Read Da'a Kaili PANGGITA 13 Bible Online

PANGGITA 13 - Da'a Kaili bible

PANGGITA 13

¹Naliu etu aku nanggita saongu binata nesuwu nggariara ntasi. Binata etu sampulu tanduna pade papitu balenggana. Butu-butu tanduna naria songgo ewa songgo magau, pade ri butu-butu balenggana nitulisi sanga to naria batuana to nompakakedi Alatala.[28]

²Binata to nikitaku etu ewa lenje binata to niuli “macan tutul,” pade kadana ewa kada binata to niuli “beruang,” bo sumbana ewa sumba nu singa. Pade ule naga etu nombawai ka binata etu baraka nggari ja'ina mboto bo pekatoko magauna pade kuasa to nabetena.

³Saongu nggari pituongu balengga binata etu ewa naria bela naja'a to namala mompakamate i'a. Tapi bela etu naorimo. Pura-pura isi dunia nogumaa mpu'u nanggita binata etu, pade ira pura-pura nantuki i'a.

⁴Ira nombasomba ule naga etu sabana i'a nombawai kuasa ka binata etu pade ira nombasomba binata etu wo'u. Niuli ira, “Da'a ntoto naria to nasimbayu ka binata e'i! Da'a ntoto wo'u naria to nabia mosibali ka i'a!”

⁵Binata etu nipaloga manguli tesa-tesa to nasombo-sombona pade mompakakedi Alatala. I'a wo'u nipaloga moparenta patampulu bo rombula kasaena. [29]

⁶Jadi nompamulamo i'a nompakakedi Alatala pade nompakaja'a sangana. Iwetu wo'u peto'o Alatala ri suruga bo pura-pura to neto'o ri setu nipakakedina.

⁷I'a nipaloga wo'u mosibali ka todea topomparasaya pade mombadagi ira. Pade niwai ka i'a wo'u kuasa momparenta manusia ri njumaongu dunia, etumo tau ri butu-butu ngata, butu-butu todea to notesa mpengele-ngele basa ri dunia.

⁸Pura-pura manusia to neto'o ri bengo dunia e'i kana mombasomba binata etu, etumo pura-pura tau to da'a nitulisi sangana riara Buku Katuwua tempo dunia da'apa nipajadi, etumo buku to naria ri ja'i Ana Bimba to nisambale.

⁹Sabana etu isema-sema naria talingana, epemo mpakabelo-belo tesa e'i.

¹⁰Isema-sema to nipakatantu mamimo ratawani, kana ratawani. Isema-sema to nipakatantu mamimo rapatesi ante guma, kana rapatesi ante guma. To napokona ri se'i todea topomparasaya kana maroo tempo nipandasa bo ne'e mokanggaura momparasaya.

¹¹Naliu etu aku nanggita wo'umo sangele binata naja'a ntanina nesuwu nggariara ntana. Binata etu rongu tanduna nolenje mpotandu ana bimba, pade suarana ewa suara ule naga.

¹²Binata karongelena etu ewa wakele nu binata naja'a pamulana. Jadi pura-pura kuasa binata pamulana etu nipake binata karongelena etu. Pura-pura manusia ri dunia nipasu'una mombasomba binata pamulana to naria bela to naja'a mpu'u to naorimo.

¹³Binata karongelena etu nompowia tandai-tandai to nipogumaa. Ri ngayo ntau pura-pura nipopana'una apu nggari langi nanawu riara dunia.

¹⁴Nibagiuna pura-pura tau ri dunia ante nompowia tandai-tandai etu ante baraka to niwai binata pamulana ka i'a. [30] Ira nipakauna mompowia pade mompopekanggore saongu pinoito nabete nolenje mpobinata pamulana to nitimbe mpakaja'a tapi i'a bate-batena natuwu.

¹⁵Binata karongelena niwai kuasa mombawai nosa ka pinoito etu sampe pinoito etu namala motesa. Pade niparentana isema-sema da'a madota mombasomba pinoito etu kana rapatesi.

¹⁶Pura-pura tau nipasu'u binata etu mantarima tandai ri pale nggana atau ri kire ira, nabeloka tau to naede katuwuna, nabeloka tau to nalanga katuwuna, nabeloka tau nakalumana nabeloka tau nakasiasi, nabeloka tau najadi batua nabeloka madika.

¹⁷Da'a ria samba'a tau namala mangoli atau mobalu-balu nuapa-nuapa ane da'a naria tandai etu ri pale atau ri kire ira. Tandai etu sanga nu binata pamulana mboto atau nomoro to nompakanoto sangana etu.

¹⁸Ri se'i kana paraluu tau manoto. Tau to mata'u mamala mombabila nomoro-nomoro nggari sanga binata etu, sabana nomoro etu nombagambara sanga samba'a manusia. Nomorona etumo onoatu onompulu bo aono.