Read Da'a Kaili PANGGITA 11 Bible Online

PANGGITA 11 - Da'a Kaili bible

PANGGITA 11

¹Naopu etu aku niwai ka sanggoto lembau nolenje mpokayu rapotomo. Pade aku niparenta iwe'i: “Kalaumo iko mombatomo Sapo Mpepue ante Meja Mpesomba. Pade bila wo'u sakuya kadea ntau nepue riara Sapo Mpepue etu.

²Tapi ne'e mutomo lalowo ri sawaliku Sapo Mpepue etu, sabana lalowo etu niwai ka tau-tau da'a to Yahudi. Ira kana mompakatantoru ngata Yerusalem to nagasa patampulu bo rombula kasaena. [20]

³Ri tempo etu Aku kana mombasuro romba'a tau mompasimbayu tesa nggari ja'iku. Ante mompake baju to nipowia nggari karu ewa tau nasusa rara ira kana mompasimbayu tesa nggari ja'iku sanjobu roatu bo onompulu eo kasaena.” [21]

⁴Romba'a tau etu nirapaka ewa rompu'u kayu zaitun bo rongu kada mpoindo to nipopekanggore ri ngayo Pue nu njumaongu dunia. [22]

⁵Ane maria tau madota mompakaja'a romba'a tau etu, kana maria apu mesuwu nggari nganga ira mompakaropu bali-bali ira etu. Isema-sema madota mompakaja'a ira kana rapatesi iwetu.

⁶Ira romba'a etu nakuasa manta'amaka ala uja da'a madunggu nggari langi sakuya kasaena ira mompasimbayu tesa nggari ja'i Alatala. Ira wo'u nakuasa ri salu-salu nu ue ala mombabali ue-ue etu majadi lei. Pade ira nakuasa mompandasa dunia ante mpengele-ngele kasusana nepia rapodota ira.

⁷Ane maopumo ira romba'a mompasimbayu tesa nggari ja'i Alatala kana marata sangele binata naja'a mosibali ka ira. Binata naja'a etu to mesuwu nggariara lowu ndala to da'a namala nitudu kandalana. I'a kana mombadagi romba'a tau pani'a pade mompatesi ira.

⁸Pade watabaku ira romba'a etu kana rapalamba nakandoo ri jala jama riara ngata bete, etumo ri peto'o Pue ira nipatesi ri kayu parika. Ngata bete etu nidae Sodom bo Masir sabana naja'a mpu'u todeana. [23]

⁹Tolumbengi santongo kasaena watabaku ira romba'a da'a rapaloga ratana ri dayo, aga rakita ntau nggari njumaongu dunia, nggari butu-butu ngata, bo butu-butu todea to notesa nompengele-ngele basa ri dunia.

¹⁰Manggita etu tau-tau to neto'o ri dunia kana madamba mpu'u. Ira kana mosusa madamba-damba bo mosiwai ka parasee samba'a bo samba'a, sabana namatemo romba'a tau etu to mpu'u-mpu'u nompandasa tau pura-pura to neto'o ri dunia.

¹¹Tapi nikitaku naopu tolumbengi santongo etu, narata balimo nosa ira nggari ja'i Alatala. Natuwu balimo ira pade kaliu-liu nekanggore ri setu. Nanggita etu naeka mpu'umo pura-pura tau.

¹²Naopu etu nariamo suara nggari suruga to namangga mpu'u nanguli ka ira romba'a, “Kamai, peponemo wemai!” Pade neoremo ira mpaka ri suruga riara kulimu nikita mata nu tau-tau to najadi bali ira etu.

¹³Ri tempo etu wo'u sampegoli najadimo lingu bete. Pade nageromo sabagia nggari sampulu bagia nggari ngata bete etu, pade pitunjobu mba'a tau namate sabana lingu bete etu. Nanggita etu nawiora mpu'umo rara tau-tau to danatuwu ri setu, pade ira nanguli, “Nabete mpu'u kuasa nu Alatala to naria ri suruga!”

¹⁴Jadi naliumo pepandasa karongganina. Mana masaeka pepandasa katolungganina wo'u kana majadi.

¹⁵Naopu etu malaeka kapitumba'ana nompopomoni kololiona. Pade kaliu-liu nariamo suara-suara ri suruga nongare ante namangga mpu'u iwe'i: “We'i-we'i pura-pura poparenta ri dunia e'i najadi poparenta Pueta bo poparenta Magau to Mompakasalama to nijanji Alatala. I'a kana moparenta sampe ri kasae-saena!”

¹⁶Pade rompulu bo patamba'a totu'a to nekatoko ri pekatoko ri ngayo Alatala nekadede sanggani sampe ri tana mombasomba Alatala.

¹⁷Niuli ira, “O, Pue Alatala to nabete mpu'u kuasamu to nariamo nggari lamba pamulana pade bate-batena naria we'i-we'i, kami nanguli tarima kasi ka Komi apa nipopokita Komimo kuasamu to nabetena. Nompamulamo Komi moparenta!

¹⁸Tau-tau da'a nosinjani ante Pue nanggarau. Naratamo ntoana Pue mompopesuwu rau rara ka ira. Naratamo ntoana mombatangara tau-tau to namate. Pade narata wo'umo ntoana mombawai tambo ka batua-batuamu, etumo ka nabi-nabi to nompasimbayu tesamu, pade ka pura-pura todeamu, ira to nekou ri ja'imu, Pue, nabeloka tau to naede katuwuna, nabeloka tau to nalanga katuwuna. Naratamo ntoana Pue mompakaropu tau-tau to nompakagero dunia e'i.”

¹⁹Naopu etu natibeamo pewobo Sapo Mpepue ri suruga pade riara sapo etu nikitamo Peti Pojanji Alatala. [24] Tempo etu kila damo mparea pade guntu bete damo nosinjono poguna. Najadimo lingu bete ante uja es to naromba mpu'u.