Read Da'a Kaili PANGGITA 3 Bible Online

PANGGITA 3 - Da'a Kaili bible

PANGGITA 3

¹Nanguli wo'umo Ana nu Manusia etu, “Tulisimo ka malaeka to nanggeniaka todea topomparasaya ri ngata Sardis iwe'i: E'imo tesa nggari ja'ina to naria papitu nosa nu Alatala bo to nanjoko pituongu betu'e. Ninjanikumo pura-pura pokainggumu. Komi nireke ntau topomparasaya to naroso, tapi kakonona pomparasaya komi etu namatemo.

²Pembangumo! Pakarosomo pomparasaya to danariapa ri ja'i komi to ntora namate. Sabana nikitaku nggari pura-pura powiamu da'apa ria kamba sangele to nagana riara mpanggita nu Alatala.

³Jadi toramo pepatuduki to niepe komi pade nitarima komi bopia. Tukimo pepatuduki etu pade kajeamo nggari sala-sala komi. Ane komi da'a mainga Aku kana marata ri ja'i komi ewa topangangga. Da'a ranjani-njani komi tempo karataku.

⁴Aga danariapa ri tatongo komi ri ngata Sardis bara sakuya mba'a tau to nombajagai pakea ira sampe da'a natantoru. Iramo to mamala molumako mpasanggani-nggani ante Aku mopakea bula, sabana iramo to masipato molumako ante Aku.

⁵Isema-sema padagi kana rawai ka baju bula ewa etu. Pade sanga ira da'a kupakalipo nggari Buku Katuwua. [11] Tapi Aku kana mompangaku ira etu ri ngayo Umaku bo malaeka-malaekana.

⁶Isema-sema naria talingana, epemo mpakabelo-belo nuapa to niuli Nosa Nagasa nu Alatala ka todea topomparasaya ri umba-umba ngata.”

⁷Nanguli wo'umo Ana nu Manusia etu, “Tulisimo ka malaeka to nanggeniaka todea topomparasaya ri ngata Filadelfia iwe'i: E'imo tesa nggari ja'ina to nagasa bo nakono. I'amo to nanjoko kunci Poparenta Magau Daud. [12] Ane I'a mombabea pewobo da'a ria samba'a tau mamala mombapikuna, pade ane I'a mombapiku pewobo da'a ria samba'a tau mamala mombabeana.

⁸Ninjanikumo pura-pura pokainggumu. Kitamo! Aku nombabea ka komi saongu pewobo, pade da'a ria samba'a tau mamala mombapikuna. Sabana naupa komi da'a naroso ntoto komi natutu nantuki tesaku bo komi da'a nombasapu Aku.

⁹Naria tau-tau to najadi todea Magau nu Seta to nanguli ira etu tau to Yahudi tapi kakonona da'a, ira aga nodawa. Tapi kitamo! Ira kana kupowia marata ri ja'i komi. Pade ira kana mekadede ri ngayo komi bo mompangaku Aku mpu'u-mpu'u nompotowe komi.

¹⁰Komi nantuki parentaku to nanguli pakaroo rara tempo nipandasa. Sabana etu Aku kana manggalendu komi nggari kasusa to marata ri njumaongu dunia ala mombasoba pura-pura manusia to neto'o ri dunia.

¹¹Mana masaeka Aku marata. Jadi sokomo mpakaroso pepatuduki to nipatuduki ka komi ala komi mombarata hadia padagi nggari ja'i Alatala. Ne'e sampe maria tau mangago hadia etu nggari ja'i komi.

¹²Isema-sema padagi kana maroo ri suruga sampe ri kasae-saena nasimbayu ewa tinja nu sapo Alatalaku. Ira da'a mana mesuwu nggari setu. Pade ri koro ira kana kutulisi sanga nu Alatalaku bo sanga ngata nu Alatala, etumo Yerusalem nabou to mana'u nggari suruga nggari ja'i Alatalaku. [13] Pade sangaku mboto to nabou kana kutulisi ri koro ira.

¹³Isema-sema naria talingana, epemo mpakabelo-belo nuapa to nitesa Nosa Nagasa nu Alatala ka todea topomparasaya ri umba-umba ngata.”

¹⁴Nanguli wo'umo Ana nu Manusia ka aku, “Tulisimo ka malaeka to nanggeniaka todea topomparasaya ri ngata Laodikia iwe'i: E'imo tesa nggari ja'ina to nipoposanga ‘Amin’, etumo sabi to natutu notesa to nakonona. I'amo Pu'u nu pura-pura nuapa to nipajadi Alatala.

¹⁵Ninjanikumo pura-pura pokainggumu. Pomparasaya komi da'a naleni pade da'a wo'u napane. Nabelopa pomparasaya komi maleni bara mapane.

¹⁶Tapi pomparasaya komi etu aga napane ngolo, da'a naleni da'a napane. Sabana etu Aku kana mombaluaraka komi nggari ngangaku.

¹⁷Sabana komi nanguli, ‘Kami e'i nakalumanamo, nagana puramo katuwu kami, da'a mana makabu.’ Tapi kakonona da'a ninjani komi katuwu komi mboto. Komi neliu nggandasamo. Katuwu komi aga nipoasi mata ntau. Komi nakasiasi mpu'u, naburomo mata komi, bo nelayamo komi.

¹⁸Etu sampe Aku mompatuduki komi iwe'i: Olimo nggari ja'iku bulawa to nipakagasa riara apu ala komi mpu'u-mpu'u makalumana. Pade oli wo'umo pakea bula nggari ja'iku ala komi mamala mopakea pade eya mata komi topelaya etu mamala ratutu. Pade oli wo'umo pakuli ragese ri matamu ala komi mamala mekita bali.

¹⁹Isema-sema to nipotoweku, ira kana kuontiaka pade kuboba ala mompatuduki ira. Etu sampe kuuli ka komi, pakaroso raramu bo kajeamo nggari pomparasayamu to napane ngolo etu.

²⁰Kitamo! E'imo Aku nekanggore nantenggedeu pewobo. Ane maria tau riarana mangepe suaraku bo mombabea pewobo, Aku kana mesua ri ja'ina pade manggoni mpasanggani-nggani ante i'a.

²¹Isema-sema padagi kana kupaloga mekatoko mosanggani ante Aku ri pekatoko poparentaku pade moparenta mpasanggani-nggani ante Aku nasimbayu ewa Aku wo'u najadi padagi sampe nipaloga mekatoko moparenta mosanggani ante Umaku ri pekatokona.

²²Isema-sema naria talingana, epemo mpakabelo-belo nuapa to nitesa Nosa Nagasa nu Alatala ka todea topomparasaya ri umba-umba ngata.”