Read Da'a Kaili PANGGITA 16 Bible Online

PANGGITA 16 - Da'a Kaili bible

PANGGITA 16

¹Naopu etu aku nangepe suara nggariara Sapo Mpepue to namangga mpu'u nanguli ka pitumba'a malaeka etu, “Kalaumo komi, tubarakamo isi tubu-tubu to naponu ante rau rara nu Alatala etu riara dunia.”

²Nangepe etu nalaumo malaeka pamulana nombatubaraka isi tubuna riara dunia. Pade sampegoli neumbamo bisu-bisu naja'a to naju'a mpu'u ri koro ntau pura-pura to naria tandai binata naja'a etu pade tau pura-pura to nombasomba pinoito binata etu.

³Naopu etu malaeka karomba'ana nombatubaraka isi tubuna riara ntasi. Pade tasi etu najadi ewa lei ntau namate sampe pura-pura to natuwuna riara ntasi namate.

⁴Naopu etu malaeka katolumba'ana nombatubaraka isi tubuna ri pura-pura ue bo mata ue. Pade pura-pura ue etu nabali najadi lei.

⁵Naliu etu aku nangepe suara malaeka to nombakuasai ue nanguli, “O, Pue Alatala to nagasa, to naria mamimo nggari pamulana pade we'i-we'i bate-batena naria. Nanoa mpu'u pombabutusi Komi.

⁶Sabana tau-tau etu nompopesuwu lei nu todea topomparasaya Alatala bo lei nabi-nabimu. Tapi we'i-we'i Komi nombabalasi ira ante nompopoinu ka ira lei. Masipato mamimo pesuku ira etu.”

⁷Pade niepeku wo'umo suara nggari Meja Mpesomba nanguli, “Pue Alatala to Neliu Nggakuasa, wa'a mamimo! Nakono pade nanoa mpu'u pesuku to nipawelamu!”

⁸Naopu etu malaeka kapatamba'ana nombatubaraka isi tubuna ri mata eo. Pade mata eo etu niwai kuasa mompalabu manusia ante kapanena to naja'a mpu'u ewa apu.

⁹Manusia etu nipakaboa kapane nu mata eo etu. Pade ira nanguli sinja'i sanga Alatala sabana I'amo to nomparenta pepandasa etu rapawela ka ira. Tapi ira da'a ntoto nadota majea nggari powia ira to naja'ana, ira da'a nadota mombabila bo mompakabete sanga nu Alatala.

¹⁰Naopu etu malaeka kalimamba'ana nombatubaraka isi tubuna ri pekatoko binata to naja'a etu. Sampegoli pura-pura bagia to niparenta binata etu najadi narumau mpu'u. Pade pura-pura todeana nanggiki jila ante kasusana.

¹¹Ira nanguli sinja'i Alatala to naria riara suruga, sabana naju'a mpu'u niepe ira pade naja'a mpu'umo bisu-bisu ri koro ira. Tapi ira bate-batena da'a ntoto nadota majea nggari pokainggu ira to naja'ana.

¹²Naopu etu malaeka kaonomba'ana nombatubaraka isi tubuna ri salu ue bete to nosanga ka Ue Efrat. [33] Pade kaliu-liu naotimo Ue Efrat etu ala masadia jala rapojala magau-magau to marata nggari bagia pebuluna.

¹³Pade nikitaku tolumba'a seta nolenje mpotumpa. Samba'a nesuwu nggari nganga ule naga, samba'a nesuwu nggari nganga binata naja'a pade samba'a nesuwu nggari nganga nabi topodawa.

¹⁴Ira tolumba'a etu nosa seta-seta to mompowia tandai-tandai to nipogumaa. Ira kana malau mpaka ri ja'i pura-pura magau ri njumaongu dunia ala mompokio ira masiromu mosibali ka i Pue ri eo to nabetena, etumo tempo Alatala to Neliu Nggakuasa mombadagi pura-pura balina ri dunia.

¹⁵Pade nangulimo i Pue Yesus, “Epemo! Aku kana marata ante da'a ninjani-njanimu ewa samba'a topangangga. Mabelo mpu'u tau tunggai mainga bo mombajagai pakeana ala tempo Aku marata i'a da'a maeya matana nasimbayu ewa tau nolumako nelaya ri ngayo ntau dea.”

¹⁶Jadi seta-seta etu nompasiromu magau-magau ante tantara-tantara ira nggari umba-umba ri dunia ri peto'o to niuli riara Basa Ibrani, “Harmagedon.”

¹⁷Naopu etu malaeka kapitumba'ana nombatubaraka isi tubuna mpaka ri laerawa. Pade aku nangepe suara to namangga mpu'u nggari pekatoko magau ri Sapo Mpepue to nanguli, “Najadimo!”

¹⁸Pade noreamo kila pade guntu bete damo nosinjono poguna, pade najadimo lingu bete. Nggari pamulana manusia nipajadi Alatala ri dunia sampe tempo e'i, da'apa ntoto naria lingu ewa etu. Neliu mpu'u karimboso nu lingu bete etu.

¹⁹Pade ngata bete nosanga ka ngata Babel nabingga najadi tolubagia. Pade nagero sanggani pura-pura ngata ri njumaongu dunia. Pade Alatala nombabalasi kaja'a nu pue ngata bete etu. I'a mpu'u-mpu'u nompokarau ira ante da'a ntoto naria kalusu-lusuna nasimbayu ewa tau nompasu'u balina manginu panginu to napa'i mpu'u.

²⁰Tempo etu pura-pura lewuto ri tatongo ntasi nalipo sanggani pade bulu-buluna da'a mana nikita.

²¹Pade naria uja es to nabete mpu'u nadunggu nggari langi nombarunju manusia. Katomo nu watu uja es etu kira-kira limampulu kilo saongu. Nanggita etu manusia aga nanguli sinja'i sanga Alatala sabana naja'a mpu'u pepandasa uja es etu.