Read Da'a Kaili PANGGITA 14 Bible Online

PANGGITA 14 - Da'a Kaili bible

PANGGITA 14

¹Naliu etu aku nanggita wo'umo pade kitamo, naria Ana Bimba nekanggore ri bunggu Bulu Sion. [31] Nosanggani-nggani ante I'a naria satu patampulu bo patanjobu mba'a tau to naria sanga Ana Bimba bo sanga Umana Alatala nitulisi ri kire ira.

²Pade niepeku wamba nggari suruga to nagai mpu'u ewa soo nu ue bete pade ewa pogu guntu bete to naro'ona mpu'u. Wamba to niepeku etu ewa moni musi nggari ja'i ntopomore kacapi tempo ira nokanda kacapina.

³Pade ira satu patampulu bo patanjobu mba'a to nitolo Ana Bimba nggariara dunia nodade sangaya dade to nabouna ri ngayo pekatoko Alatala bo patamba'a anu to natuwuna bo totu'a-totu'a to nantatiku pekatoko Alatala etu. Dade ira etu da'a namala nipeguru tau-tau ntanina, aga ira satu patampulu bo patanjobu mba'a etu.

⁴Ira etumo tau-tau nagasa to da'a sanggani nosampaturu ante besi. Ira nantuki Ana Bimba ri umba-umba nikalauna. Iramo to nitolo nggari tatongo manusia ri dunia pade nijuju ka Alatala bo Ana Bimba nasimbayu ewa tau nombawai asele ntinalu pamulana ka Alatala.

⁵Ira da'apa sanggani nodawa, pade da'a ntoto ria sala ira nau aga sakedi.

⁶Pade aku nanggita wo'umo samba'a malaeka ntanina nembua ri laerawa. I'a nanggeni Kareba Belo to da'a nabali sampe ri kasae-saena ka njumaongu manusia ri dunia, etumo ka tau ri butu-butu ngata, ka butu-butu todea to notesa mpengele-ngele basa ri dunia.

⁷Notesamo i'a ante suara to namangga mpu'u, “Pekoumo ri ja'i Alatala, bilamo bo toiyamo kabete kuasana! Sabana naratamo tempona Alatala mombatangara manusia! Pepuemo ka Alatala to nompajadi langi, dunia bo tasi pade pura-pura mata nu ue!”

⁸Naopu etu naria malaeka karomba'ana nantuki malaeka pamulana. Nangulimo i'a, “Nageromo! Nageromo ngata bete Babel sabana pue ngata etu nanggeni tau nggari umba-umba ri dunia mompasiala pokainggu ira nogau sala nasimbayu ewa tau nanggeni roana manginu sampe malangu!”

⁹Naopu etu naria malaeka ntanina katolumba'ana nantuki malaeka karomba'ana etu. Nongaremo i'a ante suara namangga mpu'u iwe'i: “Tau-tau to nombasomba binata naja'a ante pinoitona pade nantarima tandai binata etu ri kirena bara ri palena,

¹⁰tau-tau etu kana rapawela rau rara nu Alatala to naja'a mpu'u nasimbayu ewa tau nipasu'u manginu panginu to napa'i mpu'u. Da'a ntoto rapakakura pesuku ka ira. Ira pura-pura kana rapandasa riara apu bo watu-watu najela riara mpanggita malaeka-malaeka to nagasa bo Ana Bimba etu.

¹¹Rangasu apu to nompandasa tau-tau etu da'a maopu-opu mosumoa sampe ri kasae-saena. Eo wengi da'a ria kaopu-opuna pepandasa ira to nombasomba binata naja'a etu ante pinoitona pade to nantarima tandai sanga binata etu ri koro ira.”

¹²To napokona ri se'i todea topomparasaya Alatala kana maroo momparasaya tempo nipandasa, etumo ira to nantuki parenta-parenta Alatala bo naroo nomparasaya i Pue Yesus.

¹³Naopu etu aku nangepe suara nggari suruga to nanguli, “Tulisimo tesa e'i. Nompamula we'i-we'i nabelo mpu'umo tau-tau to natuwu nosaongu rara ante i Pue sampe namate.” Pade nesonomo Nosa Nagasa nu Alatala, “Nakono mpu'u etu. Ira masipato menonto nggari panggawia ira to natomona sabana asele nu panggawia ira etu kana mosanggani-nggani ka ira.”

¹⁴Naopu etu aku nanggita wo'umo pade kitamo, naria kulimu to nabula mpu'u. Ri bunggu nu kulimu etu naria samba'a tau nekatoko, lenjena ewa Anu nu Manusia. Ri balenggana naria songgo bulawa pade ri palena naria samata sarenggo to natajana.

¹⁵Naopu etu naria malaeka ntanina nesuwu nggari Sapo Mpepue. Pade nongaremo i'a ante suara namangga mpu'u ka tau nekatoko ri bunggu kulimu etu, “Wiatakamo sarenggomu etu, sombemo we'i-we'i, sabana temponamo mosombe! Natasamo isi dunia!”

¹⁶Jadi tau nekatoko ri bunggu kulimu etu nombawiataka sarenggona ri dunia pade isi dunia nisombenamo.

¹⁷Naopu etu nikitaku samba'a malaeka ntanina nesuwu nggari Sapo Mpepue ri suruga. I'a wo'u nanjoko samata sarenggo to natajana.

¹⁸Pade narata wo'umo samba'a malaeka ntanina nggari Meja Mpesomba. I'amo to nakuasa nanggatono apu ri Meja Mpesomba etu. Nongaremo i'a ante suara namangga mpu'u ka malaeka to nanjoko sarenggo to nataja etu, “Wiatakamo sarenggomu etu pade tirampamo wua anggur ri dunia, sabana natasamo wua anggur etu.”

¹⁹Jadi malaeka to nipakau iwetu nombawiataka mpu'umo sarenggona pade nitirampanamo wua anggur etu nggari batana, pade nitendeakana mpaka riara peto'o pompea wua anggur. Powiana etu nombagambara tempo Alatala mompopesuwu rau rarana ri ja'i ntau to naja'a pokaingguna.

²⁰Jadi wua anggur etu nipea ri peto'o pompea wua anggur etu ri sawaliku ngata. Pade noilimo lei nggari peto'o etu ewa ue karona betena, kakawao poili lei etu toluatu kilo pade kandalana namosu rongu metere.