Read Da'a Kaili 2 YOHANES 1 Bible Online

2 YOHANES 1 - Da'a Kaili bible

2 YOHANES 1

¹Sura e'i nggari ja'iku topanggeniaka topomparasaya, ka komi totu'a besi to nipelisi Alatala, pade ka ana-anamu. Aku mpu'u-mpu'u nompotowe komi pura-pura, pade da'a aga aku tapi pura-pura tau to nangginjani pepatuduki to nakonona wo'u.

²Kami pura-pura nompotowe komi sabana kita mpasanggani-nggani naroo nantuki pepatuduki to nakonona. Pepatuduki etu bate-batena naria ri ja'ita sampe ri kasae-saena.

³Perapi towe belo Umata Pue Alatala bo Anana Yesus Kristus maria ri ja'ita. Perapi ira maasi mata manggita kita pade mombawai ka kita katuwua mabelo. Etu pura-pura majadi ri ja'ita to naroo nantuki pepatuduki to nakono etu, pade to nompotowe roa-roata.

⁴Nadamba mpu'umo raraku nangepe kareba to nanguli naria anamu natuwu nantuki pepatuduki Alatala to nakonona ewa to niparenta Umata Alatala mboto ka kita.

⁵Jadi we'i-we'i, indo, kuperapi ka komi ante mpu'u-mpu'u, ala kita mosipotowe samba'a bo samba'a. To nitulisiku e'i da'a parenta to nabouna, tapi etu parenta to niwai ka kita nggari pamulana kita nomparasaya i Pue Yesus.

⁶Iwe'imo to niulika towe: kita kana matuwu mantuki parenta Alatala. Iwe'imo parenta to niepe komi nggari pamulana etu: Kita kana matuwu ante mosipotowe samba'a bo samba'a.

⁷Nadeamo topebagiu neumba pade nalau ri umba-umba ri dunia. Ira etu tau-tau to da'a nompangaku Yesus Kristus narata ri dunia netumbali najadi manusia. Tau-tau etumo topodawa bo bali Kristus.

⁸Etu sampe komi kana mainga, ne'e sampe malipo nggari ja'i komi nuapa to nipatuduki kami ka komi. Komi kana mainga ala komi mamala mombarata pura-pura rasi to nipakasadia Alatala ka komi.

⁹Isema-sema da'a naroo mantuki pepatuduki Kristus tapi aga manggabasaka pepatuduki etu, tau-tau etu da'a naria Alatala riara nta'i ira. Tapi isema-sema naroo mantuki pepatuduki Kristus, iramo to naria Umata Pue Alatala bo Anana riara nta'ina.

¹⁰Jadi ane maria tau marata ri ja'i komi to nompatolele pepatuduki to nosisala nggari pepatuduki Kristus, ne'e ratarima ira rara njapo komi. Ne'e komi mombatabe ira,

¹¹sabana ane komi mombatabe ira, batuana komi najadi topantulungi ira nowia to naja'ana.

¹²Danadeapa to kutesa ka komi, tapi nipekiriku nabelopa ne'e ratulisi riara sura. Nisarumakaku aku mboto mamala marata ri ja'i komi pade kita mamala motesa mosirata mata ala mpu'u-mpu'u madamba rarata mpasanggani-nggani.

¹³Nadea tabe nggari ja'i ana-ana nu sampesuwumu ri se'i to nipelisi Alatala wo'u.