Read Da'a Kaili PANGGITA 22 Bible Online

PANGGITA 22 - Da'a Kaili bible

PANGGITA 22

¹Pade malaeka etu nompopokita ka aku sanjalu ue, uena damo nenggila ewa kaca to nalewayo. Ue nggari salu ue etu nombawai katuwua to nabelo. Ulu nu ue etu nesuwu nggari pekatoko Alatala bo Ana Bimba etu,

²pade noili ri tatongo jala jama rara ngata etu. Ri wiwi salu ue ntimali-malina naria sampu'u kayu to niuli “Kayu Katuwua.” [42] Kayu etu nowua sampulu ronggani sampae, sambula sanggani kayu etu nowua. Pade tawa kayu etu nipopakuli mompakabelo tau-tau ri njumaongu dunia. [43]

³Riara ngata etu da'a mana naria nuapa-nuapa to nijanjiaka Alatala. [44] Pekatoko Alatala bo Ana Bimba naria riara ngata etu. Pade pura-pura batuana kana mepue ri ja'ina.

⁴Pura-pura tau kana manggita lenjena ante mata ira mboto. Pade sangana kana ratulisi ri kire ira pura-pura.

⁵Da'a mana maria nggawengina. Pue ngata etu da'a mana momparaluu poindo bara reme nu eo mombawanta ira, sabana reme nggari ja'i Pue Alatala mbotomo mombawanta ira. Pade ira kana moparenta ewa magau sampe ri kasae-saena.

⁶Naopu etu nangulimo malaeka etu ka aku, “Pura-pura tesa pane'a mpu'u-mpu'u nakono pade namala raparasaya. Pue Alatala to nombawai Nosa Nagasana ka pura-pura nabina, I'amo to nompakau malaekana nomai mombatujuraka ka batua-batuana nuapa to mana masaeka majadi.”

⁷Pade nangulimo i Pue Yesus, “Kitamo! Aku mana masaeka marata! Nabelo mpu'umo tau natutu mantuki pantesa to niboto riara buku e'i!”

⁸Aku, Yohanes, to nanggita bo nangepe pura-pura kajadia etu. Sangga naopu aku nangepe bo nanggita etu pura-pura, nekadedemo aku sampe ri tana ri ngayo malaeka to nombatujuraka etu pura-pura ka aku ala mombasomba i'a.

⁹Tapi nangulimo malaeka etu ka aku, “Ne'e! Ne'e iko mombasomba aku! Pesombamo Alatala! Sabana aku e'i aga batua nu Alatala nasimbayu ante iko bo roa-roamu nabi bo tau-tau to natutu nantuki tesa-tesa to nitulisi riara buku e'i!”

¹⁰Pade nanguli wo'umo i'a ka aku, “Ne'e mutabuniaka tesa to niboto riara buku e'i, sabana namosumo kadupana.

¹¹Isema-sema to naja'a pokaingguna, palambamo ira tunggai mowia kaja'ana. Isema-sema to natantoru pokaingguna, palambamo ira tunggai mowia to natantoru. Isema-sema to nanoa, palambamo ira tunggai mowia to nanoana. Isema-sema to nagasa rarana, palambamo ira tunggai mowia to nagasana.”

¹²Pade nanguli wo'umo i Pue Yesus, “Toramo tesaku e'i! Aku da'a mana masaeka marata manggeni tambo ala mombabalasi pura-pura tau nantuki pokainggu ira samba'a bo samba'a.

¹³Aku e'imo Pamulana bo Kaopuna. Akumo Pompamulana bo Panggaopuna. Akumo to nompamula pade Akumo to nompakaopu.

¹⁴Nasana mpu'umo tau-tau to nantapasi pakeana sampe nagasa, sabana iramo to rapaloga manggoni wua nggari Kayu Katuwua. Iramo to rapaloga mesua riara ngata etu nantuki bobaa betena.

¹⁵Aga tau-tau to naja'ana, tau-tau topedoti, tau-tau to nogau sala ante tau da'a rongona mboto, tau-tau topepatesi, tau-tau to nepue ka pue-pue ntanina, tau-tau topodawa pade pura-pura tau nompokono nodawa, peto'o ira pura-pura aga ri sawaliku ngata etu.

¹⁶Aku, Yesus, nompakau malaekaku malau mompatolele tewai-tewaiku e'i ka komi todea topomparasaya Aku. Aku e'imo sulu, etumo Muli Magau Daud. Aku e'imo betu'e pompaeo to nareme mpu'u.”

¹⁷Nosa Nagasa bo boti besi to nasadia raporongo Ana Bimba etu nanguli, “Kamaimo!” Pade butu-butu mba'a tau to nangepe tesa e'i kana manguli, “Kamaimo!” Isema-sema to nabai tambolona, kamaimo! Isema-sema to madota, kamaimo manginu ue to nombawai katuwua. Etu niwai bayangi, da'a paraluu raoli.

¹⁸Aku Yohanes nompopanjani ka pura-pura tau to mangepe tesa pombaboto to nitulisi riara buku e'i iwe'i: Ane maria tau mantambai isi tesa e'i, Alatala kana mantambai ka i'a pepandasa-pepandasa ewa to nitulisi riara buku e'i.

¹⁹Pade ane maria tau mompakalipo isi tesa buku e'i, Alatala kana mompakalipo bagiana nggari Kayu Katuwua pade bagiana riara ngata to nagasa etu ewa to nitulisi riara buku e'i.

²⁰Pade nangulimo i Pue Yesus to nompasimbayu pura-pura tesa e'i, “Nakono! Aku mana masaeka marata!” Amin! Karatamo Pue Yesus!

²¹Perapi Pue Yesus mombagane pura-pura topomparasaya Alatala. Amin!