ja'i ira Nosa Nagasa nu Alatala bara da'a. Niuliku iwetu sabana nadeamo nabi topodawa ri umba-umba ri dunia we'i-we'i.

²Iwe'imo akala komi mangginjani ane nosa etu Nosa Nagasa nggari ja'i Alatala bara da'a. Tau to nompangaku Yesus Kristus narata ri dunia netimbali najadi manusia, tau etumo naria Nosa Nagasa nggari ja'i Alatala.

³Tapi tau da'a nompangaku i Pue Yesus da'a naria Nosa Nagasa nggari ja'i Alatala. Tau etu naria nosa nggari ja'i Bali Kristus. Niepe komimo Bali Kristus kana marata, pade we'i-we'i nariamo i'a riara dunia e'i.

⁴Tapi ana-anaku, komimo ana-ana nu Alatala pade nidagi komimo nabi-nabi topodawa etu, sabana nelabipa kuasa Nosa Nagasa to naria riara nta'i komi pade kuasa Magau nu Seta to nombakuasai dunia to naja'a e'i.

⁵Nabi-nabi topodawa etu nopu'u nggari dunia to naja'a e'i. Etu sampe ira nompatuduki pepatuduki to nopu'u nggari dunia, pade tau-tau nggari dunia e'i wo'u madota mompetalinga ira.

⁶Tapi kita nopu'u nggari ja'i Alatala. Etu sampe tau to nosinjani ante Alatala nompetalinga pepatudukita. Tapi tau-tau da'a nomparasaya Alatala da'a nompetalinga pepatudukita. Jadi nggari setu ninjanita isema to naria Nosa Nagasa nggari ja'i Alatala pade isema to naria nosa nggari ja'i Magau nu Seta. To naria nosa nggari ja'i Magau nu Seta etu da'a madota mompetalinga tesa Alatala to nakonona.

⁷Sampesuwu-sampesuwu to nipotoweku, kamaimo kita mosipotowe samba'a bo samba'a, sabana towe nopu'u nggari ja'i Alatala, pade isema to nompotowe roana, etu tandaina i'a etu ana nu Alatala bo i'a nosinjani ante Alatala.

⁸Tapi tau da'a nompotowe roana da'a nosinjani ante Alatala, sabana Alatalamo to natowena.

⁹Alatala nompo pokita towena ka kita ante nompakau Anana to samba'a lau mpaka ri dunia ala nggari kamatena kita mamala matuwu sampe ri kasae-saena.

¹⁰Iwe'imo to niulika towe: Da'a kita to nompotowe Alatala tapi Alatala to nompotowe kita sampe I'a nompakau Anana mboto rasuku majadi posompo silakata.

¹¹Sampesuwu-sampesuwu to nipotoweku, ane iwetumo towe Alatala ka kita, masipato wo'u kita mosipotowe samba'a bo samba'a.

¹²Da'apa naria samba'a manusia nanggita Alatala. Tapi ane kita tunggai mosipotowe samba'a bo samba'a, Alatala naria riara nta'ita, pade ante iwetu towena mpu'u-mpu'u najadi nagana riara nggatuwuta.

¹³Iwe'imo tandaina sampe ninjanita kita natuwu nosaongu rara ante Alatala pade I'a natuwu nosaongu rara ante kita: Naria Nosa Nagasana riara nta'ita.

¹⁴Da'a aga iwetu, kami anaguru-anaguruna mbotomo nanggita Ana nu Alatala pade kami nompatolele ka tau Umata Pue Alatala nompakau Anana mpaka ri dunia e'i ala majadi Magau to Mompakasalama manusia.

¹⁵Isema-sema to nompangaku Yesus Ana nu Alatala, tau etumo to natuwu nosaongu rara ante Alatala, pade Alatala natuwu nosaongu rara ante i'a.

¹⁶Jadi ninjanitamo towe Alatala ka kita, pade niparasayatamo towena etu. Toramo! Alatalamo to natowena, jadi isema-sema tunggai nompotowe roana, tau etumo bate-batena natuwu nosaongu rara ante Alatala, pade Alatala bate-batena natuwu nosaongu rara ante i'a.

¹⁷Ante iwetu towena najadi nagana riara nggatuwuta sampe kita mabia ri Eo Mpotangara banepia. Kita mabia ri eo etu tempo i Pue Yesus mombatangara manusia, sabana kita ri dunia e'i nipotowe Alatala nasimbayu ewa I'a nompotowe i Pue Yesus.

¹⁸Isema to nombarasai towe Alatala da'a ria eka rarana, sabana towe Alatala to nagana etu nompopalai eka rarana. Aga tau masipato rasuku to naekana. Jadi isema-sema naeka mompekiri Eo Mpotangara batuana da'apa nitarimana towe Alatala to naganana etu.

¹⁹Kita mompotowe roata sabana Alatala nokolumo nompotowe kita.

²⁰Ane maria samba'a tau manguli, “Aku nompotowe Alatala,” tapi i'a nomporau rara sampesuwuna mboto, tau etu topodawa. Ane i'a da'a nompotowe sampesuwuna to nikita matana mboto, natantumo da'a mamala i'a mompotowe Alatala to da'apa sanggani nikitana!

²¹Etu sampe naria parenta nggari ja'i Alatala to nanguli, “Isema-sema nompotowe Alatala, i'a kana mompotowe sampesuwuna wo'u.”