Read Da'a Kaili PANGGITA 6 Bible Online

PANGGITA 6 - Da'a Kaili bible

PANGGITA 6

¹Naopu etu nikitaku Ana Bimba etu nombalepa segel pamulana. Pade niepeku samba'a nggari tatongo patamba'a anu to natuwuna etu notesa ante suara namangga mpu'u ewa moni guntu bete. Niulina, “Kamaimo!”

²Aku nanggita pade kitamo, ri ngayoku nariamo saongu jara bula nipesawi samba'a tau to nanjoko pana. Pade naria songgo niwai ka i'a, ewa songgo niposonggo ka tau padagi riara posipatesi. Pade nalaumo i'a ewa samba'a Tadulako malau mombadagi balina.

³Naopu etu Ana Bimba etu nombalepa segel karonguna, pade niepeku anu to natuwuna karomba'ana nanguli, “Kamaimo!”

⁴Pade nesuwu wo'umo saongu jara to nalei wuluna. Pade topesawi jara etu niwai ka kuasa mompoposinggarau manusia riara dunia ala ira mosipatesi. Pade i'a niwai ka wo'u samata guma to nabetena.

⁵Naopu etu Ana Bimba etu nombalepa segel katoluonguna. Pade niepeku anu to natuwuna katolumba'ana nanguli, “Kamaimo!” Aku nanggita pade kitamo! Ri ngayoku naria wo'umo saongu jara to nawuri wuluna, pade topesawi jara etu nanjoko saongu potimba.

⁶Naopu etu niepeku suara nggari tatongo patamba'a anu to natuwuna etu nanguli, “Oli nu ose sakilo nasimbayu ewa gaji saeo, pade oli nu tolukilo jole wo'u nasimbayu ewa gaji saeo. Aga ne'e rapakagero kayu-kayu zaitun bo walaa-walaa anggur.”

⁷Naopu etu Ana Bimba nombalepa segel kaampana. Pade niepeku suara nggari ja'i anu to natuwuna kapatamba'ana nanguli, “Kamaimo!”

⁸Naliu etu nikitaku saongu jara to nangguni mpaa wuluna. Topesawi jara etu nosanga ka “Kamatea.” Pade to nantuki i'a nggari purina nosanga ka “Dunia Ntomate.” Ira romba'a etu niwai ka kuasa mompatesi sabagia nggari patabagia nggari pura-pura manusia riara dunia e'i. Naria to namate tempo posipatesi, naria to namate tempo kamateoro, naria to namate tempo ju'a mpendai, pade naria wo'u to namate nikoni binata-binata nasoa riara dunia.

⁹Naopu etu Ana Bimba nombalepa segel kaalimana. Pade nikitaku ri wayo Meja Mpesomba naria wayo-wayo ntau namate to nipatesi sabana ira nompatolele Tesa nu Alatala pade natutu nompangaku ira topomparasaya i Pue Yesus.

¹⁰Ira nongare sanggani ante suara to namangga mpu'u, “O Pue to Neliu Nggakuasa, pade to nagasa bo nanoa. Sakuyapa kasaena pade Komi mombatangara bo mombabalasi tau naja'a ri dunia to nompatesi kami e'i?”

¹¹Naopu etu ira samba'a bo samba'a niwai santonga baju bula. Pade nangulimo Alatala ka ira, “Posabaramo sampalaipa sampe maganamo kadea nu roa-roa komi sampokarajaa bo sampesuwu-sampesuwu komi topomparasaya to rapatesi nasimbayu ewa komi.”

¹²Pade aku nanggita tempo Ana Bimba etu nombalepa segel kaonona. Sangga nilepanapa najadimo lingu bete pade mata eo najadi narumau ewa buya wuri. Pade wula najadi nawonda pura ewa lei.

¹³Pade betu'e-betu'e ri langi nanawu sampe ri dunia nasimbayu ewa wua ara da'apa natasa naronto nggari pangana tempo nigagoya poiri bete.

¹⁴Pade kaliu-liu nalipomo langi nasimbayu ewa ompa nilulu. Pade nolinjamo butu-butu bulu bo lewuto nggari peto'ona.

¹⁵Tempo etu nalaumo pura-pura tau riara dunia netabuni riara bololia pade ri kele-kele watu ri buluna, nabeloka magau-magau, nabeloka topoparenta-topoparenta, nabeloka tadulako-tadulako, nabeloka tau-tau nakalumana, nabeloka tau-tau to naroso, nabeloka pura-pura tau najadi batua bo tau-tau da'a najadi batua.

¹⁶Nongaremo ira ka bulu-bulu bo watu-watu, “Iwumo kami e'i! Tabuniakamo kami ala da'a mana rakita mata ntopekatoko ri pekatoko magau etu! Iwumo kami ala kami da'a mawela rau rara nu Ana Bimba etu!

¹⁷Sabana naratamo eo to nipowiora rara manusia tempo Alatala bo Ana Bimba mompopesuwu rau rara ira. Da'a ntoto ria samba'a tau mamala mantaha mawela rau rara etu!”