Read Da'a Kaili PANGGITA 1 Bible Online

PANGGITA 1 - Da'a Kaili bible

PANGGITA 1

¹Isi buku e'i nantesa panggita nggari ja'i Yesus Kristus. I'a nipakau Alatala mompopokita ka batua-batuana nuapa to da'a mana masaeka majadi. Yesus nompakau malaekana malau mompopokita etu pura-pura ka batuana Yohanes.

²Pade Yohanes nompasimbayu pura-pura nuapa to nikitana, etumo tesa nggari ja'i Alatala bo posabi nggari ja'i Yesus Kristus.

³Masana mpu'u tau to mombabasa tesa-tesa to niboto riara buku e'i bo tau-tau to mangepe bo mantuki nuapa to nitulisi riarana. Sabana mana masaeka pura-pura etu kana majadi.

⁴Tesa e'i nggari ja'iku Yohanes ka todea topomparasaya i Pue Yesus ri pituongu ngata ri Propinsi Asia. Perapi Pue Alatala mombawai ka komi rasi bo katuwua mabelo. Rasi etu nggari ja'i Alatala to nariamo nggari lamba pamulana, bo to naria we'i-we'i, pade to maria sampe ri kasae-saena. Pade rasi etu wo'u nggari ja'i papitu nosa nu Alatala to naria ri ngayo pekatoko nu Alatala, [1]

⁵pade nggari ja'i Yesus Kristus. I'amo sabi to namala raparasaya, I'amo to pamula-mulana nipakatuwu bali nggari kamatena. I'amo topoparenta pura-pura magau riara dunia. I'a nompotowe kita pade ante leina I'a nanggabasaka kita nggari silakata pura-pura.

⁶Kita nipajadina todea riara poparentana, kita nipajadina topanggeni-topanggeni agama to nanggeni pesomba ka Umana Alatala. Perapi Yesus Kristus ratoiya bo rabila, perapi I'a moparenta sampe ri kasae-saena. Amin!

⁷Kitamo! I'a marata nibungu kulimu. [2] I'a kana rakita mata pura-pura tau, nabeloka ira to nombasaku usuna. [3] Pade pura-pura manusia ri dunia kana mageo mpajea manggita I'a. Etu mpu'u-mpu'u kana majadi! Amin!

⁸Pue Alatala nanguli, “Aku e'imo pamulana bo kaopuna. Aku to naria mamimo nggari lamba pamulana, Aku naria we'i-we'i pade Aku kana maria sampe ri kasae-saena. Akumo to neliu nggakuasa.”

⁹Aku e'i Yohanes, sampesuwu komi riara i Pue. Nasimbayu ante komi aku wo'u nipandasa sabana nomparasaya i Pue Yesus, bo nasimbayu ante komi aku wo'u nombarata bagia riara poparentana, pade aku wo'u naroo tempo nipandasa nasimbayu ante komi. Aku nipatani ri saongu lewuto nosanga ka Lewuto Patmos, sabana nompatolele Tesa nu Alatala pade nompangaku Yesusmo Pueku.

¹⁰Tempo Eo Mpepue aku nikuasai Nosa Nagasa nu Alatala, pade niepeku suara nggari talikuku to namangga mpu'u ewa wamba nu kololio.

¹¹Suara etu nanguli iwe'i: “Tulisimo nuapa to mukita pade pakatumo ka todea topomparasaya to neto'o ri pituongu ngata, etumo ngata Efesus, ngata Smirna, ngata Pergamus, ngata Tiatira, ngata Sardis, ngata Filadelfia pade ngata Laodikia.”

¹²Nangepe etu aku nakampeili madota manggita isema notesa ka aku. Tempo aku nakampeili nikitaku papitu kada mpoindo bulawa.

¹³Ri tatongo kada mpoindo etu naria samba'a tau, lenjena ewa Ana nu Manusia. [4] Baju nipasuana nandoe mpu'u narata ri kadana, pade naria pompo'u bombarana bulawa.

¹⁴Balenggana bo wo'ona nabula nju'u ewa kapa bo salju. Pade matana najela ewa jela nu apu.

¹⁵Kadana naralei ewa tambaga nitunu riara apu. Pade suarana namangga mpu'u ewa soo nu ue bete.

¹⁶Ri pale ngganana naria pituongu betu'e, pade nggari ngangana nesuwu samata guma nomata ntimali to nataja mpu'u. Pade lenjena ewa wana nu eo ri eo ntongo.

¹⁷Tempo aku nanggita I'a kaliu-liu aku nadungga ntuobo ri ngayona ewa tomate. Tapi I'a nombadika pale ngganana ri koroku pade nanguli, “Ne'e iko maeka. Aku e'imo pamulana bo kaopuna.

¹⁸Aku e'imo to natuwuna. Bopia aku namatemo. Tapi kitamo, we'i-we'i aku natuwu bali sampe ri kasae-saena. Akumo to nakuasa nanjoko kunci kamatea bo peto'o ntomate.

¹⁹Sabana etu tulisimo nuapa pura to nikitamu, nabeloka to najadi we'i-we'i, nabeloka nuapa to majadi banepia.

²⁰Da'a ninjanimu batuana pituongu betu'e to nikitamu ri pale ngganaku e'i bo papitu kada mpoindo bulawa. Iwe'imo batuana: pituongu betu'e etu nombagambara pitumba'a malaeka to nanggeniaka todea topomparasaya Aku to neto'o ri pituongu ngata. Pade papitu kada mpoindo bulawa etu nombagambara todea topomparasaya to naria ri pituongu ngata etu.”