Read Da'a Kaili PANGGITA 17 Bible Online

PANGGITA 17 - Da'a Kaili bible

PANGGITA 17

¹Naopu etu samba'a nggari tatongo pitumba'a malaeka to nanjoko tubu-tubu etu nomai ri ja'iku pade nanguli ka aku, “Kamaimo iko, aku kana mompopokita ka iko iwenu pesuku to rapawela ka besi bajinga to nekatoko namosu peto'o ue to nadeana. [34]

²Magau-magau ri dunia narata nogau sala ante besi etu. Pade i'a nanggeni manusia nompasiala pokaingguna nogau sala nasimbayu ewa tau nanggeni roana manginu sampe malangu.”

³Naopu etu aku nikeni malaeka etu ante kuasa Nosa Nagasa nu Alatala mpaka ri karawa baina. Ri setu aku nanggita samba'a besi to nesawi saongu binata to nalei mpu'u kulina. Ri njumaongu koro binata etu naria nitulisi mpengele-ngele sanga. Batuana sanga-sanga etu mpu'u-mpu'u nompakakedi Alatala. Binata etu wo'u naria papitu balenggana pade ri balenggana etu naria wo'u sampulu tanduna.

⁴Besi etu nompake baju to nalei nogalo nakamumu to niparika ante ramba-ramba bulawa, mutiara bo watu-watu nagaya to nasuli mpu'u olina. Ri palena naria santonga sanggiri bulawa to niisi panginu to naja'a bo naruto to nombagambara pokaingguna nogau sala.

⁵Ri kirena nitulisi sanga to nakumba batuana iwe'i: BABEL TO NABETENA INDO NU BESI-BESI BAJINGA PETO'O MPENGELE-NGELE POKAINGGU TO NATANTORU RI DUNIA.

⁶Pade nikitaku besi etu nalangu sabana nanginu lei ntodea topomparasaya bo lei tau ntanina to nipatesina sabana batena nanguku Yesusmo Pue ira. Sangga nanggita besi etu, natekaja mpu'umo raraku.

⁷Pade nangulimo malaeka etu ka aku, “Nokuya iko natekaja nanggita besi etu? Kana kupakanoto ka iko batuana to nakumba to nirapaka ewa besi etu bo binata to nipesawina to nobalengga papitu pade notandu sampulu.

⁸Binata to nikitamu etu natuwu nokolu tapi we'i-we'i da'a mana naria. Tapi i'a kana meumba wo'umo nggariara lowu ndala to da'a namala nitudu kandalana etu. Maopu etu i'a kana rasuku sampe ri kasae-saena. Pade tau-tau to natuwu riara dunia to da'a nitulisi sangana riara Buku Katuwua tempo dunia da'apa nipajadi Alatala, ira kana mpu'u-mpu'u mogumaa manggita binata etu. Sabana nokolu binata etu natuwu, we'i-we'i da'a mana naria, tapi i'a kana meumba bali.

⁹Ri se'i kita kana paraluu pekiri to manoto. Pituongu balengga nu binata naja'a to nipesawi besi etu nombagambara pituongu bulu nipombabangu ngata. Pade pituongu balengga etu wo'u nombagambara pitumba'a magau.

¹⁰Tapi limamba'a nggari tatongo magau-magau etu da'a mana noparenta. Samba'a danoparenta pade magau kapitumba'ana da'apa nompamula noparenta. Tapi ane i'a marata, i'a moparenta aga sampalai.

¹¹Binata to natuwu nokolu pade we'i-we'i da'a mana naria, i'a etumo magau kawalumba'ana. Tapi i'a etu wo'u samba'a nggari tatongo magau pitumba'ana pani'a. Kaopuna i'a kana rasuku sampe ri kasae-saena.

¹²Sampulu ongu tandu to nikitamu etu nombagambara sampulu mba'a magau anu da'apa nompamula moparenta. Ira kana rawai ka kuasa moparenta mosanggani-nggani ante binata etu sajaa kasaena.

¹³Ira etu nosaongu patuju. Ira kana mombawai karoso bo kuasa poparenta ira ka binata naja'a etu.

¹⁴Pade ira kana mosibali ka Ana Bimba. Tapi Ana Bimba etu kana mombadagi ira sabana I'amo Pue nu pura-pura pue pade Magau nu pura-pura magau. Pade nosanggani-nggani ante Ana Bimba etu kana maria wo'u topantuki-topantuki I'a to nipokiona bo nipelisina to natutu nantuki I'a.”

¹⁵Naopu etu nanguli wo'umo malaeka etu ka aku, “Ue nadea to nikitamu pani'a to namosu besi bajinga etu nombagambara tau-tau nggari njumaongu dunia, todea-todea nggari umba-umba ngata to notesa mpengele-ngele basa ri dunia.

¹⁶Sampulu mba'a magau bo binata naja'a to nikitamu etu kana momporau rara besi etu. Ira kana mombaago pura-pura nuapa to naria ri ja'ina pade mompalamba i'a nelaya. Pade ira kana manggoni isi-isi koro besi etu pade mompalabu watabakuna riara apu sampe maopu.

¹⁷Etu pura-pura kana majadi sabana Alatalamo to nompakasaongu pekiri ira ala ira mompowia nia nu Alatala mboto. I'a nompakasaongu rara ira mombawai kuasa ira ka binata naja'a etu ala binata etu moparenta sampe madupa pura nuapa to nitesa Alatala.

¹⁸Pade besi to nikitamu etu nombagambara ngata bete to nomparenta pura-pura magau ri dunia.”