Read Da'a Kaili PANGGITA 21 Bible Online

PANGGITA 21 - Da'a Kaili bible

PANGGITA 21

¹Naopu etu aku nanggita langi bo dunia to nabou. Langi pamulana pade dunia pamulana nalipomo, pade mana ria tasi.

²Pade nikitaku wo'u ngata to nagasa, ngata Yerusalem to nabouna nana'u nggari ja'i Alatala ri suruga. Nagaya mpu'u ngata etu ewa samba'a boti besi nopakea nagaya nasadia mompopea karata rongona.

³Pade niepeku suara namangga mpu'u nggari pekatoko magau etu nanguli, “Kitamo! We'i-we'i peto'o Alatala nosanggani-nggani ante manusia. I'a meto'o ri tatongo ira pade ira majadi todeana. Pade I'a mboto mosanggani-nggani ante ira pade majadi Alatala ira.

⁴I'a mbotomo mombape'e pura-pura ue mata nggari mata ira. Da'a mana maria tau mamate, da'a mana maria tau masusa rara bara mageo, pade da'a mana maria tau maju'a. Sabana anu to nasaena etu naliumo.”

⁵Naopu etu nangulimo topekatoko ri pekatoko magau, “Kitamo! We'i-we'i Aku mompakabou mpengele-ngele to naria.” Pade niulina wo'umo ka aku, “Tulisimo nuapa kutesa, sabana tesa e'i mpu'u-mpu'u nakono pade namala raparasaya.”

⁶Pade niulina ka aku, “Naopu puramo! Aku e'imo Pamulana pade Kaopuna. Aku nompamula pade Aku wo'u nompakaopuna. Isema-sema to nabai tambolona kana kuwai ka bayangi ue nggari mata ue to nombawai katuwua mabelo sampe ri kasae-saena.

⁷Isema-sema padagi ira kana mombarata nggari ja'iku pura-pura nuapa to niuliku etu pane'a. Pade Akumo majadi Alatala ira bo ira majadi anaku.

⁸Aga tau-tau to naeka mantuki Aku bara da'a nomparasaya Aku, ante tau-tau to naja'a pokaingguna, tau-tau topepatesi, tau-tau nogau sala, tau-tau topedoti, tau-tau nepue ka pue-pue ntanina, pade pura-pura topodawa, ira pura-pura kana rasuku riara ntasi apu to najela ante watu-watu to najela. Etumo to niuli kamatea karongganina.”

⁹Naopu etu naratamo samba'a malaeka nggari tatongo ira pitumba'a to nanjoko tubu-tubu niisi ante pitungaya pepandasa kaopuna. Nangulimo i'a ka aku, “Kamaimo, kana kupopokita ka iko boti besi to raporongo Ana Bimba.”

¹⁰Pade aku nikenina ante kuasa Nosa Nagasa nu Alatala mpaka ri bunggu bulu to nabetena bo nalanga. Nggari bunggu bulu etu i'a nombatujuraka ka aku ngata nagasa to nosanga ka ngata Yerusalem nana'u nggari ja'i Alatala ri suruga.

¹¹Ngata etu nareme mpu'u ante kareme nu Alatala mboto. Karemena damo nenggila ewa mata sinji to nasuli olina, ewa watu yaspis to nalewayo mpu'u ewa kaca to nasuli mpu'u olina.

¹²Ngata etu wo'u nitalili tembo to nabete bo nalanga mpu'u. Tembo etu naria sampulu rongu bobaana to nikatono sampulu romba'a malaeka. Ri bobaa etu naria nitulisi sanga-sanga ana Israel sampulu romba'a to najadi totu'a nto Yahudi.

¹³Tembo bete etu patanjulapa, sanjulapa toluongu bobaa. Etumo ri sabingga kamataeona naria toluongu bobaa, ri sabingga tasina naria toluongu bobaa, ri sabingga puluna naria toluongu bobaa, pade ri sabingga kasolona naria toluongu bobaa.

¹⁴Tembo ngata etu nibangu ri bunggu sampulu rongu watu pondasi pade ri watu pondasi etu naria nitulisi sanga sampulu romba'a anaguru nu Ana Bimba.

¹⁵Malaeka to notesa ante aku etu nanjoko sampeka lembau to nipowia nggari bulawa rapotomo kabete ngata etu ante tembo bo bobaana.

¹⁶Ngata etu patanjulapa. Kandatena nasimbayu ewa kambukuna. Malaeka etu nombatomo ngata etu ante lembau potomo etu. Kandatena ronjobu patatu kilo. [39] Kambukuna bo kalangana nasimbayu ante kandatena.

¹⁷Malaeka etu wo'u nombatomo tembo ngata etu. Kabetena onompulu metere. [40] Potomo to nipake malaeka etu nasimbayu ewa potomo to nipake manusia.

¹⁸Tembo ngata etu nipowia nggari watu-watu to nasuli mpu'u olina to niuli watu yaspis. Ngata etu nipowia nggari bulawa pura, damo nenggila ewa kaca to nalewayo.

¹⁹Watu-watu pondasi ngata etu niwera ante sampulu rongaya watu to nasuli mpu'u olina, saongu watu sangaya wo'u rambana. Watu pamulana niwera ante watu yaspis to nalusu bo nalewayo ewa kaca. Watu karonguna niwera ante watu nilam to naramata ewa ue nandala. Watu katoluonguna niwera ante watu mirah to nalei-lei. Watu kaampana niwera ante watu zamrud to naramata ewa pae.

²⁰Watu kaalimana niwera ante watu unam to naloba nabula bo nalei. Watu kaonona niwera ante watu sardis to natu'a leina. Watu kapapituna niwera ante watu ratna cempaka to nangguni ewa bulawa. Watu kawaluna niwera ante watu beril to naramata ewa tolu memua. Watu kasasiona niwera ante watu krisolit to nakuni-kuni. Watu kasampuluna niwera ante watu krisopras to naramata ewa doa loka. Watu kasampulu saonguna niwera ante watu lazuardi to nagawu ewa langi. Pade watu kasampulu ronguna niwera ante watu kecubung to nakamumu.

²¹Pade sampulu rongu bobaa etu nipowia nggari mutiara to nalusu mpu'u, saongu bobaa saongu wo'u mutiara. Pade jala riara ngata etu nipowia nggari bulawa pura, damo nenggila ewa kaca to nalewayo.

²²Da'a ria Sapo Mpepue nikitaku riara ngata etu, sabana Pue Alatala to Neliu Nggakuasa bo Ana Bimba mboto najadi Sapo Mpepue ri setu.

²³Pade ngata etu da'a mana nomparaluu reme nu eo bara reme nu wula, sabana reme nggari ja'i Alatala mboto to nompakaremena, pade Ana Bimba najadi ewa poindona.

²⁴Pura-pura manusia ri dunia kana molumako riara karemena. Pade magau-magau nggari njumaongu dunia kana manggeni kakalumana ira mpaka riara ngata etu.

²⁵Bobaa-bobaa ngata etu bate-batena natibea, da'a ntoto nipiku-piku, sabana ri ngata etu da'a mana maria nggawengina.

²⁶Pura-pura manusia ri dunia kana manggeni tanda pebila ira pade kakalumana ira mesua riara ngata etu.

²⁷Tapi anu to nompakatantoru bo tau-tau nompowia kaja'ana bo tau-tau topodawa da'a ntoto mamala mesua riara ngata etu. To mamala mesua ri setu aga tau-tau to nitulisi sangana riara Buku Katuwua nu Ana Bimba. [41]