Read Da'a Kaili PANGGITA 2 Bible Online

PANGGITA 2 - Da'a Kaili bible

PANGGITA 2

¹Pade nangulimo Ana nu Manusia ka aku, “Tulisimo ka malaeka to nanggeniaka todea topomparasaya ri ngata Efesus iwe'i: E'imo tesa nggari ja'ina to nanjoko pituongu betu'e ri pale ngganana pade to nolumako ri tatongo papitu kada mpoindo bulawa.

²Ninjaniku pura-pura pokainggumu. Komi naraji nokarajaa pade komi naroo tempo nipandasa sabana nomparasaya Aku. Ninjanikumo komi da'a nasituju ante pokainggu tau-tau naja'a. Tau-tau to nompangaku korona suro-suroku tapi kakonona da'a, ira niuji komi sampe nanotomo ira topodawa.

³Pade komi mpu'u-mpu'u nosabara. Komi nipandasa ntau sabana komi topantuki Aku, tapi komi da'a naopu rara.

⁴Tapi naria sangele inggu komi to da'a nipodamba raraku. Komi mana nompotowe Aku ewa bopia tempo komi lako nomparasaya.

⁵Etu sampe kuuli ka komi, pakabelo-belo! Nakawao ntotomo kanawu komi! Kajeamo komi, pade powiamo ewa to nipowia komi ri pamulana. Sabana ane komi da'a majea, Aku kana marata mangala kada mpoindo bulawa komi nggari peto'ona.

⁶Tapi naupa iwetu naria sangele inggu komi to nipokonoku, etumo komi nomporau rara pokainggu tau-tau to nantuki pepatuduki i Nikolaus, to niporau raraku wo'u.

⁷Isema-sema naria talingana, epemo mpakabelo-belo nuapa to nitesa Nosa Nagasa nu Alatala ka todea topomparasaya ri umba-umba ngata. Isema-sema padagi kana kuwai ka ira wua nggari Kayu Katuwua to naria riara tinalu Alatala ri suruga.” [5]

⁸Naopu etu nanguli wo'umo Ana nu Manusia ka aku, “Tulisimo ka malaeka to nanggeniaka todea topomparasaya ri ngata Smirna iwe'i: E'imo tewai nggari ja'ina to niuli Pamulana bo Kaopuna, to namate pade natuwu bali.

⁹Ninjaniku kasusa bo kapari to nirasai komi. Ninjaniku komi mpu'u-mpu'u nakasiasi, tapi kakonona komi nakalumana riara pomparasaya komi. Ninjaniku komi niuli sinja'i ntau to nompangaku korona tau-tau to Yahudi tapi kakonona da'a. Ira aga todea Magau nu Seta.

¹⁰Tapi ne'e komi maeka mantingayo kasusa bo kapari to mana masaeka rarasai komi. Kitamo! Santongo nggari ja'i komi kana rapopesua Magau nu Seta riara tarunggu ala komi rapesoba. Komi kana rapandasa sampulu eo kasaena. Tapi pakaroo raramu momparasaya Aku sampe mamate, pade Aku kana mombawai ka komi hadia padagi, etumo katuwua mabelo sampe ri kasae-saena.

¹¹Isema-sema naria talingana, epemo mpakabelo-belo nuapa to niuli Nosa Nagasa nu Alatala ka todea topomparasaya ri umba-umba ngata. Isema-sema padagi da'a ntoto mawela pesuku riara naraka to niuli kamatea karongganina.” [6]

¹²Naopu etu nanguli wo'umo Ana nu Manusia ka aku, “Tulisimo ka malaeka to nanggeniaka todea topomparasaya ri ngata Pergamus iwe'i: E'imo tewai nggari ja'ina to naria guma nomata ntimali to nataja mpu'u.

¹³Ninjanikumo ngata nipeto'o komi, etumo riara ngata peto'o pekatoko Magau nu Seta. Tapi naupa iwetu komi naroo nomparasaya Aku. Tempo sabiku to nosanga ka Antipas nipatesi ri ngatamu komi da'a nombasapu pomparasaya komi ka Aku. Antipas etu sabiku to natutu nomparasaya Aku sampe i'a nipatesi ntau ri ngata komi, etumo ri peto'o Magau nu Seta.

¹⁴Tapi danariapa bara sakuya ngele inggu komi to da'a nipodamba raraku. Naria nggari tatongo komi to nantuki pepatuduki i Bileam nggaolu. [7] Bileam etu nompatuduki Magau Balak iwenu mompakanawu tau-tau to Israel riara silaka, etumo ante manggeni ira manggoni panggoni to napalina sabana nipakoni ka pue-pue ntanina, pade ante manguli da'a mokuya mogau sala ante tau da'a rongota mboto.

¹⁵Pade naria wo'u nggari tatongo komi to nantuki pepatuduki i Nikolaus.

¹⁶Sabana etu kuuli ka komi, kajeamo nggari silakamu etu. Ane komi da'a majea Aku kana masalisa marata ri ja'i komi pade mosibali ka ira etu ante guma to naria ri ngangaku.

¹⁷Isema-sema naria talingana, epemo mpakabelo-belo nuapa to nitesa Nosa Nagasa nu Alatala ka todea topomparasaya ri umba-umba ngata. Isema-sema padagi kana kuwai ka ira roti ‘Manna’ to natetabuniaka. [8] Pade kana kuwai wo'u ka ira watu bula simbau saongu. Ri watu bula etu nitulisi sanga nabou to da'a ntoto ninjani tau ntanina, aga tau to mantarima watu bula etu to mangginjanina.”

¹⁸Pade nanguli wo'umo Ana nu Manusia ka aku, “Tulisimo ka malaeka to nanggeniaka todea topomparasaya ri ngata Tiatira iwe'i: E'imo tesa nggari Ana nu Alatala to naria matana najela ewa apu pade kadana naralei ewa tambaga nitunu riara apu.

¹⁹Ninjanikumo pura-pura pokainggu komi. Ninjaniku towemu bo pomparasayamu ka Aku. Ninjaniku bago komi mantulungi Aku pade ninjaniku iwenu komi nosabara tempo nipandasa. Pade ninjaniku bago komi mantulungi Aku we'i-we'i neliu nggadea nggari to nipowia komi tempo lako nomparasaya Aku.

²⁰Tapi danariapa sangele pokainggu komi to da'a ntoto nipodamba raraku. Etumo besi to nosanga ka Izebel to nompangaku korona samba'a nabi nipaloga komi nompatuduki bo nombabagiu topantuki-topantuki Aku. I'a nompatuduki ira mogau sala ante tau da'a rongo ira mboto pade manggoni panggoni to napalina sabana nipakoni ka pue-pue ntanina.

²¹Niwaikumo loga ka i'a majea nggari ingguna nogau sala etu, tapi i'a da'a ntoto madota majea.

²²Jadi kitamo! Aku kana mompakaju'a i'a sampe i'a aga maturu ri paturuna. Pade ane ira to nantuki i'a nogau sala da'a majea nggari pokainggu ira to naja'a ira kana kupawela kasusa bo kapari to naja'a mpu'u.

²³Pade ana-anana kana kupatesi sampe manoto ka pura-pura topomparasaya Akumo to nomparesa pekiri bo rara nta'i manusia, pade Akumo to mombabalasi komi samba'a bo samba'a nantuki pokainggu-pokainggu komi.

²⁴Tapi naria wo'u komi to Tiatira to da'a nantuki pepatuduki to naja'a etu pade da'a madota meguru to niuli ntau ‘pangginjani Magau nu Seta to nalontona’. Kuuli ka komi iwe'i: Aku da'a mantambai parenta-parenta ntanina ka komi.

²⁵Aga sokomo mpakaroso pepatuduki to naria ri ja'i komi sampe Aku marata bali.

²⁶Isema-sema padagi bo to manggawia dotaku sampe ri kaopuna, kana kuwai ka kuasa nasimbayu ewa to nitarimaku nggari ja'i Umaku. Kana kuwai ka ira kuasa moparenta manusia ri njumaongu dunia. Ira kana moparenta ante maroso nasimbayu ewa karoso lembau ase. Pade ira kana mompakaropu bali ira nasimbayu ewa tau mompakarege kura tana. [9]

²⁸Pade kana kuwai ka ira betu'e Pompaeo. [10]

²⁹Isema-sema naria talingana, epemo mpakabelo-belo nuapa to nitesa Nosa Nagasa nu Alatala ka todea topomparasaya ri umba-umba ngata.”