Read Da'a Kaili PANGGITA 10 Bible Online

PANGGITA 10 - Da'a Kaili bible

PANGGITA 10

¹Naopu etu aku nanggita samba'a malaeka ntanina to naroso mpu'u nana'u nggari suruga. I'a nibungu kulimu pade balenggana niwewe sampinoraa. Lenjena ewa kareme eo pade kadana ewa tinja to najela ewa apu.

²Kada ngganana nombalonggo tasi pade kada njidina nombalonggo kabatana. Ri palena naria saongu buku nggedi to natibukamo.

³Pade nongaremo i'a ante suara to namangga mpu'u, ewa kagai ngao nu singa. Sangga nongarepa malaeka etu nepogumo pituongu guntu damo nosinjono poguna notesa ewa manusia.

⁴Naopu pituongu guntu etu notesa aku nadota mantulisi nuapa to niuli suara guntu etu. Tapi naria suara nggari suruga nanguli ka aku, “Tabuniakamo tesa to niuli suara nggari pituongu guntu etu! Ne'e mutulisi etu!”

⁵Naopu etu malaeka to nikitaku pani'a to nombalonggo tasi bo kabatana nangonggotaka pale ngganana mpaka ri langi.

⁶Pade nojanjimo i'a ante sanga Pue Alatala to natuwu sampe ri kasae-saena, to nompajadi langi, dunia bo tasi pade pura-pura isina. Niuli malaeka etu, “Tempona da'a mana mamala rabonto-bonto.

⁷Ane malaeka kapitumba'ana etu mompopomoni kololiona, tempo etumo Alatala kana mompakadupa niana to nasaemo nitabuniaka, ewa to niulina ka batua-batuana nggaolu, etumo nabi-nabi to nompasimbayu tesa nggari ja'ina.”

⁸Naliu etu suara to niepeku nggari suruga pani'a nanguli wo'umo ka aku, “Kalaumo iko, alamo buku nggedi to natibukamo to nisoko malaeka to nombalonggo tasi bo kabatana etu.”

⁹Jadi nalaumo aku nompakamosu malaeka etu pade niuliku ka i'a, “Wai ka akumo buku nggedi etu.” Nangulimo i'a ka aku, “Alamo bo konimo mpakaopu buku e'i. Riara nta'imu buku e'i kana majadi mapa'i, tapi riara ngangamu kana murasai namomi mpu'u ewa ue wani.” [19]

¹⁰Pade nialakumo buku nggedi nggari pale malaeka etu, pade nikonikumo sampe naopu. Riara ngangaku namomi nirasaiku ewa ue wani. Tapi sangga niomeku napa'i nirasaiku riara nta'iku.

¹¹Naopu etu aku nipakau wo'umo, “Iko kana mompasimbayu tesa nggari ja'i Alatala ka tau dea, etumo todea nggari mpengele-ngele ngata ri dunia to notesa mpengele-ngele basa, pade ka magau-magau wo'u.”