Read Da'a Kaili PANGGITA 5 Bible Online

PANGGITA 5 - Da'a Kaili bible

PANGGITA 5

¹Naopu etu aku nanggita santa'u sura nilulu ri pale nggana ntopekatoko ri pekatoko magau etu. Sura etu nitulisi ntimali pade nipataka papitu segel ala da'a mamala rabuka ntau.

²Pade nikitaku naria samba'a malaeka to naroso mpu'u narata nekutana ante suarana namangga mpu'u, “Isema to masipato mombalepa segel-segel pade mombabuka sura e'i?”

³Tapi da'a ntoto ria kamba samba'a to masipato mombabuka sura etu pade mombabasa isina, nabeloka ri suruga, nabeloka ri dunia, nabeloka ri tambe nu dunia.

⁴Nanggita etu nageomo aku nakanjodu-njodu ante nasusa mpu'u raraku sabana da'a ntoto naria samba'a tau to masipato mombabuka sura etu pade mombabasa isina.

⁵Nanggita aku nageo naria samba'a totu'a nggari tatongo ira rompulu bo patamba'a nanguli ka aku, “Ne'e iko mageo. Kitamo! Nariamo padagi. Sangana Singa nggari bagia todea Yehuda, sulu Magau Daud. [15] I'amo to masipato mombalepa papitu segel etu pade mombabuka sura etu.”

⁶Naopu etu nikitaku saongu Ana Bimba nenggore ri tatongo pekatoko magau bo patamba'a anu to natuwuna nitatiku totu'a-totu'a etu. [16] Ri korona nikitaku walea baka, belana tempo I'a nipatesi nggaolu. Ri balenggana naria papitu tanduna bo matana wo'u pituongu. Pituongu matana etu batuana papitu nosa nu Alatala to nipakauna malau mpaka ri njumaongu dunia.

⁷Pade naratamo Ana Bimba etu nangala sura nilulu etu nggari pale nggana ntopekatoko ri pekatoko magau etu.

⁸Sangga Ana Bimba nangala sura etu nekadedemo patamba'a anu to natuwuna bo rompulu bo patamba'a totu'a ri ngayona mombasomba I'a. Ri pale ira samba'a bo samba'a naria kacapi bo tubu bulawa to niisi dupa to nawongi mpu'u. Dupa etu nombagambara posambaya ntodea topomparasaya Alatala.

⁹Totu'a-totu'a etu nodade saongu dade to nabouna ka Ana Bimba etu iwe'i: “Komimo to masipato mangala sura etu pade mombalepa segelna. Sabana Komi nipatesi pade ante lei kamatemu etu Komi nantolo manusia nggari njumaongu dunia majadi bagia Alatala, etumo tau-tau nggari butu-butu ngata, pade nggari butu-butu todea to notesa mpengele-ngele basa ri dunia.

¹⁰Ira nipajadimu magau-magau bo topanggeni-topanggeni agama to nanggeni pesomba ka Pueta Alatala. Pade ira kana moparenta ewa magau riara dunia e'i.”

¹¹Naopu etu aku nanggita wo'u pade niepeku suara malaeka nadea, nonjobu-njobu bo juta-juta kadeana. Ira nantatiku pekatoko magau nosanggani-nggani ante patamba'a anu to natuwuna bo rompulu bo patamba'a totu'a etu.

¹²Pade nongaremo ira ante suara to namangga mpu'u, “Ana Bimba to nisambale nggaolu etu masipato ratesata kuasana bo kakalumanana, notona bo karosona. I'amo to masipato rabila bo ratoiyata bo rapakabeteta sangana.”

¹³Pade niepeku wo'umo suara pura-pura to natuwu ri suruga, ri dunia, ri tambe nu dunia, pade ri tasi ante pura-pura nuapa riarana. Ira nodade iwe'i: “Topekatoko ri pekatoko magau bo Ana Bimba etu masipato ratoiya bo rabilata bo rapakabeteta sangana, pade kuasana masipato ratesata sampe ri kasae-saena.”

¹⁴Pade nesonomo patamba'a anu to natuwuna etu, “Amin!” Pade nekadedemo totu'a-totu'a etu sampe ri tana mombasomba Alatala.