Read Da'a Kaili PANGGITA 20 Bible Online

PANGGITA 20 - Da'a Kaili bible

PANGGITA 20

¹Naopu etu aku nanggita samba'a malaeka nana'u nggari suruga. Ri palena naria kunci pewobo nu lowu ndala to da'a namala nitudu kandalana. Pade nisokona wo'u saongu rante to nabete mpu'u.

²I'a nanjoko ule naga etu to niuli Ule Ntu'a, etumo i'a to niuli Magau nu Seta bara Seta. Pade ule etu nipo'unamo sanjobu mpae kasaena.

³Nitajiakana ule etu riara lowu ndala to da'a namala nitudu kandalana etu. Naopu etu nikuncina pade nimerena pewobo lowu etu ala ule naga etu da'a mana mamala mesuwu mombabagiu manusia sampe maganamo tempona sanjobu mpae kasaena etu. Maliu etu i'a kana rakabasaka bali sampalai.

⁴Naopu etu aku nanggita bara sakuya ongu pekatoko magau. Pade tau-tau to nekatoko ri bunggu pekatoko etu niwai ka kuasa mombabutusi parakara-parakara. Pade nikitaku wo'u wayo-wayo ntau namate nitompo tambolona sabana ira batena nompangaku Yesusmo Pue ira, pade batena nompatolele Tesa nu Alatala. Ira da'a wo'u nombasomba binata naja'a bo pinoitona, pade ira da'a wo'u nantarima tandai binata etu ri kire bara ri pale ira. Ira etu natuwu bali pade noparenta mpasanggani-nggani ante Kristus sanjobu mpae kasaena.

⁵Etumo to niuli pembangu ntomate pamulana. Tau-tau namate ntanina da'apa natuwu bali sampe naganamo sanjobu mpae etu.

⁶Nabelo mpu'u bo nagasa tau-tau to rapakatuwu bali tempo pembangu ntomate pamulana etu. Ira da'a ntoto mawela pesuku to niuli kamatea karongganina. Tapi ira kana majadi topanggeni-topanggeni agama to manggeni pesomba ka Alatala bo Kristus. Pade ira kana moparenta mpasanggani-nggani ante Kristus sanjobu mpae kasaena.

⁷Ane maopumo sanjobu mpaena etu Magau nu Seta kana rakabasaka nggariara tarungguna ri lowu ndala etu,

⁸pade i'a kana malau mombabagiu tau-tau ri njumaongu dunia to mangewa Alatala, etumo ira to niuli Gog ante Magog. [37] Magau nu Seta etu kana mompasiromu tau-tau etu ala malau mosipatesi. Kadea ira ewa bone ri wiwi ntalinti, da'a namala rabila.

⁹Ira kana marata nggari umba-umba ri dunia pade mombatatiku peto'o ntodea topomparasaya, etumo ngata to nipotowe Alatala. Tapi apu kana mana'u nggari langi mompalabu ira pura-pura sampe maopu.

¹⁰Maopu etu Magau nu Seta to nombabagiu tau pura-pura ri dunia kana ratajiaka riara ntasi apu to najela ante watu-watu najela. Etumo peto'o nipantajiaka binata naja'a bo nabi topodawa nokolu. Ri setu eo wengi ira kana rapandasa sampe ri kasae-saena.

¹¹Naopu etu aku nanggita saongu pekatoko magau nabula to nabetena. Pade nikitaku wo'u topekatoko ri pekatoko etu. Langi bo dunia nalipo sanggani nggari ngayona sampe da'a mana naria nikita mata.

¹²Pade aku nanggita tau-tau namate nenggore ri ngayo pekatoko etu. Ira etu tau-tau to nalanga katuwuna ri dunia bo tau to naede katuwuna, tau namate natala riara ntasi, tau ntanina to namate, pade pura-pura tau nggari peto'o ntomate. Ira pura-pura nenggore ri ngayo pekatoko Alatala etu. Pade buku-buku nitimpamo pade niparesa. Riara buku-buku etu nitulisi pura-pura pokainggu tau-tau namate etu. Jadi ira nitangara nantuki pokainggu-pokainggu ira to nitulisi riara buku-buku etu. Pade naria buku ntanina nitimpa wo'u to niuli Buku Katuwua. [38]

¹⁴Pura-pura tau to da'a nitulisi sangana riara Buku Katuwua etu nitajiaka riara ntasi apu. Etumo to niuli kamatea karongganina, pesuku riara ntasi. Naopu etu mana ria kamatea bo mana ria peto'o ntomate.