Read Da'a Kaili PANGGITA 12 Bible Online

PANGGITA 12 - Da'a Kaili bible

PANGGITA 12

¹Naliu etu natikitamo saongu tandai ri langi to mpu'u-mpu'u nipogumaa. Naria samba'a besi nopakea mata eo. I'a nekanggore ri bunggu wula, pade ri balenggana naria songgo to nipowia nggari sampulu rongu betu'e.

²Besi etu natianamo da'a mana masaeka moana sampe I'a nodadeo sabana ju'a mpoana.

³Pade natikita wo'umo saongu tandai ntanina ri langi to mpu'u-mpu'u nipogumaa. Naria sanggayu ule bete to nalei, sangana ule naga. Ule naga etu papitu balenggana pade sampulu tanduna. Butu-butu balenggana naria songgo magau.

⁴Ante lelona ule naga etu nangumbunjai sabagia nggari tolubagia nggari betu'e ri langi, pade nitajiakana mpaka ri dunia. I'a nekanggore ri ngayo besi to madota moana etu ala mamala i'a mangome ana nu besi etu ane mesuwumo.

⁵Pade besi etu nangote samba'a ngana langgai. Ngana etumo to mombaewu njumaongu dunia ante karosona ewa karoso lembau ase. [25] Da'apa ule naga namala mangome I'a sampegoli ngana etu niore mpaka ri ja'i Alatala ri ngayo pekatoko magau ri suruga.

⁶Naopu etu nalaimo besi etu mpaka ri karawa baina. Ri setu i'a neto'o ri peto'o to nipakasadia Alatala mamimo ka i'a. Ri peto'o etu i'a nipiara sanjobu roatu bo onompulu eo kasaena. [26]

⁷Naria posibali riara suruga. Tadulako malaeka to nosanga ka i Mikhael ante malaeka-malaeka to nomporoa i'a nosibali nangewa ule naga etu. Pade ule naga etu ante malaeka-malaeka to nomporoa i'a nosibali nangewa i Mikhael.

⁸Tapi ule naga ante malaeka-malaekana da'a nompakule nangewa i Mikhael ante roa-roana. Ira nidagimo pade da'a mana nipaloga neto'o ri suruga.

⁹Ule naga etu nipopalai nggari suruga pade i'a nitajiaka mpaka riara dunia nosanggani-nggani ante malaeka-malaeka to nantuki i'a. I'a etu ule ntu'a, to nosanga ka Magau nu Seta, atau i Seta to nombabagiu manusia ri njumaongu dunia.

¹⁰Naopu etu aku nangepe suara riara suruga to namangga mpu'u nanguli, “We'i-we'i naratamo ntoana Alatala mompakasalama todeana. Nipopokitanamo kuasana, nompamulamo I'a moparenta ewa samba'a magau. Pade naratamo Magau to Mompakasalama mompopokita kuasana. Sabana nitajiakamo nggariara suruga Magau nu Seta to nombasalaraka todea topomparasaya eo wengi ri ngayo Pueta Alatala.

¹¹Tapi ira nombadagi Magau nu Seta etu ante kuasa nggari lei nu Ana Bimba. Ira nombadagi i'a ante tesa posabi ira. Ira da'a nompotowe katuwu ira, pade da'a ntoto naeka nau sampe mamate.

¹²Sabana etu, komi to neto'o ri suruga kana madamba-damba. Tapi nandasamo dunia bo tasi sabana nana'umo Magau nu Seta ri ja'imu. Narau mpu'umo rarana sabana ninjanina logana mangewa damo sampalai.”

¹³Tempo nanotomo ka ule naga i'a nitajiaka riara dunia, nompamulamo i'a nombaraga besi to lako nangote ngana langgai etu.

¹⁴Tapi besi etu niwai ka ronggapi kapi to nabetena ewa kapi tonji lowe ala i'a mamala membua mpaka ri peto'o to nipakasadia ka i'a ri karawa baina. Ri setu i'a kana rapiara tolumpae santongo kasaena, [27] pade i'a rakalendu ala da'a mamala rakuya ule naga etu.

¹⁵Ule naga etu nombasuparaka ue bete ewa karona nggari ngangana mpaka ri ja'i besi etu ala mombalomeaka i'a.

¹⁶Tapi dunia nantulungi besi etu. Kaliu-liu nganga nu dunia natibeamo pade ue bete to nisuparaka nggari nganga ule naga etu naopu pura niomena.

¹⁷Nanggita etu narau mpu'umo ule naga ri ja'i besi etu, sampe i'a nalau nombasuaki muli-muli ntanina nu besi etu, etumo tau pura-pura to natutu nantuki parenta-parenta nu Alatala pade bate-batena nompangaku Yesusmo Pue ira.

¹⁸Naopu etu nekanggoremo ule naga etu ri wiwi ntalinti.