Read Da'a Kaili PANGGITA 15 Bible Online

PANGGITA 15 - Da'a Kaili bible

PANGGITA 15

¹Naopu etu aku nanggita ri langi naria sangelepa tandai nabete to nipogumaa. Naria pitumba'a malaeka ante pitungaya pepandasa kaopuna. Ante pepandasa kaopuna etu kana maopumo rau rara nu Alatala mompokarau manusia riara dunia.

²Pade nikitaku sangele ewa tasi kaca nogalo apu. Pade ri wiwi ntasi kaca etu aku nanggita tau dea nenggore. Tau-tau etu iramo to nombadagi binata naja'a sabana ira da'a ntoto nombasomba i'a, pade ira da'a nombasomba pinoito binata etu, pade ira da'a nantarima tandaina, etumo nomoro to nombagambara sangana. Ira pura-pura nenggore ri wiwi ntasi etu nanjoko kacapi to niwai Alatala ka ira.

³Pade nodademo ira dade nabi i Musa, batua nu Alatala nggaolu. [32] Pade nipodade ira dade nombabila Ana Bimba iwe'i: “Pue Alatala to Neliu Nggakuasa, neliu mpu'u kabetena bo kabelo powiamu. Nanoa bo nakono pura-pura pokainggumu. Komimo Magau nu pura-pura manusia ri dunia.

⁴Pura-pura manusia kana mekou ri ja'imu, Pue. Ira kana mombabila bo mombatoiya sangamu, sabana aga Komi to mpu'u-mpu'u nagasa. Pura-pura tau ri dunia kana marata mombasomba Komi, sabana natikitamo pura-pura pombabutusimu nanoa.”

⁵Naopu etu aku nanggita wo'umo pade kitamo, natibeamo Peto'o to Neliu Nggagasa riara Sapo Mpepue ri suruga.

⁶Pade nggariara Sapo Mpepue etu nesuwumo pitumba'a malaeka nanggeni pitungaya pepandasa kaopuna etu. Pakea ira nipowia nggari kae to nabula ntoto damo neringgila, pade pompo'u bombara ira nipowia nggari bulawa.

⁷Pade samba'a nggari patamba'a anu to natuwuna nombawai ka pitumba'a malaeka etu pituntonga tubu bulawa niisi naponu ante rau rara nu Alatala to natuwu sampe ri kasae-saena.

⁸Pade kaliu-liu Sapo Mpepue ri suruga naponu ante rangasu apu nesuwu nggari ja'i Alatala to nabaraka bo nakuasa mpu'u. Da'a ria samba'a namala mesua riara Sapo etu ane da'apa naopu pitungaya pepandasa to nikeni pitumba'a malaeka etu.