Read Da'a Kaili PANGGITA 19 Bible Online

PANGGITA 19 - Da'a Kaili bible

PANGGITA 19

¹Naopu etu aku nangepe wamba ewa suara ntau dea damo nonguu riara suruga nongare-nongare. Niuli ira, “Toiyamo Alatala! Sabana I'amo to nompakasalama kita! I'amo Alatala to nabete mpu'u katuwuna pade to nakuasana!

²Toiyamo I'a sabana pombabutusina nanoa pade nakono. Nisukunamo besi bajinga etu to nompakaja'a dunia ante pokaingguna nogau sala. Nipesawanamo besi etu sabana i'a to nompatesi batua-batua nu Alatala.”

³Pade nongare wo'umo tau dea etu, “Toiyamo Alatala sabana rangasu apu nompalabu ngata etu nosumoa sampe ri kasae-saena, da'a ria kaopu-opuna!”

⁴Pade rompulu bo patamba'a totu'a pade patamba'a anu to natuwuna etu nekadede mombasomba Alatala to nekatoko ri pekatoko magauna. Ira nanguli, “Amin! Toiyamo Alatala!”

⁵Naopu etu naria suara nggari pekatoko magau etu nanguli, “Umba komi batua Alatala pura-pura, toiyamo Pue Alatalata! Toiyamo I'a, komi to nekou ri ja'ina, nabeloka tau to naede katuwuna, nabeloka tau to nalanga katuwuna!”

⁶Naopu etu aku nangepe ewa wamba ntau dea nowoo ewa soo nu ue bete pade ewa moni guntu bete. Nongaremo ira, “Toiyamo Alatala! Sabana noparentamo Pue Alatalata to Neliu Nggakuasa!

⁷Kamaimo kita mongare ante madamba-damba! Kamaimo kita mantoiya pade mombabila kabete kuasana! Sabana naratamo eo mponika Ana Bimba. Boti besi nasadiamo ranika.

⁸I'a niwai pakea bula to nalusuna to nenggila bo nagasa rapakena.” (Pakea nalusu etu nombagambara pokainggu-pokainggu nanoa to nipowia todea topomparasaya.)

⁹Naopu etu nangulimo malaeka etu ka aku, “Tulisimo e'i: Nabelo mpu'umo tau-tau to nigaga malau ri posusa mponika Ana Bimba etu.” Pade niulina wo'umo, “Tesa-tesa e'i tesa Alatala to nakono!”

¹⁰Sangga nangepe pantesa etu nekadedemo aku sampe ri tana ri ngayo malaeka etu ala mombasomba i'a. Tapi nangulimo i'a ka aku, “Ne'e! Ne'e iko mombasomba aku! Pesombamo Alatala! Sabana aku e'i aga samba'a batua nu Alatala nasimbayu ewa iko bo nasimbayu ewa roa-roamu topomparasaya to batena nompangaku Yesusmo Pue ira. Sabana isi to napokona nggari tesa to nipasimbayu nabi-nabi nu Alatala etumo mompakanoto Yesusmo Pue.”

¹¹Naopu etu aku nanggita suruga natibea, pade riara suruga nikitaku saongu jara bula. Topesawi jara etu nosanga ka “To Natutu bo Nakono.” I'a nombabutusi parakara bo nosipatesi ante nanoa.

¹²Matana najela ewa jela nu apu pade ri balenggana nadea songgo magau. Ri korona naria sanga nitulisi, tapi aga I'a mboto nangginjani sanga etu.

¹³Baju ndoe to nipasuana natitome riara lei. Pade I'a nidae “Tesa nu Alatala.”

¹⁴Tantara-tantara suruga nantuki I'a ante nesawi jara bula pura. Pakea ira nipowia nggari kae nalusu to nabula bo nagasa.

¹⁵Pade nggari nganga topesawi jara etu nesuwu samata guma to natajana. Ante guma etu I'a kana mombadagi pura-pura tau riara dunia to nangewa I'a, pade I'a kana momparenta ira ante karosona to nasimbayu ewa karoso lembau ase. [35] I'a kana mompopesuwu rau rara Alatala to naja'a mpu'u mompakaropu tau-tau najadi balina nasimbayu ewa tau nombalonggo-longgo mpakaoya wua anggur ri peto'o pompea anggur.

¹⁶Ri bajuna bo ri timpuna naria nitulisi sangana iwe'i: MAGAU NU PURA-PURA MAGAU, PUE NU PURA-PURA PUE.

¹⁷Naopu etu aku nanggita samba'a malaeka nekanggore ri mata eo. Nongaremo i'a ante suara namangga mpu'u nompokio pura-pura tonji to nembua ri laerawa. Niulina, “Kamaimo komi pura-pura, manggoni ri posusa bete to nipakasadia Alatala!

¹⁸Kamaimo ala komi mamala manggoni isi magau-magau bo tadulako-tadulako, pade isi tantara-tantara to nabia! Kamaimo komi manggoni isi topesawi jara bo isi jara ira, pade isi manusia pura-pura, nabeloka batua, nabeloka madika, nabeloka tau to nalanga katuwuna, nabeloka tau to naede katuwuna!”

¹⁹Naopu etu aku nanggita binata to naja'a etu bo magau-magau nggari dunia ante tantara-tantarana nasiromu ala mosibali ka Topesawi jara bula bo tantara-tantarana.

²⁰Tapi binata naja'a nisoko sanggani ante nabi topodawa to nompowia tandai-tandai nipogumaa ante kuasa niwai binata etu ka i'a. [36] Ante tandai-tandai etu ira nombabagiu tau-tau to nimere ante tandai binata naja'a pade to nombasomba pinoitona. Ira romba'a nisoko pade nitajiaka nggatuwu riara ntasi apu to najela ante watu-watu najela.

²¹Naopu etu pura-pura tantara etu nipatesi ante guma to nesuwu nggariara nganga Topesawi jara bula etu. Pade naratamo tonji-tonji nanggoni isi watabaku ntau to namate etu sampe nabasa-basa.