Read Da'a Kaili PANGGITA 7 Bible Online

PANGGITA 7 - Da'a Kaili bible

PANGGITA 7

¹Naopu etu aku nanggita patamba'a malaeka nekanggore ri patanjulapa dunia. Ira nombata'amaka poiri bete nggari patanjulapa dunia ala poiri etu ne'e makantawui ri tasi pade ri kabatana pade ri kayu-kayu rara mpangale.

²Pade nikitaku wo'umo samba'a malaeka ntanina nesuwu nggari sabingga kamataeona. I'a nanggeni mere nggari ja'i Alatala to Natuwuna. Pade nongaremo i'a ante suara namangga ka patamba'a malaeka ntanina to niwai Alatala ka kuasa mompakagero dunia bo tasi.

³Niulina, “Ne'epa ruru rapakagero komi dunia bo tasi bara kabatana bo kayu-kayu rara mpangale ane da'apa kami nombamere batua-batua nu Alatala ri kire ira ala ira ne'e mawela kasusa-kasusa etu.”

⁴Pade niepeku kadea ntau nimere ri kire ira iwetu, satu patampulu bo patanjobu mba'a. Ira nggari muli sampulu romba'a ana Yakub to niuli to Israel.

⁵Nggari muli ira sampulu romba'a ana Israel niala simbau sampulu ronjobu mba'a kadeana. Nggari muli Yehuda sampulu ronjobu nimere. Iwetu wo'u nggari muli i Ruben sampulu ronjobu, muli i Gad sampulu ronjobu,

⁶muli Asyer sampulu ronjobu, muli i Naftali sampulu ronjobu, muli i Manasye sampulu ronjobu,

⁷muli i Simeon sampulu ronjobu, muli i Lewi sampulu ronjobu, muli Isakhar sampulu ronjobu,

⁸muli i Zebulon sampulu ronjobu, muli Yusuf sampulu ronjobu, pade nggari muli i Benyamin sampulu ronjobu.

⁹Naopu etu aku nanggita wo'umo pade nikitaku manusia nadea mpu'u, da'a namala nibila kadeana. Ira etu topomparasaya nggari njumaongu dunia, nggari butu-butu ngata, nggari butu-butu todea to notesa mpengele-ngele basa ri dunia. Ira nenggore ri ngayo pekatoko magau bo Ana Bimba. Ira pura-pura nopakea bula pade ri pale ira naria tawa-tawa nggaluku.

¹⁰Nongaremo ira sanggani ante suara namangga mpu'u, “Kamaimo kita mombatoiya bo mombabila Alatalata to nekatoko ri pekatoko magau! Kamaimo kita mombatoiya bo mombabila Ana Bimba, sabana iramo to nompakasalama kita!”

¹¹Pura-pura malaeka wo'u nekanggore nantatiku pekatoko magau, bo totu'a-totu'a, bo patamba'a anu to natuwuna. Pade nekadedemo malaeka-malaeka etu sampe ri tana ri ngayo pekatoko magau mombasomba Alatala.

¹²Niuli ira, “Amin! Ratoiyata Alatalata! Rapakabeteta sangana! Ratesata kanotona, raulita tarima kasi ka I'a. Rabilata I'a pade ratesata kuasana bo barakana sampe ri kasae-saena. Amin!”

¹³Naopu etu naria samba'a totu'a nggari ja'i ira rompulu bo patamba'a etu nompekutana aku iwe'i: “Isema tau-tau to nopakea bula etu? Nggari umba ira?”

¹⁴Nesonomo aku, “Tua, komimo to nangginjanina, da'a aku.” Pade nangulimo i'a ka aku, “Ira etumo tau nipakasalama nggari pepandasa to neliu mpu'u kaja'ana. Ira nantapasi pakea ira riara lei nu Ana Bimba sampe nabula.

¹⁵Etu sampe ira nekanggore ri ngayo pekatoko Alatala. Eo wengi da'a nenonto ira nepue bo nombasomba Alatala riara Sapo Mpepuena. Pade Alatala to nekatoko ri bunggu pekatoko magau etu kana mosanggani-nggani ante ira ala manggalendu ira.

¹⁶Ira etu da'a mana mombarasai oro nta'i bara bai ntambolo. Pade wana nu eo to napane-panena mana mompandasa ira.

¹⁷Sabana Ana Bimba to naria ri ngayo pekatoko magau etu kana mompoewu ira. I'a kana manggeni ira mpaka ri mata ue to mombawai katuwua mabelo. Pade Alatala mboto kana mombape'e pura-pura ue mata nggari mata ira.”