Read Da'a Kaili PANGGITA 18 Bible Online

PANGGITA 18 - Da'a Kaili bible

PANGGITA 18

¹Naopu etu aku nanggita samba'a malaeka ntanina nana'u nggari suruga. Nabete mpu'u kuasana bo karemena. Pade nggari reme malaeka etu njumaongu dunia najadi nareme.

²Nongaremo i'a ante suara to namangga mpu'u, “Nageromo! Nageromo ngata bete Babel! Nompamula we'i-we'i ngata etu kana majadi peto'o seta-seta bo peto'o nompengaya-ngaya to naja'ana, pade peto'o nompengaya tonji to natantoruna to niporau rara manusia.

³Nageromo ngata Babel sabana pura-pura tau to neto'o ri dunia nipakeni pue ngata Babel mompasiala pokainggu ira nogau sala nasimbayu ewa tau nipasu'u manginu panginu sampe malangu. Pura-pura magau ri dunia wo'u nompasiala pokainggu ira to naja'a. Pade topodaga-topodaga ri dunia najadi nakalumana puramo ante nobalu-balu mpengaya-ngaya mbara to nasulina ka pue ngata Babel to da'a ria kabasa-basana.”

⁴Naopu etu aku nangepe suara ntanina nggari suruga nanguli, “Umba komi, topantuki-topantuki Aku! Pesuwumo komi nggariara ngata etu! Ne'e ratuki komi silaka-silaka nu pue ngata etu ala pesuku to rapawela ka ira ne'e mawela komi wo'u!

⁵Sabana nadea mpu'umo silaka ira etu, nobua sampe narata ri langi. Pade we'i-we'i kaja'a ira etu nitora Alatalamo.

⁶Jadi powia wo'umo ri ja'i pue ngata etu ewa to nikawia ira ka tau-tau ntanina. Balasimo ka ira ronggani kadeana nggari pura-pura panggawia ira to naja'ana. Isimo sanggiri ira ante panginu ronggani kapa'ina nggari panginu to nipakasadia ira ka tau ntanina.

⁷Pakasadia ka ira pepandasa bo kasusana to nasimbayu kadeana ante pokainggu ira mompakalanga rara bo mompebasa-basa kasana koro ira mboto. Sabana ira batena notesa riara nta'i ira iwe'i: ‘Aku e'imo samba'a magau besi. Aku da'a tobalu besi, pade aku da'a ntoto mombarasai kasusa bo kapari.’

⁸Sabana etu riara saeo lau ira kana rarumpa pepandasa-pepandasa iwe'i: kamatea, kasusa rara, pade kamateoro. Ngata ira etu kana mapapu sanggani rakoni nu apu, sabana nakuasa mpu'umo Alatala to nombasuku pue ngata etu.”

⁹Tempo magau-magau to nantuki pokainggu pue ngata Babel nogau sala pade nompesana-sana ante ira manggita rangasu apu to nompakapapu ngata etu, ira kana mageo mpajea sabana kagero nu ngata etu.

¹⁰Ira aga mekanggore meantoaka nggawao manggita rangasu apu etu, apa naeka ira rapendai kasusana to nombarumpa ngata bete etu. Ira kana manguli, “Owe! Owe! Nandasa mpu'umo ngata bete etu, ngata Babel to naroso mpu'u! Aga riara sajaa lau komi nipawela pesuku nu Alatala!”

¹¹Pade pura-pura topodaga ri dunia kana mageo mombatangi ngata Babel etu sabana da'a mana maria tau mangoli balu-balu ira.

¹²Da'a mana maria topangoli bulawa, salaka, watu-watu sinji to nasulina bo mutiara to nipobalu ira. Da'a mana maria wo'u topangoli pakea to nitanu nggari kae to nalusu mpu'u, kae sutra, kae nalei bo nakamumu to nasulina. Da'a mana maria topangoli mpengele-ngele parewa to nipowia nggari kayu to nawongina bo parewa-parewa nipowia nggari ngisi gaja bara parewa-parewa nipowia nggari kayu to nasuli mpu'u olina. Pade da'a mana maria topangoli parewa-parewa to nipowia nggari tambaga, ase, pade nggari watu pualam.

¹³Da'a mana maria topangoli kayu momi, rampa-rampa ntanina, bo minya wongi to niuli dupa, mur bo kemenyan. Da'a mana maria topangoli ue anggur, lana, labu gando bo ose. Wa'a wo'u japi, bimba, jara, kareta bo tau-tau rapobatua mana raoli pue ngata Babel.

¹⁴Topodaga-topodaga etu kana manguli, “Pura-pura to nipoino raramu da'a mana ntoto naria. Nalipo puramo kakalumanamu bo kagayamu, da'a mana murata bali.” Topodaga-topodaga to najadi nakalumana ante nompobalu mbara-mbara etu ka pue ngata Babel aga mekanggore meantoaka nggawao manggita ngata etu sabana maeka rara mawela kasusana to nombarumpa ngata etu. Ira kana mageo mpajea ante masusa rara.

¹⁶Ira kana mongare-ngare, “Owe! Owe! Nandasa mpu'umo ngata bete etu! Pue ngata Babel nabiasa nompake pakea to nipowia nggari kae to nalusu mpu'u, pade nggari kae nakamumu bo nalei to niparika ramba-ramba bulawa, watu-watu sinji to nasulina bo mutiara.

¹⁷Tapi aga riara sajaa lau kakalumana to nadea mpu'u etu naropu sanggani.” Pade pura-pura topompajala sakaya bete, ante topokarajaa riarana, pade pura-pura topesawi sakaya ante pura-pura tau to nopaelo katuwu ira ri tasi kana mekanggore meantoaka nggawao manggita ngata etu.

¹⁸Tempo ira manggita rangasu apu nompalabu ngata bete etu mosumoa, ira kana mongare-ngare, “Da'a ria ngata ntanina ri dunia to nasimbayu ewa ngata bete etu!”

¹⁹Ira kana manggamburaka sowu tana ri balengga ira sabana kasusa rara ira. Ira kana mageo bo mantete pade manguli, “Owe! Owe! Nandasa mpu'umo ngata bete etu! Nggari kakalumana pue ngata Babel etu pura-pura tau to naria sakayana rarantasi najadi nakalumana. Tapi kitamo! Aga riara sajaa lau naropu sangganimo pura-pura kakalumana etu!”

²⁰Umba komi topeto'o ri suruga, pakadambamo raramu! Pakadambamo rara komi topomparasaya i Pue Yesus mosanggani-nggani ante suro-surona bo nabi-nabina! Sabana pue ngata bete etu nisuku Alatalamo! Nibalasinamo powia ira to naja'ana ri ja'i komi!

²¹Naopu etu aku nanggita samba'a malaeka to naroso mpu'u nombaonggotaka saongu watu bete ewa watu pogili to nabetena, pade nitajiakana mpaka riara ntasi. Pade niulina, “Nasimbayu ewa watu e'i nitajiaka riara ntasi da'a mana rarata bali, iwetu wo'u ngata Babel to nabetena etu kana rapakaropu sanggani pade da'a mana maria.

²²Da'a mana raepe wamba musi nggari ja'i ntopomore kacapi, bara wamba topodade ri ngata etu. Da'a mana raepe musi sasuli bo topantawui kololio. Da'a mana maria topande manggawia bara nuapa-nuapa ri tatongo ngata etu, pade wamba pogili da'a mana raepe nggariarana.

²³Da'a mana maria reme poindo rakita riarana, pade da'a mana maria raepe suara boti langgai bo boti besi madamba-damba. Etu pura-pura kana majadi sabana topodaga-topodaga nggari ngata etu to neliu nggakalumana ri dunia. Pade nggari pangginjani to naja'ana pue ngata etu nombabagiu pura-pura isi dunia.”

²⁴Ngata Babel kana rasuku iwetu sabana riara ngata etumo lei nu nabi-nabi bo todea topomparasaya Alatala nipopesuwumo. Pade lei nggari kamate pura-pura tau ntanina to nipatesi riara dunia e'i kana rapatanggu ka pue ngata Babel etu.