Read Da'a Kaili PANGGITA 8 Bible Online

PANGGITA 8 - Da'a Kaili bible

PANGGITA 8

¹Sangga Ana Bimba nombalepa segel kapituonguna, nalino mpaa riara suruga kira-kira santongo jaa kasaena.

²Pade aku nanggita pitumba'a malaeka to nenggore ri ngayo Alatala. Ira niwai ka pituongu kololio.

³Naopu etu naria samba'a malaeka ntanina narata nenggore ri ngayo Meja Mpesomba. [17] Malaeka etu nanggeni santonga tubu bulawa rapotunju dupa. Pade i'a niwai nadea dupa ala ratunju majadi pesomba ka Alatala mosanggani-nggani ante posambaya nggari ja'i pura-pura topomparasaya. Pade nitunjuna dupa etu ri Meja Mpesomba to nipowia nggari bulawa to naria ri ngayo pekatoko Alatala.

⁴Tempo i'a nombatunju dupa etu, rangasuna nosumoa ri ngayo Alatala mpasanggani-nggani ante posambaya ntodea topomparasaya.

⁵Naopu etu nialana tubu mpotunju dupa etu pade niisina ante apu nggari bunggu Meja Mpesomba. Pade nitajiakana mpaka riara dunia. Sangga nitajiakapa apu etu nepogumo guntu bete pade kila damo mparea pade najadimo lingu.

⁶Naopu etu pitumba'a malaeka to niwai ka pituongu kololio etu nompakasadia korona mompopomoni kololiona samba'a bo samba'a.

⁷Pade malaeka pamulana nompopomoni kololiona. Kaliu-liu nadunggumo uja es bo apu nogalo lei sampe riara dunia ante naromba mpu'u. Pade sabagia nggari tolubagia dunia naopu sanggani nikoni nu apu. Sabagia nggari tolubagia kayu-kayu ri dunia naopu sanggani nikoni nu apu, pade pura-pura kawoko naramata wo'u nikoni nu apu etu.

⁸Naopu etu malaeka karomba'ana nompopomoni kololiona. Kaliu-liu naria sangele ewa bulu to nalanga mpu'u to najela ante apu nitajiaka riara ntasi. Pade sabagia nggari tolubagia tasi nabali najadi lei.

⁹Pade namate sangganimo sabagia nggari tolubagia nggari pura-pura to natuwu rarantasi. Pade naropumo sabagia nggari tolubagia nggari pura-pura sakaya to nosumomba ri bunggu ntasi.

¹⁰Naopu etu malaeka katolumba'ana nompopomoni kololiona. Kaliu-liu nanawumo saongu betu'e bete nggari langi to najela ewa sulo. Betu'e etu nanawu nawela sabagia nggari tolubagia nggari pura-pura ue bo mata ue ri dunia.

¹¹Sanga betu'e etu “Pa'i.” Jadi sangga nawela betu'e etu sabagia nggari tolubagia nggari ue bo mata ue etu najadi napa'i sanggani. Pade nadea manusia namate sabana nanginu ue to napa'i etu.

¹²Naopu etu malaeka kapatamba'ana nompopomoni kololiona. Kaliu-liu nageromo sabagia nggari tolubagia nggari mata eo, wula bo betu'e-betu'e, sampe najadi narumau. Jadi patajaa ri eona mata eo da'a nareme, pade wa'a wo'u wula bo betu'e-betu'e tempo nggawengina.

¹³Naopu etu aku nanggita wo'u pade kitamo, naria samba'a tonji lowe nembua ri laerawa. Niepeku wamba nu lowe etu notesa ante suara to namangga. Niulina, “Mandasamo! Mandasamo! Mandasamo tau-tau to naja'a to neto'o ri dunia tempo toluongupa kololio rapopomoni tolumba'a malaeka etu.”